هنتكلم المره دي عن سؤال شفته مره في احدى المدونات وكانت بتساله واحده وبصراحه مش فاكر هي مين ولا فاكر انهي مدونه اصلا وياريت لما صاحبة المدونه والسؤال تشوفها مش تقتلني لأني بجد مش فاكر انا شفته فين
واديني بقول اهو من الأول
السؤال كان ببساطه حد بيسال هو ليه انتشرت قوي فكرة اللبس الجديده اللي هي عباره عن بدي كارينا وطرحه صغننه عليها وبنطلون جينز محزق
هل ده حجاب ولا روشنه ولا ايه بالظبط
انا بقى عايز علشان اجاوب احسب الأمور من الأول خالص وبصراحه كده ومن غير تزويق خالص
اولا كلنا عارفين ان ربنا خلقنا رجالا ونساء كل له طبيعه مختلفه بعيدا بقى عن كل المساواه والعدل وازاي تفرقوا بينهم وكلنا بشر زي بعض ومفيش فرق بين راجل وست
انا بقول اهو هاتكلم بصراحه وعلى بلاطه
ربنا خلق الراجل له طباع وخصائص معينه عززها فيه بخصائص جسديه مناسبه ليها
وخلق الست بصفات معينه برده وعززها بصفات جسديه مناسبه ليها
لأن ربنا هو اعلم بما يتناسب مع كل خلقه لأنه في الأول وفي الأخر هو خلق الله
ماشي اتفقنا
ربنا خلق الست اصلا سكن وراحه للرجل وجعل فيها حاجات يحتاجها الرجل
وخلق الرجل امان وحمايه ويمكن كمان راعي للمرأه وجعل فيه حاجات تحتاجها المرأه
الست بطبعها اصلا تميل لأنها تشعر بجمالها وانوثتها بغض النظر عن كل المهاترات بتاعة ازاي تبص للست على انها جسد فقط وكده الجمال مش جسد بس ولا حاجه لكن اول حاجه في جمال اي واحده هو جمالها الشكلي طبعا
فمن غير مماطله كده كل ست بتحب تبقى جميله وتحب تحس بجمالها ده في عيون الأخرين ولأن الأخرين رجال ونساء
النساء كل واحده عايزه تشعر انها الأجمل بالتالي مفيش واحده هتدي التانيه احساس انها معجبه بجمالها يعني
يتفضل الرجل اللي عينه بتصرخ بالكلام لما يشوف واحده حلوه طبعا
لكن بتيجي الدين والأخلاق والتربيه يعملوا فلتر على كل ده
ده عيب وده مش عيب
ده حرام وده مش حرام
ده مناسب وده مش مناسب
وكل واحده وحسب درجة غرس التعاليم دي جواها ومفهومه ليها
لكن في الأخر كلكم سواء
بتحبوا برده تشعروا بجمالكم
وعلى الوجه الأخر الرجل برده
برغم التحضر والتعليم والثقافه والذكاء وكل ده
يبقى اول حاجه تعزز ثقته بنفسه هو احساسه بقوته وسيطرته
وبالذات قوته الجسديه
هي كده اول حاجه بنمتلكها هي اجسادنا علشان كده هي اكتر حاجه بنستمتع بالتباهي بيها
علشان كده هتلاقي كل راجل نفسه يبقى اقوى ويكون سيطرته اعظم
وكل ست نفسها تكون الأجمل وتكون سيطرتها برده اقوى لكن بجمالها و مدى اهتمام ورغبة الناس فيها
بس بقى الفلتر هو اللي بيفرق واحده عن التانيه هو اللي بيفرق واحده مستعده تمشي بالمايوه في ميدان التحرير من غير ما تحس بأي مشكله وواحده لازم تغطي كل شعره فيها حتى لو في البلكونه بتاعتها
مش معنى كده دي جواها شيطان ودي جواها ملاك
لكن كل واحده الفلتر بتاعها بيختلف دي جواها ست وعايزه تحس بأنوثتها ودي برده زيها بدون اي فرق غير في الفلتر
نيجي بقى لحل السؤال اللي انكتب ده كله علشانه
لما تبص لواحده جواها حريقه من جوه عايزه تحس بكل حته جميله في جسمها وعايزه تبقى احلى في ظل موجة العري والفضائيات دي كلها وفي نفس الوقت جواها مخزون اخلاق والتزام ديني واداب اتربت عليها منعوها تتجه للي هي حاسه بيه من كتر مشاهدتها للجو المبهر ده في الأعلام وغيره
يبقى الحل ايه بين البينين
البس حاجه مقفوله لحد كف ايدي وفي نفس الوقت كأني مش لابسه حاجه بدي شبه شفاف مجسم كل نقطه فيها
بنطلون مداري كل رجليها لحد صوابعها المتغطيه بالجزمه مع انه ملزق عليها وكل تضاريسها يمكن قياسها بالمللي
وطرحه على اساس ان الحجاب هو مجرد غطاء لبصيلات الشعر
مش بقول انها مش كويسه بالعكس ده اكبر دليل انها من جواها عايزه متغلطش
عايزه تمشي على الطريق الصح متخرجش منه
لكن جواها بركان بيزيد مع كل لحظه بتمر مع كل فيلم بيزرع قيمه جديده للعري والأنحلال
مع كل اغنيه وممثله ومطربه مشهوره والناس والرجال كلهم هيموتوا عليها علشان لبست فستان عرى رجليها لحد اقصى حد سمحت بيه الرقابه
اعتقد الغلطه غلطة كل راجل زوج واب واخ سمح لنفسه يظهر للبنت دي ان القيمه الوحيده ليها هي في انها تبقى زي الناس دي
واحب اضيف اخيرا اني مش معنى كلامي ان كل عقل الست منحصر في ده لا طبعا انا بتكلم عن جانب اساسي في عقلها لكن مش هو السواد الأعظم داخل عقلها
بالعكس الست دلوقتي بالذات بقت اكتر اهتماما بالدراسه والعلم والعمل وبقت انجح كتير وبقت عندها استعداد للضغوط والتحمل اكتر من الراجل اللي عايز يخلص الشغل يروح ينام او يقعد على القهوه في حين هي عايزه تخلص الشغل ترجع تحضر الأكل وتجهز البيت وتذاكر للولاد وتجهز نفسها لشغل بكره وتديله حقوقه وتعمل خمستلاف حاجه وترجع حد يقولي عقلها صغير ده لو عقلها صغير كنا زمانا ضعنا من زمان
مع خالص حبي وتقديري