Tuesday, March 25, 2008

المزز..... المزز.... المزز


عفوا لقد فقدنا الحياء

عارفين حاجه غريبه قوي بتحصل في مجتمعنا المزز

كلمه بقوله كتير وناس كتير بتقولها كتير ليه بقى بنقولها كتير

علشان البلد بقت مليانه مزز
الأول مكانش الوضع كده كان المزز دي حاجه مش كل شويه نلاقيها كده كانت لما تعدي مزه في حتت معينه بس مش موجودين في كل حته زي دلوقتي تلاقي الناس هتتهبل عليها
دلوقتي بقى العدد في الليمون

طيب يعني ايه مزه

يعني بنت حلوه جسم مرسوم رسمه حلوه كده طبعا ازاي نعرف انه مصبوب حلو الا اذا هي اتبرعت وعرضت اجزاء منه مكشوفه خالص والباقي بيتم عرضه بطريقة الشفافيه

يعني اللبس لازم يكون كأنها مش لابسه من الأخر ضيق ومجسم ويخليك عايز تمد ايدك تتأكد انه ده مش مجرد دهان ملون على جلدها وخلاص

الحركات كلها نعومه الضحكه بجحه وعاليه وغالبا وقحه
التعامل بمنتهى العجرفه لأنها عارفه انها عامله زي حتة اللحمه عند الجزار الكل هيموت عليها والناس يا عيني هفتانه وعايزه تتغذى فطبعا بتتأنعر على كيفها

الشغل غالبا بيكون شغلها معتمد على جمالها وجمال جسمها واستعدادها لتقديم التنازلات الممكنه لجذب الزبون
فغالبا تلاقيهم شغالين في حاجات تسويقيه او سكرتاريه او او او الأمثله كتير

طب ليه بقى العدد بقى في الليمون ومبقتش المواضيع محصوره على طبقه معينه او تربيه معينه الموضوع بقى في كل شارع
كله عايز يبقى مزه ويمكن كمان مزه صايعه
اللبس بقى كله لبس مزز طول ما انت ماشي لو راجل غض بصرك هتغض عشر مرات وتبص عشرين مره مش عايزكم تياسوا ربنا هيوفقكم لو نيتكم صادقه في غض البصر بس هي المواضيع عايزه شوية عزيمه

نيجي بقى للأسباب اللي خلت تقريبا 90% من بناتنا الحلوين يبقوا بالمنظر ده وعلى فكره انا بقصد مسلمين ومسيحين محدش يقولي المسلمين بس لأن حتى المسيحين اصلا مش بيلبسوا كده دي هوجه وصابت الجميع المهم

لما تحاول تسال ازاي البنت دي نزلت من بيتها بالمنظر ده وابوها مش بيعترض وامها مش بتخاف لترجعلها مقتوله
تلاقي الأجابه الجاهزه حاجه من دول

· البنت بتحب تلبس حلو وهي دي الموضه اللي موجوده ومفيش لبس غير كده وانا مش بحب افرض عليها حاجه سايبها تختار بحريه وديموقراطيه
نعم ياخويا هي الديموقراطيه انك تسيبها تعمل الغلط اللي هيوديها في داهيه وتقولي انا ربيتها كويس ومش خايف عليها ليه يعني عايشين في يوتوبيا الناس بقت عامله زي الكلاب في الشوارع
معلش يعني هاتلي واحده مبتتعاكسشي في الشارع هتقولي طيب ما المحجبه بتتعاكس يبقى فرقت ايه
فرقت ان اللي مش محجبه هتتعاكس بسفاله اكتر وببجاحه اكتر تصل في معظم الحالات لمد الأيد بمنتهى السفاله ومحدش هيحوش عنها كل الناس هتنفض وتقولك خلي البيه ال....اللي سابها تنزل كده يبقى يجي يلحقها بقى
ده عن الأهل في البيت ولما تسالها هي تقولك اصل هي دي الموضه اشمعنى انا وبعدين هعمل ايه الناس كلها بتلبس كده وعايزه ابقى حلوه
اقولها ايه دي بس يعني انتي معندكيش تفكير شخصي خالص كله على طريقة الأخرين واقلب
مفيش عندك تفكير تقدير للأمور التزام بدين

· حاجه تانيه بقى واجابه تفقع المراره تقولك ايه اصلها عايزه تتجوز ولازم تلبس علشان العرسان تجيها تلبس اه تقلع لأ يا ناس
على اسا ايه يعني اللبس العريان والمنيل ده هيجيب عريس على اساس انها هتمشي زي فتيات الليل في الشارع الرجاله هتريل عليها هوب هيجوا يخطبوها طيب عفوا يعني انت تقبل ان بنتك تتجوز واحد كل همه انها تبقى جسمها حلو وانتي تقبلي تتحولي الي مجرد سلعه بتتعرض كل حته فيها علشان المشتري يجي يتفرج

ونرجع نشتكي من المعاكسات ويقولك ازاي معندوش اخت بنت لا يا اختي عنده وبقت مهزله برده هو وسط اصحابه بيعاكس بنت تانيه والأتفاق الغير معلن احنا نعاكس بنات الناس لكن اخواتنا في شلتنا ميتعاكسوش يعني انا اعاكس كل البنات ما عدا اختك وانت برده كذلك
واللي يعرف يلم معزته يبقى هو الجدع بقى
وده بيحصل لأنه ميقدرش يحجر على حريتها اللبسيه وابوها نفسه الله يهديه معندهوش مانع ان بنته نازله باللبس ده

مبقتش عارف ايه اللي خلى الناس فقدت الحياء كده
واصلا ازاي البنت بيجيلها بجاحه تلبس كأنها مش لابسه كده
انا بقول هي بتيجي بالتدريب يعني وهي خمس سنين ولسه طفله مفيش مشكله بس تلاقي اهلها بيلبسوها كأنها عروسه عندها تلاتين سنه وكل ما تكبر اللبس اللي عامل زي لبس العاهرات يبقى حلو قوي عليها اصلها طفله مفيش مشكله وكل يوم بتكبر ولسه اللبس مبيتغيرش والأهل شايفنها طفله تلاتين سنه وبتلبس على انها طفله

اقولكم انا ماليش دعوه لحسن المزز ده حوار جامد قوي ولسه عايز اقول فيه كتير وانا كده هاروح وراء الشمس

سلااااااااااااااااام

8 comments:

Doba said...

موزز
موزز

والله شكلك يا ايهاب فعلا هتروح ورا الشمس ثم وانت مالك انت يلبسوا عريان يلبسوا متغطى

دى حرية شخصية
============

تعليقى حاجة واحدة بس
كلكم راع وكل مسؤوول عن رعيته
وربنا يستر علينا دنيا وآخره

سلام يا ابو الشناكيت
هبة

Reham Mahmoud said...

هههههههههههههه
بجد عندك حق ايه ال هم بيعملوا ده
البلد بازت يارجاله عليهم اللحمة
ههههههههه
على العموم احنا مش هنقدر نعمل حاجة علشان ديه حريه شخصيه محدش هيسمعنا لو قلنا هيقولولنا انتوا مالكم
جميله جدا
المزز المزز المزز
تحياتى
ريهام

الآء said...

انا هخرج عن الموضوع بس لأني أفتكرت حاجه

انا بدرس في المدرسة الألمانية وسمعت أطفال عندي من اولي حضانه بيجروا ورا بنت برده من أولي حضانه وعماليين يقولولها خدي يا موووزه تعالي يا مووززه

والبنت جايه بتقولي بكل ثقة وسرور يعني أيه موززه بالألماني؟؟؟

ونو كومنت

سلام

الشنكوتي الكبير said...

دوبه
يا هبه انتي جبتي المفيد كلكم راع وكلكم مسؤل عن رعيته

يعني انا برده شايف ان هم مش مسؤلين قد ما اهلهم مسؤلين
هم اتربوا على كده علشان كده حاسين انهم صح
لكن اللي ربى واللي عنده خبره واللي عارف الدنيا فيها ايه
واللي المفروض عارف دينه هو اللي مسؤل عنهم

وبعدين اروح في داهيه ليه
هو انا جيت جنب الحكومه في حاجه
نورتي
سلااااااااااااااااام

---------------

ريهام محمد

بصي يا ريهام مش هنقدر نقول عليهم اللحمه علشان اللحمه غاليه قوي
كفايه عليهم بخمسين قرش طعميه

اما عن عدم سماعهم انا عارف ان هم مش هيعبروني يعني ولا حاجه
بيس اديني بقول بس رأيي
اصل انا بسمع شكاوي كتير من موضوع المعاكسات للبنات الملتزمه وده زعلني جدا
لما تبقى بنت محترمه ولابسه محترم وواحد حيوان يتحرش بيها
ده سببه ان المزز الكتير قوي دول عملوا فكره عامه ان هي دي البنات كلها مفيشض واحده عندها حياء كله زي بعضه
ودي نظره غبيه وتعميم ميصحش ابدا
بس هنقول ايه
حتى لو مسمعونيش المهم محدش فيهم يخلص عليا

سلااااااااااااااام

----------------

الاء

في الألمانيه اللي في الدقي
انا عارفها كنت بشتغل زمان في سمير وعلى اللي جنبكم المكتبه يعني كان بيجينا من عندكم ناس حلوين كتير
تلاقي العيال برده معاهم حق البنت تلاقيها كانت مزه بس تحت الإنشاء

ربنا يحمي اطفالنا من المستقبل الفاسد ده

الا هي مزه بالألماني يعني ايه

هههههههههههههههه
نورتيني
سلاااااااااااااااااااااااام

Miss Dot said...

مش عارفه أقول ايه بس الكلام أغلبه سليم
لكن فيه حاجه كان ليا تعقيب بس علي الصوره
ياريت لو كان الكلام من غيرها

==========
أما بقي عن شخصيتي اللي انت مش اعرف تجيبلها اي اساس من مدونة عاقله علي ارض الجنون
فأنا بدعوك انك تدخل البروفايل و تدخل منه علي كل المدونات يمكن تقدر تقوللي انا مين
عشان انا نفسي معرفش :D


و اخر كلامي سلام

appy said...

كدة يا بوب
مووووووز موزز

انا بكرهه الكلمه دى انا على الفيس بوك مشتركه فى جروب اسمه انا مش موزززززه دى خالص
ههههههههههه
عموما الجرى ورا الموضه والحركات بقت هوس بعيد عنك واناكنت كتبت بوست قديم فى كده

gannah said...

كلامك فعلا واقع بنعيش فيه بس نقول ايه ربنا يهدى الجميع ويسترها

mohamed said...

ازيك يا عم شنكوتى ايه ياعم الصورة اللى انت حاططها بتقول فقدنا الحياء ومزز وبتاع وانت حاطط عينه منهم ’ , بس اللى مضايقنى ونفسى اعرفه انى كل ما امشى مع واحد يقولى بص البنات لابسه ايه انا مش عارف هما ملهمش اهل طب لو كنتوا كلكم اخواتكم بيلبسوا كويس امال مين دووووووووووووووووول