Monday, March 31, 2008

ربنا خلقنا كده ....هو فيه احسن من كده؟؟؟!!!الحمدلله

هنتكلم المره دي عن سؤال شفته مره في احدى المدونات وكانت بتساله واحده وبصراحه مش فاكر هي مين ولا فاكر انهي مدونه اصلا وياريت لما صاحبة المدونه والسؤال تشوفها مش تقتلني لأني بجد مش فاكر انا شفته فين
واديني بقول اهو من الأول
السؤال كان ببساطه حد بيسال هو ليه انتشرت قوي فكرة اللبس الجديده اللي هي عباره عن بدي كارينا وطرحه صغننه عليها وبنطلون جينز محزق

هل ده حجاب ولا روشنه ولا ايه بالظبط
انا بقى عايز علشان اجاوب احسب الأمور من الأول خالص وبصراحه كده ومن غير تزويق خالص
اولا كلنا عارفين ان ربنا خلقنا رجالا ونساء كل له طبيعه مختلفه بعيدا بقى عن كل المساواه والعدل وازاي تفرقوا بينهم وكلنا بشر زي بعض ومفيش فرق بين راجل وست
انا بقول اهو هاتكلم بصراحه وعلى بلاطه
ربنا خلق الراجل له طباع وخصائص معينه عززها فيه بخصائص جسديه مناسبه ليها
وخلق الست بصفات معينه برده وعززها بصفات جسديه مناسبه ليها
لأن ربنا هو اعلم بما يتناسب مع كل خلقه لأنه في الأول وفي الأخر هو خلق الله

ماشي اتفقنا
ربنا خلق الست اصلا سكن وراحه للرجل وجعل فيها حاجات يحتاجها الرجل
وخلق الرجل امان وحمايه ويمكن كمان راعي للمرأه وجعل فيه حاجات تحتاجها المرأه

الست بطبعها اصلا تميل لأنها تشعر بجمالها وانوثتها بغض النظر عن كل المهاترات بتاعة ازاي تبص للست على انها جسد فقط وكده الجمال مش جسد بس ولا حاجه لكن اول حاجه في جمال اي واحده هو جمالها الشكلي طبعا
فمن غير مماطله كده كل ست بتحب تبقى جميله وتحب تحس بجمالها ده في عيون الأخرين ولأن الأخرين رجال ونساء
النساء كل واحده عايزه تشعر انها الأجمل بالتالي مفيش واحده هتدي التانيه احساس انها معجبه بجمالها يعني
يتفضل الرجل اللي عينه بتصرخ بالكلام لما يشوف واحده حلوه طبعا

لكن بتيجي الدين والأخلاق والتربيه يعملوا فلتر على كل ده
ده عيب وده مش عيب
ده حرام وده مش حرام
ده مناسب وده مش مناسب
وكل واحده وحسب درجة غرس التعاليم دي جواها ومفهومه ليها
لكن في الأخر كلكم سواء
بتحبوا برده تشعروا بجمالكم

وعلى الوجه الأخر الرجل برده
برغم التحضر والتعليم والثقافه والذكاء وكل ده
يبقى اول حاجه تعزز ثقته بنفسه هو احساسه بقوته وسيطرته
وبالذات قوته الجسديه
هي كده اول حاجه بنمتلكها هي اجسادنا علشان كده هي اكتر حاجه بنستمتع بالتباهي بيها
علشان كده هتلاقي كل راجل نفسه يبقى اقوى ويكون سيطرته اعظم
وكل ست نفسها تكون الأجمل وتكون سيطرتها برده اقوى لكن بجمالها و مدى اهتمام ورغبة الناس فيها

بس بقى الفلتر هو اللي بيفرق واحده عن التانيه هو اللي بيفرق واحده مستعده تمشي بالمايوه في ميدان التحرير من غير ما تحس بأي مشكله وواحده لازم تغطي كل شعره فيها حتى لو في البلكونه بتاعتها

مش معنى كده دي جواها شيطان ودي جواها ملاك
لكن كل واحده الفلتر بتاعها بيختلف دي جواها ست وعايزه تحس بأنوثتها ودي برده زيها بدون اي فرق غير في الفلتر
نيجي بقى لحل السؤال اللي انكتب ده كله علشانه

لما تبص لواحده جواها حريقه من جوه عايزه تحس بكل حته جميله في جسمها وعايزه تبقى احلى في ظل موجة العري والفضائيات دي كلها وفي نفس الوقت جواها مخزون اخلاق والتزام ديني واداب اتربت عليها منعوها تتجه للي هي حاسه بيه من كتر مشاهدتها للجو المبهر ده في الأعلام وغيره

يبقى الحل ايه بين البينين
البس حاجه مقفوله لحد كف ايدي وفي نفس الوقت كأني مش لابسه حاجه بدي شبه شفاف مجسم كل نقطه فيها
بنطلون مداري كل رجليها لحد صوابعها المتغطيه بالجزمه مع انه ملزق عليها وكل تضاريسها يمكن قياسها بالمللي
وطرحه على اساس ان الحجاب هو مجرد غطاء لبصيلات الشعر

مش بقول انها مش كويسه بالعكس ده اكبر دليل انها من جواها عايزه متغلطش
عايزه تمشي على الطريق الصح متخرجش منه
لكن جواها بركان بيزيد مع كل لحظه بتمر مع كل فيلم بيزرع قيمه جديده للعري والأنحلال
مع كل اغنيه وممثله ومطربه مشهوره والناس والرجال كلهم هيموتوا عليها علشان لبست فستان عرى رجليها لحد اقصى حد سمحت بيه الرقابه

اعتقد الغلطه غلطة كل راجل زوج واب واخ سمح لنفسه يظهر للبنت دي ان القيمه الوحيده ليها هي في انها تبقى زي الناس دي
واحب اضيف اخيرا اني مش معنى كلامي ان كل عقل الست منحصر في ده لا طبعا انا بتكلم عن جانب اساسي في عقلها لكن مش هو السواد الأعظم داخل عقلها
بالعكس الست دلوقتي بالذات بقت اكتر اهتماما بالدراسه والعلم والعمل وبقت انجح كتير وبقت عندها استعداد للضغوط والتحمل اكتر من الراجل اللي عايز يخلص الشغل يروح ينام او يقعد على القهوه في حين هي عايزه تخلص الشغل ترجع تحضر الأكل وتجهز البيت وتذاكر للولاد وتجهز نفسها لشغل بكره وتديله حقوقه وتعمل خمستلاف حاجه وترجع حد يقولي عقلها صغير ده لو عقلها صغير كنا زمانا ضعنا من زمان

مع خالص حبي وتقديري

9 comments:

walaa said...

فعلا البنت بتبقى عايزه تحس بأنوثتها ده مش معناه انها تبقى لابسه ومش لابسه انها تخلى اللى ما يشتيرى يتفرج
ايوه الفضئيات ذات فى حدها
بس هما بقو فرجه لامتة لا اله الا الله
جسد يراه كل الناس
اما هى يا ايهاب
فهى جوهره مكنونه ماسه لايراها ولا يلمسها الا ما يستحقها
تلبس اللى هى عايزها وتتفن فى العرى على راحتها ولكن يا اخى فى حدود الشرع والدين
كل بنت من حقها تظهر انوثتها ولكن لمن لكل الناس ولا لمن يقدرها ويستحقها
عارف انا لما بشوفهم فى الشارع بقول هما مالهم عارى قوى كده ليه امال لما يتجوزوا هيكشفوا ايه ما هما عارى من غير حاجه
مش معنى انى اظهر جمالى افرج الناس عليا واطمع الناس فيا
جمال المراه فى حياءها وعفتها وعقلها وزقها وادبها
وليس فى مفاتن حسدها كده بقت ..........................
مش انسانه لها قلب وعقل وكيان
تحياتى لك ولاء

Doba said...

مش عارفة اقولك ايه
بس هقول حاجة واحدة اتناقشت فيها انا ويحيى قبل كده الا وهى

ان البنات مش بيبقى عندهم وعى كفاية
هما طالعين شايفين الكل لابس اللبس ده وهما بيحاولو بقدر استطاعتهم يبقو كويسين فى المقدار اللى هما مستوعبينه والعيب مع احترامى فى الاهل اللى معلموش يعنى ايه حلال ولبس محتشم وحرام لبس ملزق

كل راع وكل مسئول عن رعيته

لك نيجى بقى للى فرحان بمراته وهيه لابسه محزق وملزق والعالم بتتفرج عليها وبينزل مخصوص يشترى المسخرة دى لبناته علشان يشوفهم امامير يبقى ربنا يرحمنا بقى

سلام يا كبير
هبة

الشنكوتي الكبير said...

ولاء
ايوه يا بنتي بقينا فرجه لأمة لا اله الا الله وياقي الأمم كمان
الناس بقت تفقع المراره مبقاش في حياء جايز الحمد لله لسه فيه طبعا بنات كتير محترمه وملتزمه جدا في لبسها لكن المشكله ان بقى العدد اللي وصل لمرحلة فزيعه هم الأكتر عدديا
وربنا يهدي بناتنا وبنات المسلمين

البنت اللي بتحفظ نفسها عارفه انها جوهره لازم تحفظ نفسها
تسلمي يا ولاء وربنا يحفظك
مين السكندري اللي بيقولك بصفتي جوزك ده يا بنت يا ولاء
ولا ماليش دعوه
ههههههههههههههههههههههه

سلااااااااااااااااااااااام

الشنكوتي الكبير said...

دوبه

انتي ويحي لخصتوا الحل والسبب
العيب في الب اللي سايب بنته تنزل كده والأم اللي علمت بنتها ان مش عيب تعري جسمها
كأنها يعني متعرفش او كأنها معندهاش مانع بنتها تموت فجأه وتتحاسب على العري ده
وياسلام بقى على اللي تبقى لابسه طرحه وبنتها جنب منها لابسه اللي ميتحكيش عنه وتقولك اصلها لسه صغيره هاخنقها من دلوقتي

حسبنا الله ونعم الوكيل

وتعالي اتفرجي على البيه اللي سايب مراته تلبس زي ما تكون هيعرضها للبيع وهو مروح بالليل
كأنه سايق عربيه جديده وبيحافظ على شكلها قدام الناس علشان لو حب يبدلها بواحده تانيه

بقت حاجه تقرف
الناس مسمعتش حديث النبي ان لا يدخل الجنة ديوس وهو الذي لا يغار على عرضه

ربنا يرحمنا يارب

سلامي ليحي ويوسف

سلاااااااااااااااااااااااام

ojg said...

مممممممم

مش أهل وبس
ومش مجتمع وبس
ومش صحاب وبس
ومش فضائيات وكليبات وبس

كل اللي حوالين البنات بيقولهم بليييييييز ممكن أكتر؟؟
والبنات سواء صغيرين ومش فاهمين او فاهمين بس شايفين ان كده هتبقى احلي ولا حد قالها ان كده هتتجوز اسرع ولا اللي بتقلد ماكياج هيفا ودلع نانسي وهلم جرجر

الاسباب بقت اكتر من اننا نحصرها
تعرفوا ان في ايران في بوليس للأداب بس مش مهمته زي هنا تسهيل قلة الآداب
لالالالالا
مهمته انه لو شاف واحده مثلا لابسه لبس مش محترم يبقي في رد فعل مناسب
انما احنا عندنا منتهي التناقض الداخلي والبعد عن المعني الأصلي للدين والحجاب
ده حتى المنتقبات بتلاقي منهن واحده راسمه عينيها رسمه تودي في داهيه
ولابسه عباءة محزقة تحزيقة سودا والاسم منقبة
والمصيبة ان ده خلى اللي مش محجبات يقولوا انهم احسن من غير المحجبات
ليه؟
عشان في امثلة بوظت الموضوع خالص وخرجته من سياق أهدافه
عندي اقتراح اخير:
ياريت نغير اسم البنت المحجبة الحجاب ده ونخليه البنت المتشرأبة نسبة للإيشارب عشان ده مش حجاب خالص ،،، هو كان بيحجب ايه يعني :))

Nani said...

السلام عليكم
هي كده اول حاجه بنمتلكها هي اجسادنا علشان كده هي اكتر حاجه بنستمتع بالتباهي بيها

لفتت هذه الجملة نظري وفتحت عيني على شيء منذ الازل موجود

سمية said...

تصفيييييييق حاااااد ...

بجد يا ريت كل الناس بتفكر زيك ... قصدى كل الرجالة ..

مكنش حد غلب ... و لا كان فيه زوجة غلبت ..

تحياتى لك..

Jade said...

Hey ya shinko
Been a while since I visited...
But found this cool post 3andak.
I dont agree what you said about en el wa7dah 3ayza tekoun bein el benin because heya gowaha akhla2 & 3ayza tedghata bas fe nafs el wa2t 3ayza te7es be gamalha....

I think el moshkela kolaha fe 2en el mogtama3 koloh ghasab el 7egab as a culture & not religion & girls have to wear it whether they believe walah la2 & whether they are convinced walah la2

Ana mesh mo7agaba but I can never wear tight or showey clothes like the mo7agabat elly fe masr...
El 7egab is about zohd el gamal lel ghareeb & te7geb el anzar 3an el wa7dah..,. but what's happening is that girls just do it for society & instead wear the strangest tora7 & the tightest clothes & the flashy make up so people assume that they are mo7tarameen & have strong deen & muslimah...
It's all bullshit fel akher...

W ma3 kol e7teramy le kol bent mo7agabah!

Cheers friend,
J

قطرات من شواطئ الحياة said...

تحليلك رائع و أكتر من رائع كمان بس أيا كان ده مش مبرر خالص
الإنسان دايما في صراع بين قيمه و رغباته لازم القيم هي اللي تكسب و ما ينفعش اللي بين البنين ده اللي بيرضي نفسه بس مابيرضيش ربنا

تحليل متميز

تحياتي لك

كريمان