Wednesday, February 13, 2008

صديق

صديق

عارفين يعني ايه معنى الصديق
يعني قلب كبير قريب
جوه منه تعيش تغني
جوه قلبه تعيش تموت انت حر
اللي جواك تفتحه قدام عينيه
مش تخاف او تنكسف
هو منك وانت منه
جوه عقله تلاقي حل المشكله
جوه قلبه تلاقي حضن يطمنك
وانت جنبه مش تخاف ابدا من الناس كلها
وانت جنبه ترسم الأحلام معاه
مش مهم ولد وبنت
مش مهم النوع يكون مهما يكون
المهم انه صديق جوه قلبك اتكتب
اسمه بحروف من دهب
وفي ملامحه تشوف ملامحك
وفي حكايته تحس انك كل حاجه يحسها بتحسها
كل ما تحكي معاه يسمع كلامك
واما يوم خسيس يقولك انه مش صاحبك
وان من حقك تسيبه
وانه خاين او اناني
وانت عارفه مش كده
شد من جيبك سيوفك
او سلاحك مهما كان
واغرسه في قلب الجبان
اللي قالك كل ده
اوعى يوم صاحبك تسيبه
اوع يوم تغدر حبيبك
اوعى يوم تنسى الليالي السهراني
اوعى تنسوا لما يحكيلك جراحه
شد ازره واسنده
جوه قلبك احضنه
واما يوم يقسى عليك
او يضايقك يخنقك
متقولش غور زهقتني
اصلك انت هيجي يوم وتخنقه
بحكايه بايخه من حكايات الهوى
والبنت ديه تجرحك تيجي تقوله
ودي كمان تستلوحك تجري تقوله
وهو صابر يسمعك
حقه برده تسمعه
حقه انك لما يزهق او يغلس
تصبر انت كمان شويه
وافتكر كل الكلام الحلو عندك
مش تخلي كلامك الحلو لحبيبتك وحدها
خلي حته للصديق اللي شاف وياك سنين هم وقرف
خلي حبه للي شال عنك همومك قبل ما تجيلك حبيبتك تفرحك



كنت عايز اقول بس ان ساعات ناس بتكون في حياتنا بتدخل كده تنط جوه قلبنا مش بقول على الحب والعشق لا في ناس بتكون اصدقاء
والصديق عمله نادره قوي
صعب تلاقي حد يحس بيك من غير مقابل
لما بنحب ونعشق الحب بيخلينا نضحي علشان حبايبنا وده بالغريزه الصداقه بقى حب وتضحيه بدون غريزه يعني حب خالص صافي بدون مقابل طبعا مش صداقات المصالح
احلى صداقه لما بيكون صديقك تحس طيبته في كل كلمه يقولهالك
يعني تحس انه بيكلمك من غير اي كدب او حوارات وياريت لو كل واحد عند صديق يحمد ربنا قوي انه رزقه بصديق زي ده
انا كتبت البوست ده علشان الحمد لله انا فكرت لقيت عندي اصدقاء جمال قوي وجدعان جدا معايا
اتمى فعلا اكون صديق وفي ليهم واردلهم جزء من حبهم ده
تحياتي

17 comments:

لـــى لــــىِ said...

ياسلام ياسلام ياسلام

الله الله الله

ايه الحلاوه دى

ياسلام على الصديق الجميل ده
لما يتواجد فى حياتنا
نبقى محظوظين
علشان خلاص بقوا قليلين
بس لسة موجودين

ربنا يخلي لك صديقك ويكرمكوا يارب

سلاماتى لاحلى شنكت

لى لى

gannah said...

الله على الكلام الجميل اللى يحبب القلوب ويولفها

الآء said...

قد جسدت بكلماتك صورة مثالية ورائعه عن الصديق ولكن للأسف قلكا ما نجدها
تحياتي لك

بت خيخة وأى كلام said...

ايه اللغبطة دى بقى
هو ايه لزومه حكاية المدونتين
وانا كل شوية اعدى الاقيك مش كاتب حاجة جديدة
اقوم اخد بعضى وامشى
واتاريك بتكتب هنا وانا مش واخدة بالى
طبعا انا مش هاقدر اقول حاجة على كلامك
لانه فوق الوصف
تسلم ايدك
اختك خيخة

أنا وهي said...

اه انت جيت علي الوجع انا كان عندي صديقة افتكرتها وفية وهاتشيل عني الاسية
لكن لما حبت نسيت
اني كنت الصدر الحنين اللي كانت بترمي عليه همومها

الشنكوتي الكبير said...

لي لي

صديقتي العزيزه الفنانه
ازيك ربنا يكرمك على الكلام الحلو ده
نورتيني ربنا يكرمك

--------------------

جنه

الله عليكي انتي
شكرا على الزياره
والا ممكن اعرف مين المزه اللي في الصوره دي

هههههههه
نورتيني

----------------

الاء
تسلمي
انشاء الله ربنا يكرمك بصديق يكون اوفى ليكي من اي حد
ربنا يسعدك
--------------

بنت خيخه

مش قادر اكتب واي كلام دي

يا باشا تنوريني هنا هناك مكانك في القلب محفوظ من غير حاجه

تسلمي من كل شر
-------------

انا وهي

لا انتي بقى ليكي كلام كتير
مدونتك تحفه وانا لازم هاعلق عليها بس اصبري لما اجهزلك
ربنا يكرمك نورتيني جدا

سلااااااااااااااااااااام

gannah said...

اجمل كلام سمعته عن الصداقة ...اهنئك

walaa said...

الصداقه هى الشىء الوحيد الدائم
تحياتى
اااه شكرا ليك على الدعوه بس انا والله من اسكندريه ومش ينفع اجاى
ولاء

بنوته مصرية said...

بجد هاااااااااايل
مفيش كلام اقدر اقوله انت قولت كل حاجه

لك كل التحية
رودي

Smartphone said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Smartphone, I hope you enjoy. The address is http://smartphone-brasil.blogspot.com. A hug.

rona said...

فعلا اهم حاجه الصديق وانك تعرف امته ومكانته
انا كنت من غير الصحاب صاحب قلق
وكنت عايش فى الحياة على المفترق
مين اللى قال إنك هتقدر تتنفض
من غير ما حد يشد إيدك من الغرق
وعجبى

doda said...

حلوة اوى الصداقة
واللى بيقدر الصداقة
اكيد انت بتحب اصدقائك جدا وبتقدر معنى الصداقة فعلا
عشان كدة قدرت تكتب الكلام الجامد دة

الشنكوتي الكبير said...

جنه
يا بنتي ارحمينا من صورة الموزه الجامده دي لحسن كده صعب علينا قوي
هههههههههههههه

نورتيني واشكرك على كلامك الطيب
اتمنى تزوريني على طول

-----------------------

ولاء

شكرا ليكي على زوقك
وبعدين يا بختك انك من سكندريه
شوفيلنا اي عزومه عندكم كده واعزمينا

نورتينا
---------------

بنوته مصريه

ايه الأحراج ده بقى

ربنا يسعدك يارب
لكي مني كل التحيه والتقدير
وشكرا على كلامك الزوق

---------------------

سمارت فون
يا عم هو احنا فتحناها محل موبايلات

-----------------

رونا

متشكرين يا ستي على الرباعيه الجامده دي
ولو ان احنا هنيجي ايه جنب مدونتك الفزيعه دي ربنا يوفقك

سلااااااااااااااااام

-------------------

دودا

انا فعلا بحب اصدقائي جدا والحمد لله هم كمان بيعزوني قوي

الصداقه عمله نادره لكن لما تلاقيها بتعرفي ان سبب ندرتها هو قيمتها العاليه قوي قوي
ربنا يحفظك
وياريت يا ستي تبقى من اصدقائي
تحياتي
سلااااااااااااااااااااااااااام

lyssandra said...

إن صديقك الحق من كان معك ..
ومن يضر نفسه لينفعك ..
ومن إذا ريب الزمان صدعك ..
شتت فيه شمله ليجمعك ..


الحمد لله .. عندي صديقه بينطبق عليها المثل : رب أخ لم تلده أم .
أنا عقلها وهيا ضميري .. دا لا ينتقص شئ من عقلها ولا من ضميري .. بس الحمد لله إننا أنا وهيا أصدقاء .. بنغيب عن بعض كتير لكن تفضل هيا عندي في المقدمة بدون منازع .. وأظل أنا الأثيرة لديها ..

أنا تصفحت المدونة بتاعتك ولذيذة جدا ودايما هاكون متابعة إن شاء الله .
شكرا لمرورك بمدونتي وأتمني ماتكونش الأخيرة ..

سلام

lyssandra

MAKSOFA said...

معرفش أحنا في زمن عز فيه الصديق الحقيقي وندر

الشنكوتي الكبير said...

ليساندرا

نورتيني وسعيد بتعليقك
وربنا يحفظلك صديقتك وتسعدي انتي وهيا

--------------------

مكسوفه العسوله

يا بنتي الصديق موجود بس هو عامل زي الزرعه المتعبه عايز مجهود قوي علشان نلاقي البذره بتاعته وبعدين عايز عنايه ورعايه كتير

بس الثمره في الأخر بتبقى اطعم من الشهد صدقيني

وبعدين امال انا رحت فين بقى

سلاااااااااااااااااام

Reham Mahmoud said...

عارف مافيش حاجة اسمها صديق بيحب صديقه
بيحبه علشان مصلحة مش اكتر
نادر قوى لما تلاقى صديق بجد مش فى الدنيا ديه
كلامك جميل جدا
تحياتى
ريهام