Wednesday, June 27, 2007

الفرق بين الجراءه........... والوقاحه


هناك فرق شاسع بين الكلمتين

كثير من الشباب يعتقد ان الفتاه الأن تحب الفتى الجريء وهو امر ليس باغريب فهناك الكثير من الفتيات فعلا تفضل ذلك الفتى المغامر الذي يقتحمها ويسلب قلبها رغما عنها ذلك الذي يشعرها بأنها انثى ناعمه وانه يخطفها الى قلعته ولكن المشكله التي اعرضها انه اولا ليست كل الفتيات تحب هذا النوع من الرجال بعضهم يفضله خجولا وهادئا بعضهم يفضله رزينا عاقلا

هذا جانب من الأمر الجانب الخر هو حتى في حالة ان الفاتاه تحب الرجل الجريئ فللأسف فقد كثير من الشباب حاسة الفهم واستبدلوا فكرة الشاب الجريئ بالشاب الوقح

فبدلا من النظره الجريئه القويه التي كانت تذيب قلب الفتاه وتشعل وجهها بالخجل والحمره الجميله اصبحت نظره مستفزه مقتحمه غاصبه وكانه يريد ان يشاهد منها ما تريد ان تخفيه هناك فرق بين ان تنظر لفتاه فتبتسم في خجل من التقاء عيونكم وان تنظر لفتاه في حملقه غبيه حتى ترتجف المسكينه خوفا او ربما كانت قويه ونظرت لك في احتقار

هذا بالنسبه للنظر هناك ايضا اللأفاظ

يا ناس ارحموني في فرق اني اكون جريئ وافتح حوار مع بنت في حاجه جريئه واخليها تتكلم معايا بدون حرج وتحس اني بحترمها هي دي الجرأه مش اني استعمل الفاظ خارجه امامها واجرح حيائها بلساني اللي عايز قطعه انا لما اهزر مع واحد صاحبي بإيحاء جنسي قدام زميله لينا انا كده هنتها وماحترمتش وجودها حتى لو هي متكلمتش او ماعترضتش لأن هي مش حماره هي اكيد فاهمه قصدك بس حيائها يمنعها ترد تهزاك على قلة ادبك لأن ساعتها الكل هايقول اصلها صايعه وفاهمه كل حاجه

مفيش حد دلوقتي مش فاهم الكل فاهم بس بيستعبط عارفين ليه عشان محدش يتهمه بالفجور

وبعدين الجرأه في الكلام مش معناها اني اتنرفز عليها واجادلها بعصبيه وصوت عالي لازم دايما افتكر انها بنت يعني رقيقه وضعيفه مهما كانت طريقتها لأن حتى اللي تلاقيها صوتها عالي بتكون من جواها رقيقه جدا

غير الجرأه في الكلام والنظرات اكيد في حاجات تانيه كتير

ممكن في المواقف يعني الجرأه تحتم عليك ان لما زميلتك تكون بتمر بظروف صعبه وانت مفيش بينك وبينها كلام او معرفه قويه ممكن تكلمها وتسألها اذا كانت محتاجه مساعده او تحاول فعلا تقف جنبها بجد مش حركات ترسم بيها طبعا

ساعتها هي هتقدر جرأتك وانك كسرت الحاجز عشان تحاول تساعدها لكن في فرق انك تكسر الحواجز عشان مشكله او ظرف طارق وبين ان حضرتك تكسر الحواجز عشان تحشر مناخيرك في حياتها الشخصيه وتعرف اسرارها اللي مش عايزه حد يعرفها

حاجات كتير بنغلط ونحسبها جرأه وهي في الواقع وقاحه

الجرأه شيء لذيذ وحبوب ومطلوبه لكن لازم نعرف نفرق الشعره اللي بينها وبين الوقاحه

انا زمان كنت بحب ابص في عيون البنات قوي عشان انا بعشق جمال العيون وكتير بنات كانت بتفضل تستغرب من نظرتي منهم بتخجل وتدور وشها ومنهم بتتحداني وتفضل تبص ناحيتي ومنهم تتصنع انها مش واخده بالها وتسرق نظرا سريعه

لكن بعد كده سمعت مره كلمه في فيلم اجنبي عجبتني قوي

it's not polit to stare

يعني انه مش من الأدب انك تحملق تبحلق يعني

ساعتها عرفت ان اكيد في بنات كتير قالوا عني اني انسان وقح

وانا اللي كنت بحسبهم دايبين في الشعاع اللي طالع من عيوني

تحياتي ليكم ووحشني الكتابه هنا شكرا يا شاهي على التشجيع

14 comments:

shahy said...

انا قلت الحق وابقى اول تعليق وبعدين اروح اقرا البوست وارجع تاني
سلام مؤقت

shahy said...

انا جيت
كلام جميل وصحيح كل الصحة
واعتقد انك وضحت كويس الفرق بين الجراءة والوقاحة
وياريت الشباب يعرفوا كدة ويرحمونا بقى
انت عارف اكتر حاجة بتضايقني في الموضوع دة
لما اكون راكبة تاكسي والاقي السواق بيبص لي في المراية بيبقى هاين عليا احط صباعي في عينة


تحياتي
متتأخرش تاني

Ehab said...

شاهي
نورتيني يا جميله واديني كتبت اهو عشان بس زعلك غالي عندي
عموما فعلا انا نفسي بقيت بتجنن من الناس واللي بيفتكروه حاجات روشه وجميله وانه كده هايخطف قلوب العذارى
ياريت كلامي يكون مفيد او يتفهم او على الأقل ابقى فضفضت شويه من غلبي
بجد شكرا انك حمستيني اكتب حاجه جديده هنا بقالي فتره مش قادر افكر برومانسيه خالص
تحياتي يا جميله وشكرا على الزياره
سلاااااااااااااااااااااااام
ايه رأيك في القرص والفطير

sosoooo said...

شنكوتي اوتي توتي ،،
انا كان نفسي اكون اول المعلقين بس يلا،، نرضي بالمركز التاني ،، انا معاك في كل كلمة بتقولها ، وقلتلك قبل كده انا بحترم شجاعتك وجرأتك علشان انت بتعبر عن نفسك واللي عاجبه عاجبه واللي مش عاجبه هوا حر، و(انت حر إن لم تضر )، وده بالظبط الي بتعمله في كتاباتك واللي مش عاجبه الكلام ده يارب يطق يموت وفعلا مش كل الجرأة تحترم فيه جرأة سافلة لا تستحق الاحترام
والسلام عليكم ورحمة الله وبركاته
سلامي

Ehab said...

mimi
يا بنت يا ميمي يا سكره انتي خلتيني كده اتغر
عموما يا قمر الكلمتين الحلوين دول ليكي عندي هديه كبيييييييره
عشان انتي حلوه
عموما انا اتمنى فعلا نكون اصحاب جدا
انتي دمك عسل واسلوبك حلو في الكتابه بجد اكيد هانشوف منك حاجات حلوه قوي
تحياتي
سلاااااااااااااااااااااااااام

islamventura said...

انت عارف الكلام اللى انت كاتبه ده انا حاسس انى قولته قبل كدة

بمعنى اخر انا كنت باخشى انى ابص فى عين بنت علشان اجرحها بس بعد اللى باشوفه بقيت اشوف ايه اللى فى عينها جرأة و لا وقاحة

المهم الجرءاة وا لوقاحة
كانت عندى فى الحياة هل الواحد يجب ان يطلب حقه بطريقة كويسة بشكل فى جرأة و ان المشكلة ان فى ناس كتير بتطلب حقها بوقاحة و بتفتكر ان ده جرأة
يعنى غلط فى المفاهيم
بس
بس جميل الكلام جدا


انا فاهم كلامك كويس

MAKSOFA said...

أعجبني البوست كثيرا ، فعلا هناك فارق كبير بين الجراه والوقاحه ، وبين الأقدام المهذب والأقتحام البذيء

تحياتي

emos said...

ana 2aktar 7aga 3agbany fel mawdoo3 ennak fahem ezay tet3amel ma3 el banat

bs wade7 en 7adretak 7'ebra:p

bs post leh weghet nazar bardo
gamil gamil

Anonymous said...

حبيبي
انت

Hesa Hanem said...

و النبى يا خويا لو لقيت واحد بكل المواصفات دى قولى الله يخليك او سيبلى خبر على مدونتى

سلااااااااااام

Doba said...

معنديش غير حاجة محشورة فى زورى ونفسى أقولها - تسلم مامتك وباباك - رغم أنفك - وهبة طبعا - لأنهم نجحو فى صناعة شاب يفتخر الجميع ويتبارو فى أنهم يحوزو على صداقته

يارب يكون عندى القدرة والمقدرة على تربية يوسف بهذه الطريقة وتبقى دماغه عالية وصاحية كده

ربنا يبارك فيك
تحياتى وسلامى --- هبة

Ehab said...

اسلامفنتورا
نورتني يا معلم
ومتشكر على كلامك الحلو ده كله
________________
مكسوفه
انا مش مصدق نفسي انتي منوره عندي يا جميله انا سعيد بزيارتكجدا
نورتيني
_________________
ايموس
نورتي يا قطه بس انتي عارفاني خبره كبيره ومتمكن طبعا ههههههه
وحشتوني كلكم
_________________________
هيصه هانم
اتشرفت بيكي جدا طبعا
واتمنى نكون اصحاب على طول
____________________

دوبه
مش محتاجه اتكلم تاني عن معزتك في قلبي انتي اقرب صديقه بنت الى قلبي
بجد انا اللي فخور بثقتك وصداقتك اكتر ما تتخيلي
تحياتي وحبي واحترامي
سلااااااااااااااااااااااااام

سندباد said...

في امور وعادات تقاليد كتير اتغيرت في الشعب المصري ربنا يرحمنا تحياتي

koukawy said...

في خيط رفيع بين حاجات كتير اوي
العمي لامؤاخذه مش بيشوفوه