Monday, August 6, 2007

الفارسه ....والحصان


عارفين كلكم يعني ايه فارسه ويعني ايه حصان دي حاجه سهله وبسيطه


انما انا المره دي قصدي حاجه تانيه بالأسمين دول انا هاستخدمهم في وصف العلاقه بين اتنين بيحبوا بعض ومحدش يفهمني غلط ويحسبني هاتكلم عن الأوضاع الجنسيه ولا حاجه


انتوا عارفيني مؤدب وبنكسف خالص


انا عايز اتكلم عن العلاقه بين الراجل والست كمشاعر يعني هوصف الست بأنها هي الفارسه والراجل هو الحصان لما تتخيل كده العلافات في مجتمعنا بين اي اتنين هتلاقي ان الراجل بطبعه المفروض ان هو القائد والقوي والشجاع والجامد والحاجات دي كلها ده المفرض طبعا لكن لما تقرب اكتر هتلاقي ان الست ممكن بذكائها وحسن معاملتها ليه يكون مطيع ليها ومحب ليها ويحملها فوق ظهره الى اخر المشوار ويكون سعيد بيها المهم هو ازاي يكون التعامل بينهم وده بيختلف من فتره لأخرى في حياتهم يعني اثناء الخطوبه او الإرتباط غير الرسمي تديله ايه وتقوله ايه تصارحه بمشاعرها ازاي تسمعله ازاي وحاجات كتير بالشكل ده يعني مثلا انا بتخيلها مثلا هي وهو لما بيكونوا لسه في فترة ما قبل الزواج بكل انواعها بيكونوا شبه الافارسه اللي واقفه جنبب الحصان وهو داخل السياج بتاعه ميقدرش يعدي عندها الا لو هي قربت منه ولمسته ممكن كمان هي تفتحله باب الحظيره بتاعته وتخرجه ليها وساعتها تغامر بإن الوحش جواه يا اما هيحبها قوي فمش هايأذيها او يمكن طبعه الغالب كحيوان غير عاقل اما يهاجمها بعنف او ممكن يجري ويسيبها برده البنت لما بتحب حد وتكون العلاقه بينهم في ايدها هي اللي تحكم ايه اللي يقدر ياخده منها وايه اللي مينفعش دلوقتي ويا ترى هتثق فيه لدرجة ايه برده ساعات الفارسه بتحب تقرب هي من حياته اكتر فتلاقيها بتروح معاه اماكن بيحب يرعى فيها وتعيش معاه الجو اللي هو عايشه بس ساعتها الخوف انه ممكن يجرها معاه لأماكن مينفعش هي تخوض فيها وبتكون هي المسؤله عن اللي بيجرى ليها برده لما تعدي المرحله ديه ويبتدوا يدخلوا في مرحلة الزواج وتاخد السرج في ايدها ويكون ملزم انه يشيلها فوق ضهره ويمشي بيها في الدنيا ممكن هي تخليه من غير سرج ولا عصايه يحافظ عليها ويحميها لو قدرت تخليه يحبها فعلا لكن ده مش معناه انها تقولي اصلي بثق فيه وعشان كده مش بش السرج نهائي لأ انا عايزك تسيبي السرج خالص وتقفشي في شعره وخصله اللي على رقبته عايزك تتبتي فيها بإيدك وسنانك لأن زي ما هو محتاج يحس انك مش بتقيديه بسرج جلد لازم يحس انك متمسكه بيه قوي ومفيش حد يقدر يخطفه منك ابدا بس الفرق انك بتحسسيه بده بصوره حميميه اكتر من السرج والكرباج وده اللي محدش يعرف يظبطه غير الست الذكيه اللي تعرف الفرق بين انها تمسكه من السرج وتخنقه وبين انها تتشبث بشعره خصله الناعمه ومتسيبهوش ابدا


برده لما نبص علىيهم وهما ماشيين في دنيتهم لازم تميل دايما عليه تديله السكر اللي بيحبه وتوضبهوله وتخليه شبعان منه دايما عشان ميميلش لفارسه تانيه معندهاش حصان وبتحاول تسرق حصانك وكل واحده وطريقتها وبرده حكاية السكر دي بتختلف في فترة قبل الزواج عن فترة بعد الزواج قبل الزواج ممكن تقرب من السور وتحطهوله على ايدها وممكن تسيبهوله على السور من بعيد زي ما هي عامله حدود للعلاقه لكن بعد الجواز المفروض حضرتك تديله السكر من شفايفك على طول عشان ده جوزك مافيهاش حاجه يعني لأن القبله بتقرب قوي العلاقه بين الزوجين اوعي تفقديها خليكي دايما متعوده تديله قبله على خده من وقت للتاني كده وهو خارج وهو قاعد معاكي قدام التلفزيون حسسيه انه لسه عايش ايام الخطوبه لما كان هيموت على البوسه دي وحسسيه انها دلوقتي ملكه ومن حقه يتمتع بيها


حاجات كتير ممكن اقولها عن الشبه بين علاقة الفارسه بحصانها وعلاقة الست بحبيبها


بس في النهايه عايزك دايما تفتكري انه حتى لو كان حصان وجعلك سيدته لازم تحسسيه انه هو اعظم حصان في الدنيا


تحياتي الى احبائي


سلااااااااااااااااااااااااام

20 comments:

Doba said...

جميلة قوى يا ايهاب - البوست حقيقى متميز وتشبيهاتك حلوة - يارب كل فارسة تتعلم ازاى تتعامل مع الحصان بتاعها - الحصان حقيقى زى مبيحب يلعب مع صاحبه بيحب برده من آن لآخر انه يوريله مدى قوته وسرعته ودهائه ولازم الفارسة تعرف كيف تتعامل جيدا معه

تصدق تشبيه الحصان ده جميل قوى - والحصان اساسا مخلوق جميل وفى غاية الابداع والكرامة والدلال

اوعى تغيب عننا تانى - حقيقى كل بوستات علشان نبقى اصحاب متميزة جدا جدا - تحياتى يا شنكوتى

سلالالالالالالالالاموز -- هبة

قلوب حائرة said...

ايه ياعم التشبيهات اللي فيالجون دي تشبيه تحفة والغرض اللي مقصود من وراه اتحف بجد موضوع شيق وياريت ناخد بالنا من كلمات مابين السطور علشان في تنبيه هام قوي لااي بنوتة تحيايتي ليك ياايهاب وللامام

الشنكوتي الكبير said...

دوبه
الله يكرمك يا جميله وتسلمي على تعليقك الرقيق ده اخجلتم تواضعنا
بجد حسيت ان فيه تشابه كبير بين العلاقتين وحاسس اني مش وفيت الموضوع حقه لكن انا هاسيب الناس تكمل الصور بنفسها
سلااااااااااام
_____________________
قلوب حائره
هبهوب عزيزتي
ربنا يخليكي يا قمر على تعليقك الجميل ده وعموما اتمنى الناس تفهم قصدي باللي بين السطور
وياريت الناس كلها تحس كلامي وتفهمه
سلااااااااااااااااااااام

shahy said...

ماشاء الله

انا عندي زهول من وصفك ودقتة ويمكن دة اكتر بوست حلو انت كتبتة في المدونة دي ويارب البنات كلها اللي تقرا الكلام دة تنفذة

صحيح هاتبقى الحياة الزوجية ليها شكل وطعم تاني

الله يبارك فيك ويجعلة في ميزان حسناتك

انا عاوزة اعرف بتجيب الكلام دة منين؟

على فكرة الحصان بيحب الجزر اكتر من السكر بس الحصان اللي بتتكلم علية اكيد بيحب السكر اكتر

تحياتي يا عبقري

الشنكوتي الكبير said...

شاهي
ربنا يكرمك انا متشكر على زوقك يا جميله
اتمنى بجد تكون عجبتك
نورتيني
سلاااااااااااااااااام

shahy said...

عجبتني طبعا جدا

ولو مش عجبتني كنت هاقول على طول

NeRmeeN said...

انا متابعة مواضعيك هنا يا شنكوتى ...بس بما انى بنكزف اعلق على المواضيع الرومانزو دى :ي فبكتفى بالقراية ..لانى مش بعرف اعلق اقول حاجة ولو علقت بيبقى اى هبل مش بعرف اقول جملة مفيدة:ي بس بصراحة الموضوع المرادى جامد اوى ..وخصوصا انك اتكلمت عن الحب بشكل واسع اوى ..يعنى مش مجرد اتنين بيحبوا بعض و خلاص ..لا كمان رسمت شكل الارتباط بينهم المفروض يكون ازاى سواء فى فترة الخطوبة الو الجواز
بس عموما يعنى ايه يضمن الست ان الحصان بتاعها ده اول ماتشيل عنه السياج و تحسسه بحنانها وتأكله السكر زى ما انت بتقول انه يتمرع و ياخد فى نفسه قلم و يرميها و يشوف فارسة غيرها
أصل الحصنة قلبها كبير اوى :ي وعلى رأى المثل القلب زى الدكان الكل ليه مكان
يعنى من الاخر كده انا شايفة مع احترامى لكل الحصنة انهم لما بيدلعوا و بيتعاملوا كويس بيغدروا وبيدوا الفارسة فوق دماغها

فهنا ادامها حل من الاتنين..يا الفارسة ماتركبش حصان خالص..يا تركبه بس ماتشتلش اللجام ولا السياج
معلش طولت عليك

تحياتى

الشنكوتي الكبير said...

شاهي
ربنا يخليكي يا عسل وانا سعيد جدا ان الموضوع فعلا عجبك بجد متشكر على تشجيعك وسعيد جدا بصداقتك
نورتيني
_______________________

نرمين
يا قمر انتي تكتبي اي حاجه تبقى منك سكر مش معنى انك تكتبي كومنت عندي انك لازم تكتبي حاجه قويه كفايه عندي اني احس ان كلامي عجبك وعجب كل اللي قرأه بجد سعيد بكلامك جدا
اما حكاية انه ممكن يتمرع فأنا مش هاجادل واقول اننا طيبين وكويسين انا معاكي ان الراجل فعلا ممكن عينه تتعلق بأكتر من واحده لكن صدقيني قلبه بيفضل دايما ملك لواحده بس وبخصوص انها تسيبله اللجام فيهرب ويزوغ على حد غيرها انا برده قلت انها تقفش في خصلات شعره قوي عشان متقعش من على ظهره وهو بيجري في عز عنفوانه ولأن لما تمسكه من شعره مش بس هتبقى مالكه زمامه زي السرج لكن كمان هو هيحس بلمستها وهتفضل مشاعره فاكراها طول الوقت لأن مفيش حاجه تفصل بينهم
اتمنى تكوني فهمتي قصدي
واتمنى فعلا نكون اصدقاء دايما كده وتنوريني على طول
نورتيني يا قمر
سلاااااااااااااااااااااااام

shahy said...

واد يا شنكوتي
انا شوفت تعليقك عند ميراج
وجيت علشان اقولك
ان صاحب جبهة التهييس الشعبية
دي مش راجل دي نوارة بنت احمد فؤاد نجم
فضختنا ياعم

سلام

الشنكوتي الكبير said...

شاهي
طيب يا جدعان مش كان حد يخبطني ولا يقرصني بدل ما انا عمال اعك واتكلم معاها على انها راجل
عموما كلامها كان اجدع من مليون راجل وياريت هي تعذرني وتسامحني
شكرا يا شاهي على اهتمامك
ربنا يسعدك
ابقي قوليلها متزعلش مني
سلااااااااااااااام

Antony said...

حلو البوست اللي كتبته يا عمنا ، بس أنا بتمني معاك كل اللي أنت بتتمناه في البويت ، ولكن مش من اليت بس ، لأ ... من الراجل برضه ، لازم الراجل يراعي الست ويحافظ عليها ويحسسها أنها كل شئ في حياته ، فيه راجل يبقي بيحب ست أوي لكن يحسسها دايماً أن فيه عنده اللي أهم منها ، وده أكبر غلط ....، وفيه راجل يقول ويمني من الست أنها تعمل معاه اللي انت بتقوله ومايشوفش نفسه ، طب ماهو ممكن مايكونش هو برضه بيعمل كده ، واللا الست المفروض تعمل ، والراجل مايعملش ، لزم الإتنين يستحملوا بعض ويفهموا بعض بنفس القدر من غير تعالي من حد علي حد علشان الدنيا تمشي
ممكن يكون رأيي غلط ، بس أنا مقتنع بكده

سلام يا عمنا ، وبلاش تغيب كتير علشان خليت الناس تدور عليك بعربية كاروو

الشنكوتي الكبير said...

antony
تسلم يا ابني على الكلمتين دول انت بتقول اللي كان على بالي مينفعش الحمل يترمي على واحد بس الموضوع معتمد على الأتنين بس انا كنت عايز اركز المره دي على ان الست في عندها حاجات تقدر تعملها بيها تحل مشاكل كتير وتمنع مشاكل اكتر من انها تحصل اصلا بس مش معنى كده ان الراجل يشيل ايده خالص
عموما نورتي وسعيد بيك جدا مش عارف انت هتعمل مدونه امتى يا واد عشان اعرف اتكلم معاك واعرفك اكتر
سلاااااااااااااااااااام

Hesa Hanem said...

hhhhhhhhhhhhhhhh
mashy
bas ana law fe3lan faresa 3omry ma ha3aml 7osany ella bel korbag:D

Yahia said...

الموضوع جميل فعلا بس محتاج أسالك سؤال: هو انت متجوز ؟ طبعاً معنديش عروسه ليك بس الكلام ده طالع من واحد عنده خبرة كبيرة جدا بالحياة الزوجية وفعلاً لو يتنفذ صح ينفع الطرفين بس ده لو.....

تحياتي

الشنكوتي الكبير said...

هيصه هانم
ليه بس كده حرام عليكي القسوه اللي انتي فيها دي بس على العموم لو بيحبك قوي هيستحمل بس متضغطيش قوي لحسن الحصان ممكن يهرب ويروح يدور على فارسه ارق واحن
سلاااااااااااام

__________________________

يحي
نورت يا باشا وتسلم على التعليق انا لسه مش متجوز بس انشاء الله هاتجوز امال يعني هافضل كده
هههههههههههه
سؤالك ده اتسألته قبل كده بس الفكره اني بتكلم من واقع الحياه اللي بشوفها بين الناس
لأني بحب اسمع كتير بالتالي بعرف حاجات كتير
نورتني
سلااااااااااااااام

shahy said...

اية دة
يحيى سألك نفس السؤال اللي سألتة لك
ههههههههههههه
انت اكيد متجوز ومخبي علينا

الموضوع دة هايل بس عاوزين حاجة كمان جديدة بلاش كسل
والا انت عاوز تكتب بعد رمضان؟
كل عام وانت بخير

kafrawy said...

الستات

دى عاملة زى طابع البوستة


كل ما.... يلزق


اللة يرحم ايامك

يا سى السيد

الشنكوتي الكبير said...

شاهي
يا عزيزتي هاكتب انشاء الله من عيوني
وبعدين لازم اتقل عشان الناس تستنى على نار
بس يا خوفي يضربوني بالنار
سلااااااااااام
____________________

كفراوي
يا باشا نورت المدونه كلها
بس يعني بلاش تحبط فيهم كده لحسن يزعلوا وخليك فاكر ان منهم اخواتنا وبناتنا وزوجاتنا في المستقبل
نورت يا باشا
تحياتي
سلاااااااااااااااااااااام

Soooo said...

ليه كده بس يا شنكوتي
مانت كنت ماشي كويس
ليه بس كده
مانت كنت كويس
مطلعنا حصنه والستات يركبونا برضه يا ابو الشناكيت
!!!!
بهزر معاك طبعا وانت عارفني .. بس في المجمل
كلامك في الجون والله يا شنكوتي
بس هرجع وانصحك تاني برضه
هاتلك موبيل ثري جي

الشنكوتي الكبير said...

sooo
يا صديقي ما هم كده كده هيركبونا غصب عننا يبقى يركبونا وهم فاهمين احسن علشان ميتعبوناش نورتني يا زوق
وعموما الظاهر معاك حق الثري جي ده جامد قوي
سلاااااااااااام