Monday, September 10, 2007

زوجتي العزيزه كوني عشيقتي







عزيزتي هل تعرفين الفرق بين ان تكوني عشيقتي وان تكوني زوجتي
الفرق عزيزتي كبير
ده كلام ممكن يقوله واحد متجوز لمراته وهي بتسأله ليه بيخونها مع واحد تانيه ايه اللي خلاه يدور على اللي عندها مع حد تاني هي جميله وتقدر تعمل كل اللي التانيه بتعمله بس هي دي المشكله انها تقدر اه لكن تعمل لأ
نعمه كبيره مبيقدرهاش المتزوجون انهم يقدروا يعملوا كل اللي بيعملوه مع عشيقاتهم لكن مع زوجاتهم كل واحد يقولك اصلها بتديني اللي مراتي مش تقدر تعمله لأ يا اخويا حاول مع مراتك وهي هتديك نقطه كمان ان الراجل في حاجات عايز يعملها مع مراته يجري في الشارع ينزل البحر معاها يتمشوا في حته فخمه لكن هو عارف انه لو عمل كده هيغير عليها من نظرات الناس هيخاف عليها وكرامته متسمحلوش بحاجات كتير يقدر يعملها مع العشيقه بدون اهتمام بأن حد يعاكسها او يبصلها نظرة احتقار هو عارف ان دي مجرد نزوه مش هتمس كرامته وده غباء طبعا بس هو ده اللي بيحصل انا عايز اتكلم عن الموضوع من ناحيتين الزوجه من ناحيه والزوج من ناحيه نبتدي بالسيدات طبعا
هتلاقي الست ايه اللي بيمنعها انها تعامل الزوج كأنه عشيقها وطبعا في ستات مش محتاجه توصيه بتدلع جوزها كأنه عشيقها واخر تمام بس انا عايز الناس التانيه بقى اللي تقولك مثلا يعني ايه يقولي ارقصيلي شويه هو انا جاريه ولا عبده عشان اعمل كده وليه تعتبريها استعباد وليه تبصيلها كده مش احسن من انه يقعد جنبك يبحلق في هايفاء ولا اليسا ويقول في نفسه يا بخت جوزها كتنا نيله في حظنا الهباب ويروح مع اصحابه سهره حلوه بالليل تجيله البنت المضيفه تقوله تحب ارقصلك وترقصله وتعمله كل اللي هو بيتمناه ويطلع لها20 جنيه يا سلام كل ده بعشرين جنيه يا بلاش
مع ان مراته ممكن تكون اجمل الف مره وممكن تكون بترقص حلو قوي في افراح حبايبها لكن قدام جوزها يبقى عيب وازاي يعني ده غير اللي بتعتبر الرقضص كله على بعضه كده نوع من قلة القيمه ما علينا مش بس الرقص حاجات كتير ممكن الراجل يتمنى ان زوجته تعملها معاه بس بيخاف يقولها عشان هي ممكن ترد عليه باستهزاء فيه برده ستات تقولك بس اصل انا اتكسف اعامل زوجي كده يقول عني ايه مش متربيه الله يخرب بيت التربيه عشان تستريحوا لو كنا بنتربى صح كنا عرفنا ان العلاقه بين الزوجين فيها كل حاجه متاحه امال زوجين ازاي تلاقي برده بعض الستات تقولك اصل انا عارفه جوزي مش بيحب الحاجات دي يعني الدلع الذايد والهزار الكتير لا يا ستي بيحب قوي كمان بس انتي جربي وكمان اللبس اللي بتلسه الست كلنا عارفين امشهد الشهير الأم يوم الخميس لابسه وحاجطه مكياج وحاجات كده بتلمع والأطفال مستغربين هي ماما عامله كده ليه طبعا ده يوم في الأسبوع ولأنها مش متعوده على انها تحط في البيت بيكون الشكل غريب حتى على زوجها المهم انها بتحاول لكن مره بعد مره العيال بتكبر ومينفعش يشوفوها كده اكيد هيفهموا طيب والحل نقضيها من غير مكياج ولا لبس لذيذ عشان العيال اله يسامح العيال المهم انها بتفقد حاجات كتير بتقدمها العشيقه اللي دايما لابسه وعلى سنجة عشره طبعا مش بقول سيبي البيت والعيال والدنيا تضرب تقلب واقعدي لابسه قميص نوم يهبل لأنه اكيد هيتخض من منظر الشقه المتبهدل ومش هايشوفك اصلا من المزبله اللي في البيت لازم التوازن مش عارف ازاي لكن اكيد في حل شوية تعاون بين الأتنين والأمور هتمشي
نيجي للراجل اللي هايموت كل ما يشوف واحده في الشغل شيك وبتضحك وبتتكلم بجرأه كده ويقولك دي لذيذه وجدعه قوي لكن تعالى شوف مع مراته لو نطقت بكلمه في قعده عامه كده او عزومه عائليه والكل اتلفت يضحك معاها ويعاكسوها زي ما هو بيعمل مع زميلته تلاقيه عايز يلبسها الحله اللي قدامه وعمال يطلع نار من مناخيره طيب ليه ما هي كمان لذيذه اهي وبتعرف تهزر لكن طبعا عيب دي مراتي يا كلاب هي دي المشكله احنا عايزين الست الجدعه اللذيذه بس ميكونش على حسابنا احنا اي واحده بره اشجعها قوي لكن مراتي بتاعتي لوحدي ساعات بيكون معانا حق لأن المجتمع اصبح سافل جدا واي ست بتكون متفتحه شويه الرجال فورا يبدأوا يفكروا يا ترى يجي منها ولا محترمه والتظبيط والتسبيل يشتغل وده يعمل فيها ابو التحرر والتقدميه وده يناقشها ويبدي اعجابه بذكائها اصل الرجاله خلاص عرفت ان الست زي ما بتحبك تمدح جمالها تحب اللي يمدح ذكائها وخصوصا لو كانت جميله وشبعت من المعاكسات ومجاملات الناس عن جمالها جسديا المهم
الخلاصه من الموضوع ياريت كل زوجين بقدروا ان هم عندهم نعمه جميله قوي انهم يقدروا يستمتعوا ببعض لأقصى درجه وبدون اي تدخل من المجتمع ولا قيود يعني اللي يقولي اصلي مع عشيقتي بنستمتع باللحظات اللي بنهرب فيها من الناس ونخطف لحظة سعاده من عمر الزمن هاقوله اتنيل يعني تخطف لحظة سعاده مسروقه ومن جواك ضميرك بيتألم وبتفكر يا ترى ربنا هيعاقبني ازاي ولا تقضي العمر كله في سعاده محدش يقدر يفتح حنكه بكلمه واللي هايتكلم عن انك ازاي حاطط ايدك على كتف مراتك وحاضنها على الكورنيش او ازاي قاعدين في المطعم وميلت على ايدها بوستها حد ليه عندك حاجه دي مراتي يا ولاد الكلب

اتمنى كل زوجين ستمتعوا بنعمة ربنا عليهم
سلاااااااااااااااام

23 comments:

Doba said...

والله والله انا بسقفلك
ماشاء الله عليك وحقيقى باتمنى يا ايهاب انك تتنيك بهذا الفكر لبعد الزواج وتعامل زوجتك كما ينبغى ان يكون

ولتعلم أيها الرجل انه كما لك من حقوق فعليك الكثير والكثير من الواجبات

بجد يا بحييك على بوست مميز للغاية يارب يقدر كل رجل انه يعمل مع نفسه وقفة جامدة ويعيد التفكير فى زوجته وان كل زوجة تقدر توازن جيدا بين بيتها وابنائها ومستلزماتهم وتعى جيدا متطلبات الزوج والحبيب والعشيق ولتعلم ايضا بأن زوجها ما هو الا ضيف يأتى لبيتها كل يوم لبضع ساعات فقط فينبغى ان يجد فى هذه الساعات الراحة المطلوبة بدلا من ان يبحث عنها بالخارج

تحياتى وامنياتى بكل التوفيق
ويارب نفرح فيك قريب انت و....بنت شبرا - ماشية معاك يا عم

والله يا واد وعرفت تنقى - والله يا واد خدت الشحرورة هههههه

سلام - هبة

Doba said...
This comment has been removed by the author.
shahy said...

فظيع جدا
انا كنت معجبة قوي بالبوست بتاع الفارسة والحصان بس البوست دة جاااااااااااااااامد موت موت

الله ينور عليك وعلى دماغك

اية ياعم الخبرة دي كلها دة انت تحفة ربنا يسعدك ولما تتجوز ياجميل تقدر تنفذ كلامك

بجد بجد كلام في الجون
بس لو كنت كبرت الخط شوية كنت ريحتنا انا عيني وجعتني

بارك الله فيك
ويارب كل اللي يقرا البوست دة يستفيد منة وحياتة الزوجية تبقى احسن ولو كان مش متجوز يبقى يحفظ كلامك كويس لغاية لما يتجوز وينفذة

وكل دة هايبقى في ميزان حسناتك ان شاء الله

تحياتي تحياتي تحياتي

قلوب حائرة said...

استشاري يا اخواتي في العلاقات الزوجية باشا يا يا ايهااااااااااااااااااب باشا يا بختها ربنا يكرمك يارب وبقالك فترة الله اكبر في عيني الواسعة عليك بتكتب مواضيع في الجون اقولك اشوفلك شغلانة عندي في قسم المراة وتبقى اول راجل مسك قسم المراة هههههههه سلامي ليك ياهوبة وكل سنة وانت طيب وبلغك الله رمضان

Anonymous said...

يا ايهاب باشا عنينا يا بني كبر الخط شويا ابوس ايدك " قلوب حائرة "

فى القلب said...

واللهى كلامك فى الصميم
فعلا صدقت ويسلم عقلك وكلامك و فكرك

GameCanvas said...

really nice words....

الشنكوتي الكبير said...

هبهوب
وبلاش دوبه عشان خاطر يحي
الله يكرمك وتسلمي على الكلام الحلو ده كله وياريت زي ما قلتي كل الناس تعرف واجبتها عشان تعرف تطالب بحقوقها
ربنا يسعدك ويبارك فيكي عقبال ما نشوف مدونة يوسف ابنك يا رب
نورتيني

__________________

شاهي
يا عزيزتي الله يسعدك وتشكري على التشجيع ده كله انا يا بنت هاعملك كارنيه عضويه عشان انتي دايما مشجعاني كده
ومبروك على مدونة الشنيور ابنك

________________________

قلوب حائره
وحشتينا يا غايبه
فين ايامك يا عم يا بتاع واحشني يا غايب يا اغلى الحبايب
ربنا يسعدك ونفرح بيكي قريب وبخصوص موضوع المجله ايدي على كتفك ياريت
وانا مستعد اجي من بكره
هو فيه احلى من قسم المرآه
ههههههههه
نورتي يا سكره
سلااااااااااااااااام

الشنكوتي الكبير said...

في القلب
الله يكرمك وتشكري على الكلمتين الحلوين دول ياريت تكوني صديقه دائمه وتنوريني على طول
______________

game canvas
يا عزيزي تسلم على مرورك وتشريفك عندي مدونتك جميله قوي
هتلاقيني هناك
سلااااااااااااااااااااام

truelove said...

انا موجودة يا ايهاب بس الله اختك مطحونة في الشغل وربنا الي يعلم يالا بقى اديني بشوف غلاوتي شويا يالا بقى سلامورز بتاعت هبة

فى القلب said...

يا مان عملت معايا
أحلى واجب وأهتمام
فعلا زوقك عالى وكبير قوى ويا بختها فعلاً

أنا رديت على كل الواجب ألى عملته
وياريت تقراء التاج بتاعى فى المدونه لانى كاتبه كل حاجه عنى


صدقتك جميله و رائعه يا مان

الشنكوتي الكبير said...

true love
يا ستي ربنا يكون في عونك ويوفقك ومتنسيش تكلميلنا الجماعه عندك في المجله عشان يعينوني امسك قسم المرأه
وبعدين هو انتي لسه عايزه تعرفي غلاوتك اطمني يا ستي انتي غاليه عندنا كلنا
سلااااااااااااااام
____________________

في القلب
يا ستي انتي اسم مدونتك في القلب وانتي بقيتي صديقه في القلب كمان نورتيني وسعدت جدا بيكي وعموما انا قرأت التاج وحطيت كومنت خلاص عليه وبعدين لا واجب ولا حاجه مدونتك عسوله خالص يا ستي وعجبتني فعلا
تحياتي يا صديقتي الجديده
سلااااااااااااااااااااام

hesa hanem said...

ehhhhhhhhhhhhhhhhhhhhhhh
3azama 3la 3azamaaaaaaaaaa
Allah yebarek fik yabny bas etgad3an kda
ashofak ya rab fy bet el 3adal
w neshof kol klamk da hataba2o wla la2
ana 3agabny el klam bas ana mabyethaya2leesh eny momkn a3ml ay 7ga men elly enta 2olto da kolo law ana msh la2ya tashgee3 men elly 2odamy
el 5atwa el 2ola dayman beteb2a lel ragel msh lel set
salamo leek ya shankotyyyy ya kebeeeeeeeer

MAKSOFA said...

تعرف ليه العشيقه بتكون أفضل عند الرجل لسبب بسيط جدا لأن مافيش أي التزام من الرجل تجاه العشيقه ، لكن في الزواج ألتزام ومسؤليه
والراجل بيحب يكون حر طليق يخلع في الوقت اللي عايزة ومايحس أنه مربوط من رقبته ، علشان كده العشيقه عنده أحسن ، لكن برغم كل شيء ومهما بعد الرجل عن زوجته أو تحدث عن سلبياتها الا أنه في النهايه يعود لينام علي سريره بجوارها ،والزوجه دايما هي اللي بتكسب ، وصدقني العشيقه أمرأه مخدوعه في زوج ندل بيحب نفسه فقط
وحا يخلع منها عاجلا أم أجلا

الشنكوتي الكبير said...

هيصه هانم
كيف حالك يا سكره وبعدين يعني هو لازم كل مره الراجل يبتدي الأول اشمعنى في دي مش بتقولوا ان السيدات اولا
عموما ماشي يا ستي يبتدي هو تبتدي هي مش المهم بين الزوجين مفيش فرق
نورتيني وكل سنه وانتي طيبه يا جميله

____________________

مكسوفه

نورتيني ووحشتيني موت موت يا جميله
وحشتني تعليقاتك الحكيمه يا سكره
كل سنه وانتي طيبه الأول
اما عن ردك فأنتي جبتي الكلام اللي في الجون صح اولا فكرة الألتزام هو ده اللي انا قصدته ان مع زوجته هو ملتزم بيها عشان كده ميقدرش يتجنن معاها في الشارع لأنها على اسمه لو حصلها مكروه هتبقى مسؤليته اما العشيقه فدي بتكون مش مهم اللي يحصلها لأنها مش مسؤليته هي تشيل نفسها
وبالنسبه لفكرة انه لازم هيرجع لزوجته مهما لف بعيد ده حقيقي لأنها مهما قال لعشيقته انها منفذه للحياه والسعاده بتظل بالنسبه ليه مجرد نزوه تنتهي بعد ما يتزوقها ويزهق منها
تحياتي يا سكره على التعليق الجميل
نورتيني
سلااااااااااااااااااااام

wa7dania said...

البوست جميل
رغم إنك شوية عنيف فيه
: )
لكن الفكرة نفسها رائعة ونبيلة
ربنا يهني أيامك و يوفقكم إن شاء الله للخير
منى المحمودي

الشنكوتي الكبير said...

wahdanya
منى المحمودي يا صديقتي احيانا لابد من الصراخ وبعض العنف لكي تصل الفكره انا لا ادعو الى الهمجيه طبعا بس اتمنى الناس تفوق من حاجات كتير بنضيعها بفكرنا المتلخبط
عموما نورتيني
سلااااااااااااام

wa7dania said...

عزيزي أنا مش قصدي إنك عنيف في الفكر
أنا قصدي عنيف في اختيار بعض الكلمات
: D
آسفة والله أنا متفهمة كلامك جدا
بالعكس كمان حاباه
بس لفت انتباهي إنك متغاظ من شوية رجالة كده
صح ؟؟
منى

Soooo said...

والله يا ابو شنكوتي يا اخويا .. الجواز ده عامل زي البطيخ .. يا اما مراتك تطلع حمرا .. قصدي تطلع ست بيت حلوة .. يا اما وليعوذ بالله وليعوذ باللهه ياخويا .. تطلع انت اكثر انوثه منها
لكن في المجمل .. البيت السعيد هو اللي مابيدخلش فيه الزوجين غرفة النوم وهم متخانقين او زعلانين مع بعض
وربنا يهدي كل البنات والستات وكل الشباب وكل الرجاله
ونصيحه يابو شنكوتي من اخوك سوووو .. هاتلك موبيل ثري جي .. ونفض لحوار الجواز

الشنكوتي الكبير said...

sooo
يا سو يا اخويا تفتكر يعني الثري جي ده حلو يعني اكتر من الجواز
لا يا عم انت بتضحك عليه هو فيه احسن من الستات الحقيقين مش اتفرج عليهم واتحسر في الثري جي
لما يعملوه مجسم ابقى قولي اشتريه
سلاااااااااااااااااام

Jade said...

Eh ya Shinko ya kebeer???

Ro7t fein?
I havent seen you in a long time. I like this post a lot by the way - damak khafeef w gebt el mofeed.

My only comment is that why dont you use comma (,) or full stop to make your words more expressive. When I am reading I am lost in one long sentence - mesh adra akhod nafasy... try to use them & use space between paragraphs & ideas & your writing will be more enjoyable than it already is.

Leek wa7sha wallahi...

Kol sana wenta tayeb...

الشنكوتي الكبير said...

Jade

My dear friend jade I know that it's a long time since my last comment but you know it's Ramadan and time is full of thousands things to do and between me and you every time I open your blog and see this girl with the pretty naked legs I can't go on.
So I decided to wait until Eid and review all the posts that I'm dying to read. I miss it so much and you are sure how much I like your blog. Any way you have my word I'll come and read all the posts I missed and give you my comment. I miss so much and I'll see you soon
Thankes for your advise you know that my teacher told me the same comment back at school but I couldn't fix it I'll try to use your advice thanks dear for your concern.

koukawy said...

جميل بوست جميل جدا برافو عليك
و بهذه المناسبه السعيده خليني احكيلك عن راجل و ست قرايبنا
لراجل فل ورا الست اتحجبي اتحجبي اتحجبي
و يحبط فيها و يحبس فيها وب عد ما كانت فرفوشه وا نتوكه
بطلت تضحك عشان بيتايق بطلت تلبس عشان بيتضايق بطلت كل حاجه عشان خاطره ،رجع بعد كده يقولها ايه ده انتي كئيبه و شكلك خدامه انا اخدك و اخرج ازاي ما ينفعش انتي تعريني
و بقي يخزنها مع ستات فيهم الحاجات اللي هو كان بيرفضها في مراته