Tuesday, April 28, 2009

لما هنموت مين هيفتكرنا


رحيل الملحن ونقيب الموسيقيين المصريين حسن أبو السعود

العنوان ده لو دخلتم هتشوفوا خبر وفاة الملحن حسن ابو السعود

جايز انا معرفتهوش شخصيا لكن مش شرط اننا نكون عارفين حد بصوره شخصيه علشان نزعل لما يتوفى او نفكر في حاجات كده تيجي على بالنا لما نقرأ الخبر

اللي عايز اقوله وبأختصار اني لما قريت الخبر وقريت اللي مكتوب في الموضوع عنه
المقال حاول يلم - في عدد محدود من السطور – قصة حياة واحداث عمر بني ادم عاش وسط الناس طول عمره معروف ومشهور شاف ناس كتير وعرف ناس كتير ناس حبته وناس عرفته
الله اعلم باللي في قلوب الناس
لكن الغريب اني فكرت في نفسي هو عمر البني ادم كله ينفع يتحكي في صفحه واحده كده
غريبه جدا
مع ان انا متأكد اننا لو قعدنا معاه وسالناه عن نفسه علشان يحكيلنا حياته وذكرياته اكيد هيحكي الف حكايه عاشها في سنين عمره الله يرحمه
لو قعدنا مع الناس اللي اشتغلوا معاه اكيد هيحكوا عنه كتير وليهم معاه ذكريات كتير
لو قعدنا مع اصحابه القدام اللي كان عازمهم يوم وفاته عنده في البيت اكيد ليهم الف ذكرى حلوه والف ضحكه والف موقف رجوله يحكوا عنه
لو قعدنا مع اولاده هيحكولنا عنه ايه ذكريات طفولتهم وشبابهم وحياتهم كلها معاه
,لو قعدنا مع زوجته هتقول لنا عنه ايه, هتفتكر كام ضحكه بينهم ,هتفتكر كام كلمه قالهالها, كام مشكله عدت عليهم وعدوا بيها سوا كام حكايه عرفوها وشافوها
كل واحد عرفه في حياته اكيد شاف جانب من حياته اكيد عرفه وحبه بطريقته وباسلوبه
اللي اعرفه انه كان شخصيه مرحه وطيب حتى ملامحه كده فيها حنيه وطيبه
اللهم اني لا اذكي على الله احد لكني احسبه على خير
فكرت في كل ده وازاي قدروا يلخصوه في صفحه واحده وازاي الناس فعلا بعد ما بتمشي من وسطنا بتتنسي وتبقى مجرد ذكرى صغيره مهما كانوا ومهما عاشوا ومهما شافوا

امال انا بقى لما اموت هيقولوا عني ايه كل اللي هيتكتب عني هو غالبا شهادة وفاتي في السجل المدني
واحد مات
بس كده هو ده اللي هيفضل مني
سألت السؤال ده لأقرب شخصيه منه علشان اعرف ايه رأيها في النقطه دي
وكانت اجابتها مقنعه قوي بالنسبه لي
قالتلي ان ذكراه مش في المجلات ولا في الجرايد مش في البرامج ولا اي حته من دول ذكراه في المئات اللي حضروا دفنته يودعوه بدون نفاق
ذكراه في اعماله وتصرفاته بين الناس
في حب الناس ليه
في كل خير قدمه لحد
يعني الواحد ممكن يبقى ليه ذكرى كويسه في الدنيا بعد ما يموت بعمله الصالح
وافتكرت الحديث النبوي عن النبي (ص) اذا مات ابن ادم انقطع عمله الا من ثلاث صدقة جاريه او علم ينتفع به او ولد صالح يدعو له . او كما قال رسول الله (ص) يعني فعلا لما هنموت ممكن ذكرانا تضيع لو مكانش عندنا حاجه من التلاته دول
مش كل واحد فينا هيخلف دي حاجه نصيب بتاع ربنا
مش كل واحد فينا عنده علم غزير يقدر يفيد بيه الناس وحتى لو عنده مش شرط هيقدر يوصله للناس
لكن على الأقل كل واحد يحاول يعمل اي خير ينتفع بيه الناس بعد موته جايز هي دي الحاجه اللي تبقى لينا
مش بس علشان اسمنا يفضل مذكور لا علشان اسمنا لما يتذكر الناس تدعيلنا بالرحمه والثواب يفضل يذيد في صحيفة اعمالنا

ربنا يكرمكم ويوفق كل حد بيعمل عمل خير
وافكركم بميعاد بؤجة الخير اللي عاملاها خيخه


البوست ده اهداء لمدونة قصص بالهمزه ( ابنة الراحل حسن ابو السعود)ربنا معاها

2 comments:

Rasha* said...

إيهاب
مش عارفة اشركرك على الاهداء ولا عشان ذكرى رحيل والدى اثارت عندك التساؤلات دى
لا أزكيه على الله واحسبه كان طيب اوى اوى وكريم اوى اوى
والطيبة دى ميراثه ليا عشان من وقتها للآن بقابل ناس تترحم عليه وتساعدنى لما بتعرف انى بنته...ناس...ماكانتش تعرفه!
ربنا يرزقنا حسن الخاتمة والصالح من الدنيا
شكراً ...انا قلت لك..انت اخ وصديق بس الاهم...جدع :)

ملكة بحجابى said...

لما نموت هيفتكرنا اللى مننا واحنا منهم
ودول مش شرط يكونو اهالينا بس
لا
اللى مننا ناس بنحبهم وعشانهم عملنا او مستعدين نعمل كتير ومن غير مقابل
واللى احنا منهم .. ناس ادونا الاحساس بالفرحة ولو للحظات

هقولك ايه بس
دومت معبر عن فيض الاحاسيس ببراعه
تقبل مرورى

ملكة بحجابى