Friday, November 9, 2007

عقلك حبيبتي هو كنز لا انكره


لماذا تهتم بشكلي ولا تدرك عقلي

كتير قوي بنلاحظ اليومين دول موضوع وفكره منتشره قوي ناس كتيره بتتناقش فيها

نظرة الرجل للست على انها مجرد انثى جميله بغض النظر تماما عن عقلها وتفكيرها
الموضوع فيه يجي خمسميت ناحيه رأي البنات والستات ورأي الشباب والرجاله وراي الدين
ورأي الغرب ورأي اجدادنا
ورأي عادتنا وتقاليدنا
وفيه اهم حاجه الواقع العملي اللي هو اصبح عباره عن خليط من كل اللي فات ده كله

نبتدي طبعا برأي البنات والستات
ليه الست بقت شايفه ان الراجل مش بيهتم بعقلها خالص وكل هدفه جمالها وانوثتها
ولاغي تفكيرها سواء الرجل ده ابوها او اخوها او حبيبها او زوجها او زميلها في العمل او حتى سواق الميكروباص اللي بتركبه وهي رايحه كليتها او شغلها

ربنا سبحانه وتعالى لما خلق كل كائن خلقه بصفات معينه
مفيش حاجه اسمها اصل ربنا خلقنا زي بعض والا ايه لزمة التفرقه في الأسم
كل واحد ليه صفاته وطباعه وخصائصه
لما ربنا خلق امنا حواء كانت علشان تؤنس وحدت سيدنا آدم يعني تخيل ان ربنا عارف ان هو خلق آدم محتاج لزوجته ومينفعش يكتفي بمتع الجنه من انهار وطعام ومناظر خلابه والله اعلم بما في الجنه لكن لازم له انسانه جنبه

طيب هو احتياجه ليها مجرد احتياج رغبه فقط ولا في احتياجات اخرى


الستات بتقول ان الرجاله لغوا عقولنا وحجروا علينا والراجل ازاي يعاملنا كده
انا معترف ان في اتجاه كبير عند الرجاله بيقول كده "الست عقلها مش متزن قوي وان الست هي انثى فقط مش انسان عاقل زينا"
طيب ليه الناس بتقول كده هو ده اعتقاد الرجاله عملته وصدقته من نفسها كده بس
اعتقد يعني ان فيه كتير من الستات شاركوا بدور هايل في تثبيت المعلومه دي عند الرجاله
تعالي بصي كده على شخصيات معينه في مجتمعاتنا من الستات هتلاقي انها قررت انها مجرد وسيلة اثاره
متعرفش تعمل حاجه تانيه ولأن ده هو اللي ظاهر على الوش فبيدي انطباع ان هو ده الواقع الحقيقي

مش معنى كده اني بحمل الغلط للست لكن بقول انها شاركت في الغلط

تعالى لرأي الرجاله
الراجل شايف انه هو اقوى والمفروض انه اذكى واحسن ازاي الست تكون اذكى ويكون عندها عقل
لأن الراجل بطبعه بيحب السيطره ويحب يحس بتفوقه هتلاقي انه في الغالب بيقنع نفسه تماما ان الست اغبى منه وانها متنفعش في حكاية الفهم والتفكير دي وان هو بس اللي المفروض يفكر ويقرر

طيب رأي الدين ايه
اظن ابلغ رد عن رأي الدين هو مواقف الرسول (ص) من مشاورته لزوجاته وانه اخد برأيهم في مواقف عظيمه
يعني رأي الدين مش محتاج شرح الدين ادى الست حق التفكير والمشوره

طيب رأي المجتمع يعني كلام الناس اللي كل ما نيجي نعمل حاجه نقول لحسن كلام الناس ومعرفش ايه
المجتمع المنيل بتاعنا خلى كل واحد خايف ياخد برأي زوجته لحسن الناس تقول عنه شخشيخه في ايدها
يعني برده المجتمع بيضغط علينا علشان نقرر ان الست ماليهاش اي رأي

طيب رأي الغرب اللي مبيجيبش حاجه تسر القلب برغم كل الدعايه اللي بيعملوها انهم متحررين وبيدوا كل واحد حقه انا شايف انهم اونطجيه لأن الست هناك اصبحت مجرد سلعه فقط لا غير وحتى في بيوتهم الرجاله برده بيحاولوا يثبتوا تفوقهم ويمكن لأن الستات هناك عندها وعي شويه بتطالب بحقها انها يكون ليها راي فبتكون النتيجه الطلاق في معظم الحالات وده مش دليل على الديموقراطيه كتهم نيله

اما عن عادتنا وتقاليدنا فحدث ولا حرج
كأنك عايش في عصر حبيب قلبي سي السيد الشخصيه اللي كرهت الراجل اللي مثلها من كتر كرهي للشخصيه
انا كنت بخاف اتفرج على الفيلم زمان وانا صغير من كتر ما انا مرعوب ليعرف ايه اللي حصل لأمينه وهي بتزور الحسين والمواقف المقرفه اللي في الفيلم ولما كبرت بقيت برده مش بشوفه مش خوف لكن قرف منه

فاضل ايه
ايوه صحيح الواقع اللي احنا عايشينه
ناس بتحارب علشان تاخد حقها وتثبت ان الست كائن عاقل من حقها تناقش وتقترح وتفكر زي اي حد تاني
وناس عايشه زي ما تيجي تلاقي كل همها الموضه واللبس والأفلام والعريس ابن الكلب اللي مش عايز يجي
وناس مقضياها اصحاب ورحلات وفي اللذيذ ودي بقى مالهاش دعوه بالقضيه لأنها واخذه حقها بالدراع
وناس تانيه عارفه تمشي امورها

ازاي؟؟

يعني تلاقي واحده متجوزه واحد بتحبه وبيحبها تلاقيه هو يقولك انا كلمتي هي اللي بتمشي وهي ساكته عادي خالص
لكن الواقع ان هي بتعرف ازاي تتعامل معاه من غير ما يحس انها بتفرض رايها يعني بأسلوب لذيذ كده تناقشه وتفهمه وتاكل عقله وقلبه
ودول احلى ناس صراحه
وناس تانيه عامله فيها سبارتكوس محرر العبيد كل شويه ندوات ومؤتمرات وحاجات كده ماليهاش اي تأثير للأسف لأنها بتخاطب عقول مش عندنا هم اخدوا النظام بتاع بلاد بره المؤتمرات والندوات والذي منه لكن كل ده مبيهمش الناس في بلدنا

الفكره يعني من الموضوع اللي عايز اقولها في الأخر

ان ليه الواحد يكون معاه عقل تاني ممكن يساعده بفكره كويسه او يديله حل يخلصه من مشكله مش عارف يحلها خاصة ان لما الواحد بيقع في مشكله بيكون مش قادر يركز يفكر وبيحتاج عقل تاني معاه علشان يساعده
ايه العيب ان امي او اختي او زوجتي او حتى بنتي تفكر معايا وتقول رأيها يمكن تفيدني بحاجه تايهه عني

ولو دورنا بجد هتلاقي مثلا واحد متعلم مثقف وخريج معرفش جامعه ايه وقاعد مع امه بيحكوا في حاجه كده ويقولها عن مشاكله في الشغل مثلا هي مش فاهمه حاجه عن شغله لكن بتفكر معاه وفعلا كتير ممكن تقوله نصيحه عن الناس ومعاملتهم والمواقف والراجل المفروض يعمل ايه فيالمواقف دي

مع انها يمكن ما اخدتش نص التعليم اللي هو اخده
اما رأيي انا الشخصي
بلاش نضيع من ايدنا عقول جميله ونقتلها علشان بس نشعر اننا اقوى منهم واننا متفوقين عليهم
اصل الوكسه بقت جامده قوي كل ما تدخل في مجال محتاج فكر جامد تلاقي البنات عدت وبقت على القمه والرجاله لسه ماشاء الله قاعدين على القهوه مستنين يتفرجوا على ماتش الأهلي والزمالك
سلاااااااااااااااااااااااااام

19 comments:

Doba said...

تصدق فعلا ان الرجالة فى الوقت اللى بعلق فيه بينفرجو فعلا على ماتش الاهلى

وعمالين يهيصو وكانهم بيفتحو عكه ولا حتى دخلو حررو فلسطين

ما علينا

المهم

يسلم ايدك يا استاذ خلييييييييييييييفه

بوست هايل واقل ما يقال لك ربنا يباركلك انت وغادة ويجمعكم على خير

اخدت راجل بميت راجل
الرجل ذى العقل المتفتح بالحق هو من يستطيع ان يعيش جيدا فى مضمار الحياة

لك منى كل التقدير يا صديقى
هبة

فى القلب said...

الله الله الله

أهو ده كلام الراجل الصح الميه ميه

يا ريت يجوا يتعلمو منك يا خويا

حتى أنا بكره فيلم سى السيد

بس بحب أغيه الشنكوتى

شادي فايد said...

أنا جاااااااااااي

كاميليا said...

بوست جميل من عقلية ناضجة

تسلم افكارك

تحياتى
كاميليا

Salwa said...

بوست له فكرة ورأي

بجد جميل جدا

طبعا ده هيكون رأي كل البنات

وطبعا الرجاله المتفهمه
تحيااااااااااتي

قلوب حائرة said...

ايهااااااااب ربنا يكرمك يارب وبتهيلي اكبر دليل على مشورة الرجل للست لما الرسول الكريم في استشارته صلى الله عليه وسلم لأم سلمة في صلح الحديبية عندما أمر أصحابه بنحر الهدي و حلق الرأس فلم يفعلوا ، لأنه شق عليهم أن يرجعوا ، ولم يدخلوا مكة ، فدخل مهموما حزينا على أم سلمة في خيمتها فما كان منها إلا أن جاءت بالرأي الصائب فقالت : اخرج يا رسول الله فاحلق و انحر ، فحلق و نحر ، فإذا بأصحابه كلهم يقومون بقومة رجل واحد فيحلقوا و ينحروا .

تفتكر يا ايهاب في حد ياخذ بسنة السرول في موقف زي ده او شبيه بيه اليومين دول ويخسر حب زوجته وتقديرها ااااااه لو يتعلموا منه اه

الشنكوتي الكبير said...

doba
الله يكرمك يا هبه
عموما متزعليش على اللي بيتفرجوا دول اصل النتيجه بانت خلاص
الأهلي راح يا ولداه وعليه العوض في رحلة اليابان

اتمنى فعلا اكون راجل بالمعنى الحقيقي للكلمه
تسلمي يا صديقتي
سلاااااااااااااااااااام


----------------------

في القلب
اوشه الغاليه اللي في قلوبنا كلنا
انا برده بحب اغنية الشنكوتي دي
كفايه ان فيها اسمي
ههههههه
وتشكري يا اختي على الكلام والتشجيع الجميل
سلااااااااااااااام


------------------

شادي فايد

حمد الله على السلامه يا بطل
الصوره بتاعتك اخيرا رجعت تنور تاني
ربنا يوفقك

سلاااااااااااااااااام


------------------

كاميليا

والله يا كامليا بتحرجيني بزرقك ده ومنوراني قوي
يسعدني كلامك واعجابك بكلامي

ربنا يكرمك يارب

سلاااااااااااااام


---------------------


سلوى

ربنا يكرمك
وبعدين يا ستي راي البنات او الرجاله
مش ده المهم انا يهمني اني اقول الرأي اللي انا شايفه صح

ربنا يهدي الناس كلها
واتمنى يجي يوم ويكون الرجاله في مجتمعنا عندهم وعي كافي زي اللي كان عند الصحابه من تقدير لدور المرأه
وده طبعا لإتباعهم لأوامر الرسول _ص) تسلمي على التعليق

نورتيني
سلاااااااااااااااااااااام


------------------

قلوب حائره



الله يكرمك ويوفقك انتي واحمد يارب

انتي جبتي الموقف اللي انا قصدته بالظبط
وياريت والله ناحد بسنة الرسول في حياتنا ومعاملتنا اكيد ساعتها حاجات كتير جدا هتنصلح في حياتنا

سلااااااااااااااااااااام

كاميليا said...

طيب يلا .. انا مستنية البوست الجديد
فى كلام جواك .. بيدور فى عقلك .. اكتبه علشان نقراه ونقولك رأينا فى الافكار الجميلة بتاعتك

لك تحياتى وتقديرى
كاميليا

shahy said...

الخبير الشنكوتي الكبير

ماشاء الله على التفكير العالي المتنور اية ياشنكت الحلاوة دي

قول كمان وكمان

الله يبارك فيك يامان ويقرب لك البعيد

سلامات

الشنكوتي الكبير said...

كاميليا

يا ستي انا سعيد جدا بكلامك ده
واتمنى فعلا كلامي يكون مفيد للناس
واتمنى اكون بعمل بيه مش كلام وخلاص

وفعلا معاكي حق في جوايا كلام كتييييييير
سلاااااااااااااااااااااام


-----------------------


شاهي
منوراني

الله يبارك فيكي ويحفظك
من عيني يا ستي هاقول كمان
يا ليلي يا عيني
اااااااااه
ايه رأيك في صوتي تحفه
ربنا يسعدك

سلاااااااااااااااااااام

hamsaa said...

العقل هوالاساس الجسد بيذبل انكتلاقي حبيب بيفكرصح بيعينك في مشواركدةاهم كتير واهم كمان علشان الحب يزيد
برافوعليك البوست جميل

شادي فايد said...

الرجالة
اه من الرجالة
دي عنيهم عايز يندب فيها رصاصة
:)

Jade said...

Shinko,

Nice picture :)
Well said.

koukawy said...

يعني تلاقي واحده متجوزه واحد بتحبه وبيحبها تلاقيه هو يقولك انا كلمتي هي اللي بتمشي وهي ساكته عادي خالص
لكن الواقع ان هي بتعرف ازاي تتعامل معاه من غير ما يحس انها بتفرض رايها يعني بأسلوب لذيذ كده تناقشه وتفهمه وتاكل عقله وقلبه
ودول احلى ناس صراحه
***********
هما دول علي رأيك احسن ناس
اما بقي موضوع القهاوي و النت كافيه و الماتشات و السودوكو و الفراغ
ربنا يرحمنااااااااااااااا

CresceNet said...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. If is possible add the CresceNet(www.provedorcrescenet.com) in your blogroll, I thank. Good bye friend.

Jade said...

Eh ya shinko el gheiba el taweela deh? I hope you are well...

Nani said...

السلام عليكم
يا شنكوتي يا كبير
موضوع الاختلاف بين الست والرجل من زمان
فعلا الرجل راس العائلة لكن الست هي الرقبة الي تحركه زي ما هي عاوزه بالاتجاه الي هي عوزاه وتخليه يظن انه هو الي بتحرك
مش قصدي ناكل بعقل الراجل حلاوة ابدا
بالمدارية والحنية والكلمة الطيبة بيجي
اي نعم في منهم ظلمة ورمة وربنا عليهم بس في الاخر لو الست متعلمة وعندها نضج ثقافي ومتبقاش بقحة في طلب حقها يبقى كله تمام التمام
المشكلة انه في افراد من الطرفين بتعمل البلاوي وبيعممو على الكل
يعني اخويا عنده مزة عادي بتكلمه وبيكلمها وبيخرجو
طب اشمعنى انا مبقاش مزة حد برضك؟
والبت بتاعته مش برضك عندها اخ لو شاف اخوي حيديلو بالبونية على وشه؟
طب اخويا ميرضاش اكون مزة حد ليه حيبقى كيس جوافة مهو عامل كده باخو مزته والي انت متحبش انه يحصلك متعملوش بالناس
انا عارفة انه ده عبارة عن الدوران بحلقة مفرغة
انت ترضى تكون اختك مزة؟
طبعا لا
بس انت اكيد بدور على بنت زي القمر تحبها وتحبك

emos said...

kalam gameel w kalam ma32ool ma2darsh 2a2ool 7aga 3anno
bs shakl el bent aham men 3a2laha 3and el regala w dah bardo geh fel deen 2omal rabena 2al el ragel ye7'tar zat el gamal wel deen leeeeeeeeeeeeeh?
la2 wel gamal geh el awel sob7an allah
heyya el fekra en lamma el bent beteb2a gamela el ragel beyesma3laha aktar men lama tekon mesh gamela
mesh mohem heyya bet2ool eh
howa beytana7 w 7'alas
bs mawdoo3 howa yerakez fe ehh deh beteb2a b 2eed el bent
el bent momken mayeb2ash waraha 7aga or matkalemhoosh 3an 7aga 3'eer 3an el moda w gamalha w 7alawetha la2enaha beyb2a 3andaha 7'alfeyya en howa dah elly howa bey7ebo
enama fe banat tanyeen btata3amad enaha teb2a fe 2a7san sora 2odamo w fe nafs el wa2t tetkalem fe mawadee3 te7'aleha teb2a gamela w zakeyya fe nafs el wa2t
ya3ny el mawdoo3 kollo fe 2eed el bent
nader mayeb2a el ragel kol hammo shakl el bent bs la2en el naw3eyya beta3et el regala deh beyb2o lamo2a7'za ya3ny mayet3ashroosh aslan
el yoom elly el bent hate3ya feh walla hatet3ab w yeb2a shaklaha 3ahat hayesebha 3ayana w lamma te7'ef hayeb2a yo3od ma3aha 3ashan yekoon shaklaha 2et7asen shewaya
dah marra wa7ed kan 2et2adem lewa7da sa7bety 2ektashafet en howwa kan metgawez w tala2 merato 3ashan makanetsh betahtam b shaklaha
eh el nas deh
7aga tenarfez

qwert anime said...

بوست هايل
و مدونة جميلة