Tuesday, October 23, 2007

Scarlet letter

Scarlet letter

طبعا هتستغربوا ليه اخترت اسم فيلم اجنبي كعنوان للبوست ارد عليكم بذكاءوفهلوه كده اصبروا وانتم هتعرفوا

النهارده بابا كان اجازه وبالتالي انا روحت من الشغل بالمواصلات لأني في العاده بركب مع بابا في العربيه وده كويس علشان بنام تقريبا طول السكه ومش كويس لأن بتفوتني حاجات مش بعرف اعلق عليها كويس

المهم وانا قاعد وقف الميكروباص في اشاره مرور ولقيت جنب مني عربيه ملاكي موديل حديث سوداء بس شايف جواها ثلاث حسناوات لابسين اخر شياكه يعني من الأخر مزز جامده جدا ومعاهم راجل كده هو اللي سايق كل واحده منهم ماسكه في ايدها سيجاره وهو بيفتح علبه صغيره واعطى كل واحده منهم حاجه صغننه حدفتها على بقها على طول انا طبعا تنحت مش فاهم ايه اللي بيحصل وعيني مركزه معاهم قوي واحده منهم التفت لي ونظرت بقوه على اساس يعني اتكسف وابص بعيد بصيتلها بصه من بتوع يا فاجره يا ذنديقه اتعلمتها من ناس اعرفها المهم انها هي اللي لفت وشها بسرعه بعيد عني المهم العربيه اتحركت طبعا واختفوا بعيد عن عيني فكرت للحظه فيهم وفجأه جت على بالي فكره غريبه قوي
هو انا ظني فيهم ايه بالظبط يعني انا شايف ان دول عباره عن ايه

بصراحه ومن غير مواراه انا على الفور قررت انهم اكيد بنات ليل وده الأغا بتاعهم وبيظبط لهم الجمجمه علشان الليله تحلو المهم
الفكره هي هو انا ليه قررت انهم كده يعني ايه الأساس اللي انا بنيت فكرتي عليه

نحدد العوامل زي الجماعه المثقفين البنت قلوب حائره وحكايات فريده بيجننوني بتنسيقهم

اولا يمكن علشان السجاير اللي بيشربوها
بس يا خساره اساس ضعيف لأن في الوقت الحالي ستات كتير للأسف بتشرب سجاير ومش عارف العاده المهببه دي جتلهم منين بدل ما يتعلموا حاجه عن الأتيكيت بيتعلموا الشيشه والسجاير كتكم نيله ما علينا برده كتير بتعدي جنبي عربيات وتلاقي حاجه كبيره كده ولابسه لبس محترم جدا وست شيك قوي وفي منتهى الزوق وتلاقيها فجأه بترفع ايدها تلاقي السيجاره مولعه وتسحبلها نفسين بسرعه علشان تكمل سواقه يبقى السجاير متنفعش دليل على فسق البنات دول ولا على فسق غيرهم السجاير بقت عاده مهببه منتشره قوي في بلادنا حتى البنت جاد الله يهديها برده بتشرب ما علينا
ثانيا يمكن علشان شعرهم عريان وعاملينه قصات مجنونه خالص
يا دي النيله حجه هبله برده علشان البنات اصلا كلها ماشاء الله اتهبلت بالقصات والتسريحات والصبغه والذي منه ومش معنى ان بنت بشعرها تبقى بنت مش كويسه بس هي التربيه والبيئه حواليها هي اللي بتشجعها على لبس الحجاب وفي كتير بنات اتحجبت بصعوبه لأن اهلها مش موافقين انها تتحجب وشايفينه قرار خطييير

ثالثا يمكن علشان لبسهم محذق وملزق وحاجه كده شفتشي وشكلهم هشكه خالص
برده مش شرط انزل حضرتك في شوارع المحروسه تلاقي بناتنا الله يكرمهم ماشاء الله عاملين عرض استريبتيزي رائع كل واحده ناسيه انها عندها شنطه ومساعدين وعفشه كامله وراها وان المصريين والعرب عامة جسمهم مينفعش في الأسترتشات لأن امكانيتنا صعب قوي الناس بره عملت الأسترتش عشان اهو يبين اي حاجه فاضله انما احنا مش محتاجين ملزق كل حاجه ماشاء الله واضحه وضوح الشمس وافتكرت حاجه برده احب اقولها بالمره في الموضوع المنظم ده
رحت محل تصوير مشهور هنا بتصوير العرائس اسمه كادو في شبرا المهم شفت هناك عرايس وعرسان كتير بس اللي لفت نظري هو كمية الصدور واللحم اللي شفته هناك كل دي ستات لابسه على الموضه الأوربيه خحالص كده ه العربس مش بيغير خالص يعني وهي الناس بتتفرج على مراته كده ولا هو فاشخ ضبه وفرحان قوي بأن الناس بتحسده علشان الحلويات دي كلها بتاعته لوحده طيب ما هي كده مبقتش باعته لوحده ولا حاجه دي بقت ملكيه عامه للشعب الست بطبعها كائن جميل تميل لإظهار جمالها وانوثتها ربنا خلقها كده لكن المفروض الراجل يحافظ عليها مسؤليته كده لكن تلاقي الراجل يقولك لا طبعا هي حره ومين قالك ان هي مبتعملش كده علشان ترضيك وتطمن انها اجمل واحده في عينك وانك مش هتبص على غيرها لو انت حرصت انك متدورشي بره هي اكيد هتهدى وتبطل تحاول تحول نفسها لمجرد وسيلة اغراء تشدك بيها
رغيت كتير في النقطه دي

رابعا يمكن علشان راكبين مع راجل وهم كلهم ستات
يا سلام ده ايه السبب العبيط ده طيب ما لو هو اخوهم او عمهم او جوز اختهم مثلا وبيوصلهم طبيعي المنظر ده مش عار ولا حاجه سبب غير مقنع على الأطلاق

خامسا يمكن علشان البنت بصتلي بتعالي واحتقار قوي فأنا اسقطت غضبي عليها بأني افترضت انها مش كويسه ولعنتها بأسوأ الصفات عقابا ليها
وده طبعا معناهخ اني حكمت عليها بدون دليل كنوع من العقاب يعني دليل لا يعتد بيه يا باشا

سادسا ودي طبعا نقطه مهمه جدا لكن يا خساره نسيتها على ما رجعت البيت وكتبت الموضوع
فكروا انتوا فيها
الخلاصه يعني اني لقيت ان كل سبب من الأسباب اللي اعتمدت عليها يمكن هدمه من جذوره يبقى ايه الحل
الحل ان يكون السبب هو اجتماع كل الشبهات اللي فاتت دي مره واحده يمكن اللي خلاني اشك فيهم هو ان كل الحجج الضعيفه دي اجتمعت فكونت فكره واحده قويه في دماغي

طيب ايه الحل في الموضوع ده انا مبحبش اظلم حد حتى بيني وبين نفسي
الحل العبقري نعمل زي الفيلم بتاع سكارليت ليتر وقصته انهم لما بيحكموا على واحده انها ست مش كويسه بيعلقوا على صدرها حرف كبير وهو اول حرف من كلمة زانيه بس في الفيلم كانت بتحب عشيقها قوي وكانت شايفه انها مظلومه من المجتمع كله فطرزت الحرف وعملته من اللون القرمزي وعلقته كأنه وسام على صدرها الفيلم تحفه على فكره واغنيته روعه

بس تفتكروا لو طبقنا النظام ده في مصر كام واحده هيعلقوا على رقبتها الحرف القرمزي

وياترى ايه اللي خلى اوجه التشابه بين العفيفه والداعره خيط رفيع كده
قارن بين لبس كتير من البنات دلوقتي وبين لبس فتايات الليل هتلاقي مفيش فرق بنات الليل برده بتلبس استرتش محزق وبدي يهبل والمكياج الصارخ وجسمها كله مرسوم بالمسطره قدام الكل من خلال اللبس الضيق اللي لابساه

في الأخر انا مبحكمش على حد بس عايز اسأل هي ليه البنات نسيت اسلوب الشياكه بتاع زمان وبيستسهلوا ويقلدوا اسوأ ما في الغرب وخلاص

وختاما اتمنى الموضوع يكون متنسق كويس لحسن انا اتهريت ملاحظات على التنسيق
سلاااااااااااام

25 comments:

insomniac said...

ok, ana fahma en el mazaher khadda3a, we en el nas momken takhod fekra ghalat and all, bas enta nafsak lama 7allelt no2ta no2ta la2eet en there is no good reason en ra2yak feehom sa7!!

shankooty, ana a3raf nas keteer awy law 7akamt 3aleehom bel shakl bas, ya hatezlemhom ya hatezlem nafsak!! especially when it comes to women... ana a3raf wa7da mo7agaba we shaklaha mo7taram bas men tasarofat-ha 3omry ma2dar 2a2ool 3aleeha mo7tarama... we a3raf banat law shoftohom t2ool 3aleehom mesh kowayeseen 3ashan lebsohom we sha3rohom bas homa a7san menny we men nas keteer awy!!! taba3an mesh de el ka3da, but that's the whole point really, there are no rules...

we kaman ana fe 7aga day2etny, why is smoking just a bad habbit when it comes to arab women smoking it!! it's a bad habbit. ragel ba2a aw set beyeshrabooh, mesh far2a, same lungs and same health hazzards! bas aghlab el nas beyeday2o awy lama el set elly betkoon beteshrab sagayer, tab maho manzar kamee2 bardo when done by a man!!!

ma3lesh 3al comment el nashef, have a good day

Anonymous said...

بجد بجد موضوعاتك رائعة وفيها مواضيع رومانسية تحفة انا لسة اول مرة ادخل المدونة من كام يوم وقريتها كلها ومعجبة بكل كلمة فيها وبحييك على اسلوبك الجميل
بالنسبة للموضوع دة انا رأيى ان ليك حق بصراحة بنات بيشربو سجاير وبياخدو حاجات منعرفش اية هيا ولابسين لبس مش كويس هيكونو اية يعنى غير مش محترمين عالاقل فالمظهر والافكار يعنى لو فرضنا مثلا ان واحدة مثقفة ومن عيلة وكويسة وكل حاجة بس بتشرب سجاير بحجة الحرية الشخصية والمساواة وزيى زى الراجل بس هيا نسيت تقاليد مجتمعها الشرقى وعاشت وسطنا بافكار غريبة عن مجتمعنا ومن حقى انتقضها
وللاسف ان دا بقى منتشر جدا الايامدى

متتاخرش علينا بمواضيعك اللرومانسية الجميلة
سمسمة

Ehab said...

insomniac
يا صديقتي
معاكي كل الحق طبعا ان المظهر بيخدع كتير
وان مينفعش نحكم على الناس من شكلهم
وده اللي انا كنت عايز اتكلم عنه ايه اللي خلى الشكل يبعد عن الجوهر خالص كده ليه بقت الناس المنحله فعلا بتستخبى وراء ملابس العفه والطهاره
وليه المحترمين فعلا اتخذوا مظهر الأنحراف كمظهر لذيذ شيك وهي دي الموضه مين صح ومين غلط
اكيد في حل

مؤقتا الحل اللي قدامي اني ابطا احكم على الناس بمظهرهم
واستنى فعلا لما الوقت يبين هم ايه ومين

تحياتي ليكي
وشكرا على ردك الجميل
سلااااااااااااااااااام

Ehab said...

سمسمه
نورتي يا سمسمه الموقع
واتمنى تيجي هنا على طول
معاكي حق في ان المنظر شرب الستات للسجاير مش ظريف خالص
برده شرب الرجاله للسجاير مقرف جدا بس يمكن اتعودنا عليه
لكن اللي مفيش تعود عليه هو ريحتهم

مجتمعنا مجتمع شرقي ليه تقاليده لكن انا ميهمنيش التقاليد قد ما يهمني التزامنا بدينا
هو ده الللي المفروض نتبعه
ساعتها هنرتاح قوي
بس تقولي لمين
نورتيني
سلاااااااااااام

juliet2m said...

بجد الموضوع حلو اوي

وفعلا انت يمكن تكون مش ظالمهم
لان المنظر العام ليهم هو اللي بيوحي بده
وبصراحه لو كان اي حد مكانك كان هيظن نفس الظن ده بيهم
هما اللي مخلين نفسهم موضع للشك

وفعلا عندك حق لان لبس بعض البنات بقي حاجه بجد خارجه اوي

بس زي ما في الوحش فيه الكويس كمان بس دايما الوحش هو اللي بيبقي ظاهر وملفت اوي


سلاماااااااتي

shahy said...

اية ياباشا الكلام الجامد دة

بجد الله يكون في عون الشباب من هبل بعض البنات

ياعم احكم عليهم زي ماانت عاوز واية يعني مالك متأثر قوي كدة وخايف انك تظلمهم كل واحد حر هما يلبسوا اللي عاوزينة واحنا نقول اللي احنا عاوزينة والا انت عاوز تقيم عليهم الحد

المهم
طريقتك في الكتابة جميلة وسيبك من حكاية التنسيق دي احنا بنستمتع بكلامك سواء منسق او ملغبط

سلام

Ehab said...

julieeet

عزيزتي جوليت
اولا نورتيني
ثانيا انتي معاكي حق هم اللي حطوا نفسهم في موقف شبهات
لبس البنات دلوقتي بقى صعب قوي
مش كل البنات طبعا والحمد لله
لكن في كتير نسيوا دينا وتقاليدنا واهتموا بتعليمات الغرب فقط
ربنا يهديهم
وبجد نورتيني

سلاااااااام


--------------------


شاهي

يا ستي هنعمل فيهم ايه بس
انا مبحبش احكم على حد ولا احجر على حرية حد
بس اديكي قلتي بنفسك ربنا يكون في عون الشباب
اللي مش قادر يكون نفسه ويعف نفسه بالزواج لما يلاقي قدامه كل الفتن دي ومينفعش واحده من اللي بتلبس كده تقولي اصل دي حريه شخصيه هو بيبص ليه
هاقولك الحريه الشخصيه متتعداش حياة الأخرين وانتي حاجه معروضه قدامه وهو محروم منها يعمل ايه يعني

بجد يا شاهي ربنا يهديهم
وتحياتي ليكي
سلااااااااااااااااااام

memoz_nemoz said...

حلووووووووووو اوووووووووووي وبجد بجد مش عارفه اعلق اقولك ايه انا قريته ع السريع بس ردي اللي بالتفصيل هايوصلك اكييييييييييييييد

nany said...

شوف هو الموضوع ميت فل وعشره
ويمكن انت طرحت فكره ان الشكل مش كافي علشان نحكم علي غيرنا واكيد طبعا لا السيجاره ولا الملزق والمحزق اللي بتلبسه البنات اليومين دول بقي مقياس انك تحكم عليهم به00لان اليومين دول الحاجات دي عاديه جدا بس انت في كلامك في كلام يعني لاذع شويه
يعني حاول تظبط الاسلوب يعني لا يبقي دارج اووووووووووي ولا عالي اووووووووي خير الامور الوسط يا شنكوتي اوك 000واخوك زميل ليا في مشاهده المصارعه

Jade said...

shinko,
I am actually shocked at your assumption that these girls - in broad day light (el mafroud ennak fe waqt el 3amal yani mesh fe nos el leil) are prostitutes just because they smoke, they are not veiled, & they are riding with a man.
How did you even get a chance to see how tight their clothes were when they were sitting in the car? Plus why does a girl have to be judged on what her profession is just by her clothes & looks?

Dont you think that you & the mentalities like yours are turning the women of our society into a product or "sel3a"? & not the other way around?

They smoke? That was the first assumption? Come on ya ragel...

Ehab said...

dead girl

يا ستي انتي تيجي في اي وقت تنوريني
وبعدين انا هاقعد استنى اهو

--------------------

nany

اولا تشكري على الزياره الجميله
وبعدين ربنا يكرمك على التعليق الجميل
اما عن الكلام فهو انتي عارفه هو الأنسان كده لما بيسرح في الكلام ساعات بتخرج الفاظ صعبه شويه
اتمنى اني ماكونش بتكلم بصوره مسفه او خارجه قوي
لكن برده انتم اصحابي استحملوني شويه
وبخصوص المصارعه
ده الواد عبده اخويا هيفرح قوي لما يعرف ان في بنات مدونات عسولات بيحبوا المصارعه هم كمان
بس ابقي استحملي بقى هو واصحابه لما يقعدوا يجربوا الحركات بتاعة المصارعه

تحياتي
سلااااااااااااام

Ehab said...

jade

بما انك ضيفه هنا ومنوراني
يبقى هاردعليكي بالعربي

اولا طبعا نورتيني
تاني حاجه قبل كل شيء يا بنت هو انتي بتحسبيني بروح من الشغل الساعه كام انا بسهر جامد في الشغل
عموما يمكن معاكي حق انا يومها روحت مش متأخر قوي
لكن اللي قصدته ان الوقت كان بالليل مش بالنهار ولا حاجه
وبعدين انا الفكره من البوست اصلا مش اني احكم على حد يا بنت انتي دماغ راحت منها الفكره بتاعتي خالص
انا حبيت اتكلم بفكر الناس اللي في الشارع الشخص العادي لما يعدي ويشوفهم ايه انطباعه عنهم
وبعدين رحت قعدت احلل الموضوع والدوافع اللي تخليه يحكم عليهم كده
وكانت النتيجه ان الأسباب مش كافيه علشان احكم عليهم بأنهم مش كويسين

يعني حبيت ابين فكرتين
اننا مينفعش نحكم على حد بمجرد لبسه او اول انطباع عنه
لازم نفهم الأول

الفكره التانيه ان ليه مبقاش فيه اختلاف بين شكل الناس المحترمين والناس اللي مش محترمين

هل اللبس هو اللي بقى واحد لكل الناس مبقاش فيه معايير وحدود فاصله بين الناس في المجتمع الوحش بيلبس زي الكويس

-----------
جاد يا صديقتي العزيزه نقطه كمان
موضوع السجاير
انا بكره جدا لما اقف جنب حد من الرجال في الشغل او في المسجد واشم منه ريحة السجاير والعفن اللي بيخرج منهم ومن ريحتهم
لأنهم بيشربوا بكميات رهيبه
فطبيعي اني عندي عقده من ريحة السجاير علشان كده لما بشوف ست او بنت بتشرب بتصعب عليه قوي
بحس انها بتخسر جزء مهم قوي من جمالها
هي حره عمري ما هاتدخل في حريات الناس لكن من جوايا بيقل جمالها في نظري
واول ما يخطر ببالي لما بشوف بنت بتدخن اني بتخيل يا ترى ريحة انفاسها ايه

متزعليش مني ومن صراحتي
بس انتي اصلا ملكة الصراحه
وعلى رأي المثل في مصر
انتي اللي بيقول للغوله يا غوله عينك حمراء
ما علينا

بطلي تتصدمي لما اتكلم وبعدين هي البنت بتاعتك دي مش هتلبس هدوم الشتا وتشيل المايوه ده بقى
ههههههههههههههه
سلاااااااااااااااااااااااام

Desert cat said...

للاسف هو ده طبع المجتمع المصرى
يشوف اى حاجه مش على مزاجه يصدر احكام بمنتهى السرعه
وبعدين وانت مالك تشرب سجاير تشرب ويسكى ما هى حرة فى نفسها
هى اللى هتتحاسب مش انت
ومحدش بيحاسب مكان حد
ليه كل واحد شاف منظر مش عاجبه بيطلق العنان لظنونه واوال حاجه بتحصل انها انسانه مش كويسة ...
ده انت لو شوفتها والعياذ بالله بتزنى مينفعش شهادتك لوحدك
لازم شهادة اربع اشخاص
والزنا مش التقبيل ولا الحاجات دى لاء خالص
يبقا مجرد ما شوفتها بتشرب سجاير خلاص الفكرة الرئيسية انهم مش محترمين وانهم فتيات ليل
يا عزيزى اسمعت اذناك لابد ان ترى عيناك ومش تراهم بشروا سجاير علشان تحكم تراهم بيفعلوا والعياذ بالله الزنا
للاسف دى مشكلة مجتمع ... مش فاهمه امتا كل واحد هخليه فى نفسه
واكيد لو كل واحد بص على عيوبة هينشغل عن عيوب الناس
بالمناسبة قريت البوستات اللى قبل كدا وعجبتنى جدا
لكن البوست ده حسيت ان فيه اتهام ونظرة تهكمية

Ehab said...

Desert cat
انتي يا قطه
يعني ينفع كده اول تعارف تزعلي مني وتتخانقي
عموما يا ستي متزعليش
بس يعني اسمحيلي انتي اصلك متعرفنيش
انا مليون مره قلت اني مبحكمش على حد كل الناس حره لأن محدش هيتحاسب عن حد كل واحد شايل هم نفسه كفايه
لكن ساعات بحب اعرض اللي بشوفه قدامي

وانا لما شفت الناس دي مكنتش متضايق منهم ولا حاجه ولا حكمت عليهم بس جاتني فكرة لبوست اني اتخيل لو انا حكمت على الناس دي بصوره وحشه زي اي واحد تاني من الناس اللي حضرت الموقف يا ترى ايه الأسباب اللي هاستند عليها في حكمي ده
وعلشان كده انا ناقشت كل اللي ممكن الناس تتحجج بيه وهدمت الحجج دي من اساسها وبينت ان مفيش حاجه سليمه في الفكره المنحله دي عنهم

لكن انتي ظنيتي ان انا حكمت عليهم زي برده اكتر من كومنت بيعاتبني على حكمي على الناس وان مينفعش اتهمهم بكده بدون دليل
يا ناس انا مش بتهمهم انا بعمل قصه خياليه عن واحد دماغه مسوسه بأفكار قديمه ومتلخبطه وناقشتها وبينت الغلط فين

حتى اسم البوست ده فيلم بحبه جدا وفكرته برده بتدور عن الناس لما بتقرر تحكم على حد بدون وجه حق غير انهم كتير ومن حقهم يحكموا باللي يعجبهم
البطله في الفيلم كانت بريئه جدا وطيبه قوي
ومع ذلك اتعذبت جدا
بسبب احكام الناس الحاقده
بس واضح ان محدش فهم فكرتي
وكل الناس بتحسبني بحاكم البنات دي
يا ناس انا بحاكم الفكر المتحجر
بحاكم الشخص اللي حكم عليهم بدون دليل حقيقي

بصي مش هاطول عليكي
بكره لو بقينا اصحاب اكتر هتعرفيني اكتر وهتعرفي ان مش طبعي اني اكون عقلي متوسخ كده

عموما نورتيني
ولو انك خربشتيني قوي
سلاااااااااااااااااااااااااام

Desert cat said...

ياباشا انا فى بداية كلامى كنت بتكلم عن المجتمع ككل
نظرته تهكمية للجميع
كل واحد منصب من نفسه قاضى على
وعموما اعتذر عن سوء الفهم
تقبل اعتذارى
خالص تحياتى

Ehab said...

Desert cat
ماشي يا قطه
متشكر على الرد الطيب منك
وعموما مفيش داعي للأعتذار انا بس حبيت اوضح وجهة نظري
عموما سعيد بيكي جدا وبزيارتك
سلاااااااااااااااام

Unknown said...

حبيبى وحشتنى ووحشتنى موضوعاتك بجد الموضوع بتاعك يجنن وانا بصراحة شايفة ان الموضوع بقى منيل خالص فعلا البنات بقت اخر استهبال انا نقسى منكرشى ان احياتا بشوف مناظر بتخلينى ابص وابحلق فى البنت وبالزات اللى بيشربواسجاير لانى بحس ان دة اكتر حاجة البنت بتعملها بتجرح بيها حيائها وهى فاكرة ان دة كدة اتيكيت وروشنة لكت بالعكس البنت المفروض انها حاجة رقيقة والمفروض انها نظهر انوثتها مش تتشبة بالرجالة فى شئ مرفوض فى الراجل كمان انا بالنسبة للبس تتعلا فى بنات بتزودها شوية لكن يا حبيبى دة مش معناة ان احنا نحكم عليهم نت خلال لبسهم لان البس دة يعتبر مظهر مهم لكن مش هو كل حاجة فى شخصية الانسان بدليل ان فية بنات لبسهم محثرم جدا يكاد يكون زى اسلامى لكن اخلاقهموتصرفاتهم زى بنات الليل وللاسف دة منتشر جدا الايام دة انا مش معنى كلامى انى بدافع عن اللى لبسين محزاء وملزء لكن كل اللى عايزة اقولة ان الموضوع دة بقى ملخبط ومن رائى يا سكر انك متحكمشى على الناس من خلال المظهر وبس لان المظهر بقى فعلا مظهر بما تحمل الكلمة من معتى واخيرا عايزة اقولك انى بحبك وبحب عقلك وكلامك وموضوعاتك ومتتأخرشى تانى فى الموضوعان الجامدة دةويارب رأى يعجبك عاشان انا عارفة هاتقول اية بس بردة بحبك

Jade said...

Shinko,
Boss ya gameel...
Ana kaman 7arod 3aleik bel 3araby

لازم عينك دي، تعرف تمييز بنات الليل من بنات عادية
دايما حتكون واضحة زي الشمس
صدقني
الموضوع مش لبس ديق خااااالص
و بعدين ردا على غادة
غريبة جدا ان البنت او الست تتحول لمجرد حتة لحمة
أنوثتها و أتيكتها مرتبط بسيجارة!!
لأسف العالم كله بيتقدم و احنا مسكين في دي لابسة ايه و دي بتشرب ايه

و الأغرب من كده انكم فكرتوني بالعاهرة المحجبة اللي كانت بتقف في شارع سوريا في اسكندرية
و لأ فكرتوني كمان بالشباب اللي كل عيد بيتحرش بالبنات "المحجبات" اللي في شوارع القاهرة

فوقوا - داحنا كل مابنتنا بتتحجب كل ما الدعارة و التحرش و الاغتصاب بيزيد في مصر!!!!! و عجبي

Ehab said...

غاده خطيبتي

ايوه حضرتك ماشاء الله على العقل ده كله
يعني انتي معايا اهو ان اللبس والحاجات دي مجرد حاجات فارغه يعني

ما علينا ربنا يكملك بعقلك يارب

نورتيني يا درة القلب
اشوفك على خير انشاء الله

سلاااااااااااااااام

Ehab said...

Jade
جاد يا بلطجيه بقولك ايه
خدي بالك متخشيش جامد في غاده دي المدام حضرتك
المهم يعني
انا معاكي ان اللبس مينفعش نحكم بيه على اخلاق الناس دلوقتي
لكن متنكريش انه الأنطباع الأول بيأثر فيه عامل اللبس والمظهر العام

وبعدين يا ستي ما انا قلت في البوست ان كل الأسباب دي متنفعش نحكم بيها على حد
ولا انتي قريتي وانتي سرحانه
المهم طبعا مننساش في الأخر ان كل واحد حر
وزي ما هم احرار يلبسوا ويتصرفوا براحتهم انا حر وكل واحد حر ياخد عنهم الفكره اللي تعجبه مادام مبيتدخلش في حياتهم ولا بيملي عليهم رايه

وحاجه اخيره
هو يعني مش عارف انا كل واحد اكلمه عن اللبس والمظهر يقولي ايوه ما هو فيه بنات ليل بتلبس طرحه
ايوه يا ستي عارفين بس هو يعني مش معنى ان حد وحش بيستخبى في صوره حلوه يبقى الحجاب واللبس الحشمه دليل انهم بيخبوا الفساد وراهم

وعموما ربنا يوفقك حلو البوست الجديد بتاعك
نورتيني ويسعدني دايما مناقشتك
علشان دماغك جامده
بس انا بحب انكشك علشان تسخني وتيجي تنوريني هنا
سلااااااااااااااااااام

hamsaa said...

عزيزي ربنا يخليلكم بابا لانه بيرحمك كتير قوي
قلمك جميل و مدونتك اجمل تحياتي ليك
اسمك حلو قوي قوي
سعدت بزيارتي لك و اسعد بزيارتك
همسه

Jade said...

ya Shinko,
If we agree to disagree we can always be friends...

Ahlan wasahlan be Ghada & of course I never meant to upset her walah 7aga - I am just expressing my point of view on what she said.

W rabena yekhaleeko le ba3d.

Anonymous said...

بقى اناياباشا بنسق الكلام حلت عليك اللعنة المهم يااخويا بطل تحليل يافالح في الناس بس هقولك المشكلة انكم انتوا الرجالة ربنا يسمحكم الي بتشجعوا البنت على كده هقولك راي البنت بتعمل كده ليه هقولك علشانتلفت الانتبه حلو حلو وبعدين لما حضرتك بتبص ليها ونظرة كلها اهتمام وبلاش اقول ايه تاني ايه الي بيحصل بتدعم الي بتعمله فسيادتك البنت بتتنيل وتنياها على حالها ده لكن لو الواحد فيكم يبص بصة احتكار او ميبصش اصلا ويبطل يقولالله يبركلوا ، وماشية معاك وكلام من هذا القبيل كانت اتوكست وحست بمصيبتها لكن انتوا السبببببببببببببببببببب

MAKSOFA said...

الحل العبقري نعمل زي الفيلم بتاع سكارليت ليتر وقصته انهم لما بيحكموا على واحده انها ست مش كويسه بيعلقوا على صدرها حرف كبير وهو اول حرف من كلمة زانيه بس في الفيلم كانت بتحب عشيقها قوي وكانت شايفه انها مظلومه من المجتمع كله فطرزت الحرف وعملته من اللون القرمزي وعلقته كأنه وسام على صدرها الفيلم
---------------------------------
----------------------------------
عجبتني قوي حته تعليق حرف كبير من حرف كلنه زانيه علي صدر كل ست موش كويسه ، لكن عجبني أكتر أن هناك أمرأه عاشقه أحبت بعمق وصدق فطرزت الحرف علي صدرها وعلقته كوسام يالله علي جمال المعني
تلك المرأه التي أحبت بجنون رغم الظلم الذي تعانيه من المجتمع الذي يجد في حبها هذا الخطيئه بعينها، وربما تمارس نفس الحب كثيرات الا أنهن لايفصحن أو يجاهرن به فيبقي سرا وتبقي هؤلاء النسوة في نظر المجتمع مثاليات وشريفات وعفيفات ،
الا أن تلك المرأه التي أحبت لم يهمها كثيرا كيف ينظر اليها المجتمع وكيف يتعامل معها ؟ لأنها لاتشعرهم فهي بكامل أحاسيسها ومشاعرها مع هذا الرجل الذي أحبته
---------------------------------
----------------------------------
وفي أعتقادي أن الأنسان لايحكم علي أي فتاه أو أمرأه من ملابسها لأننا أصبحنا نساير الموضات العالميه ومن لاترتدي أحدث الموضات يعتبرونها كحيانه وأي كلام ، ويابني اللي بالك منهم دول بيقي شكلهم معروف لكن للأسف الناس بتخلط بين الحابل والنابل وماتقوليش يعني ايه علشان معرفش أنا سمعتها كده

koukawy said...

علي فكره اسلوب الشياكه بتاع زمان كان لبس مكشوف برضو
المهم ان الحكم علي حد من شكله ممكن يبقي ظلم