علشان نبقى اصحاب

كان عندي حب

2011-10-16T02:34:00.000-07:00

كان عندي حب

ذات صباح استيقظت

وتسائلت اين ذهب الحب

ففتحت دولابي وبحثت

وقلبت الأدراج على الأرض

وخلف الباب نظرت فلم اجد شيء

وصرخت ابحث عنه

فأختنق الصوت بحلقي وخرست

هل ضاع الحب

ام مات بسبق الأصرار

ففتحت الراديو ابحث في النشره

هل ذاعوا الخبر على الصبح

قد مات الحب

لكني وجدت اغنيه قديمه عن اجمل حب

وامرأه تشدو بسعاده تحكي عن الحب

فرجعت بعقلي للخلف

ابحث في الماضي عن الحب

فأرتعش القلب من الذكرى

ما اجمل تلك الأيام

ما ابعد تلك الأيام

من قتل الحب

عنيده

2011-09-28T04:29:00.000-07:00

ترفض المرأه حكم الرجل لها بإستمرار ومع ذلك اذا تساهل الرجل مع المرأه وترك الحكم بيدها ثارت عليه بأبشع الصور وبدرجات متفاوته بحكم ثقافتها واخلاقها ولكن في كل الحالات تجد رد فعلا المرأه على حريتها من ابشع الصور
فهل المرأه لا تعرف معنى الحريه
ولا تعرف الغرض الحقيقي للحريه
ام انها تحت ضغط سنوات ماضيه محكومة بعادات وتقاليد واعراف لم تقرها هي ولم توافق عليها غالبا فتقرر ان تنتقم اذا حانت الفرصه والويل كل الويل لما كان في طريقها

فلذلك اخي الرجل اذا قررت ان تمنح المرأه قليل من الحريه فلا تقف في الطريق امامها فأنت اول الخاسرين

لماذا افترقنا

2011-08-11T04:57:00.000-07:00

لماذا افترقنا
واين اختلفنا
وهل كان حبي محض اندفاع
وهل كان حبك خداع وضاع
سنين حاربنا
لأجل الوصول
للحظة تلاقي
وبيت صغير
وحين اجتمعنا
افترقنا وضعنا
وصار الصراخ وسيلة حوار
وصرنا نداري وننكر فشلنا
نحاول نحاول ولكن بيأس
بأن تبقى رشفه في هذا الكأس
كأس السعاده
ولكن لا اعلم
من يلقي قبل الأخر سيفه
وقد اصابه اليأس
وصار الرباط الوحيد
خيط ضعيف

المرأه والرجل علاقات متعدده

2009-08-09T13:49:00.000-07:00

امرأه – رجل – علاقات متعدده

ما هي علاقة المراه بالرجل بالتحديد كتير قوي بنتكلم عن راينا في احدى علاقات المرأه بالرجل صداقتها بيه مثلا او حبها ليه او حاجات تانيه

طيب ايه هي كل انواع العلاقات المرأه بالرجل

انا مش هتكلم عن العلاقات الفرعيه قوي الغير مؤثره زي ابن عم خالتها ولا صاحب ابن اخو جوزها

لا على قد ذاكرتي علاقة المرأه بالرجل تبتدي كده

علاقتها بابوها

علاقتها بأخوها

علاقتها بزميلها

علاقتها بصديقها

علاقتها بحبيبها

علاقتها بخطيبها

علاقتها بزوجها

علاقتها بعشيقها

علاقتها بطليقها

علاقتها بابنها

سيبكم من جوز بنتها ده تأثيره مش كبير عليها

في كل علاقة من دول المرأه بتبقى منتظره حاجات معينه من العلاقه بناء على اللي بتحصل عليه من العلاقه بتتحدد حاجات كتير انطباعها عن العلاقه دي وانطباعها عن الشخص ده ولهفتها على انتقالها على المرحله التانيه

اولها علاقتها بابوها البنت بتخرج للدنيا ضعيفه قوي ومنقاده قوي للشخصيه القويه حواليها علشان كده لو شخصية الأم كانت متسلطه في البيت ده بياثر جدا على البنت وتلاقيها بتتحول لشخصيه عصبيه عنيده وعايزه تاخد نفس وضع امها

ولو كانت شخصية الأب مبتوفرلهاش الحنيه اللي هي منتظراها فده بياثر عليها قوي ويخليها تدور على الحنان البوي في صور كتير حواليها المدرس في المدرسه او الشيخ في الجامع او التلفزيون دلوقتي وممكن حد من الأعمام او الخلان

شخصية الا بالنسبه للبنت بتمثل لها احساس الأمان ماديا ومعنويا ونفسيا وجوده بيخليها تعرف ان فيه حدود والست مهما ادعت العكس هي تفضل ان يكون ليها حاكم وقائد قوي زيها زي اي دوله عايزه تنهض لو مفيش قائد يحكمها صح وهي تتبعه فعلا عمرها ما هتخطو للأمام

يحصل ايه لو الأب صورة مهزوزه او فقد باي الطرق العلاقه التانيه الطبيعيه هي الأخ

علاقة البنت بأخوها هي علاقه متبادله لأنها برغم نظرتها ليه على انه ولد وعنده حريات اكتر وخبره اوسع منها في الشارع والحياه العمليه الا انها دايما بتبص له بالنديه لأنها واثقه انها زيها زيه ده اخوها اللي اتربى معاها وهي مش اقل منه ولا اجهل منه مثلا علشان يبقى هو اقوى منها لكن الغريب ان البنت لو فقدت بشده احساس الأبوه وحست ان الأخ قريب منها وبيسمعلها فعلا بتقرب منه جدا وسرها كله بيبقى معاه الأخ هو الشخصيه اللي ممكن تبقى منتهى التفهم وممكن تكون منتهى الغباء والتعنت يمكن لأنه اكثر اندماجا في الشارع وعارف الشباب اللي زيه بيفكر ازاي ولسه برده مخدش خبرة الب اللي عارف يعني ايه حق البنت انها تتجوز وتعيش حياتها بعكس الأخ اللي بيرفض تماما فكرة ان اخته حد هياخدها في يوم من حياتهم لكن الأخ لو كان جاف اكتر من اللازم ده بيعجل بالعلاقه الجديده المبهره في كتير من الحلات واللي بتعتبر اخطر علاقه في حياة البنت لأنها اول علاقه غير امنه وفي نفس الوقت لسه بدون خبره منها وهي علاقتها بالصديق طبعا الصديق ده بيجي غالبا من العلاقه اللي بتسبقه في الترتيب اللي ذكرناه وهو الزميل

وعلاقة البنت بالزميل هي علاقه فاتره فيها مجاملات ونفاق كتير جدا لأن في الغالب البنت والبنات عامة مبيبطلوش انتقادات لي جنس يعدي جنبهم حتى لو صرصار معدي لازم ينتقدوه ويتريقوا عليه المهم يعني من بين الزملاء عادة بيتميز شخص منهم بأنه بياخد ثقه اكتر من غيره نتيجه موقفه او تعامله مع البنت واعتمادها عليه في عدة مواقف اثبت فيه كرامه بيعدي هنا مرحلة الزميل وبيبقى الصديق

والصديق بقى شخصيه قريبه جدا من البنت خاصة ان البنات عاطفيين بطبعهم وبيحبوا يحكوا كتير عن حياتهم ودنيتهم ماداموا مستريحين ليك ووثقوا فيك والصديق بقى مشكلته انه كرجل بطبعه وغريزته بيبقى صعب عليه انه يفضل حيادي طول الوقت مهما كان لازم في لحظه بيفتكر انها انثى ويبقى حاسس ده علشان كده الولد بيبقى حريص اكتر في صداقته بالبنت برغم ان الناس فاكره العكس

الصديق هو اكتر حد ممكن تحكيله مواقف خاصه جدا ومش قادر تحكيها لأبوك او لأخوكي او حتى لصاحبتك البنت

البنت اللي زيها ممكن تعتب عليها وتديها كلمتين على حاجه عملتها لكن الولد مش بيبقى واخد باله من نقط معينه انها متنفعش للبنت فمبيعرفش انها غلطانه في النقط دي علشان ينبهها ليها ده غير ان الولد بيخلق للبنت اعذار كتير والبنت بتخلق للولد اعذار كتير انما الولد مع ولد مبيخلقوش لبعض عذر واد والبنات بقى هم اصلا بيتلككوا لبعض علشان كل واحده تطلع التانيه مجرمه عايز الحرق بالجزمه

بعد الصديق بقى تيجي المرحله اللي بتبدأ مع تبلور مشاعر الجسد مع الروح احسساسك انك ناقصك حد جواك مش مجرد حد تكلمه انت عايز حد تترمي في حضنه والكلام هنا عن البنات والرجاله كمان كلنا بيجيلنا لحظه ونحس ان مينفعش تكون علاقتنا اخرها حروف محتاجين احساس مادي ودفء بشري

وهنا ممكن قوي يترقى الصديق وياخد نجمه على كتفه ويتحول هو للحبيب

وممكن الصديق يفضل مكانه ويفسح مكان للشخصيه اللي اخدت عقل البنت وبهرتها وخلتها تفكر في الحب بقى بدل الصداقه وساعتها الصديق بيتحول دوره لحلال المشاكل في قصة الحب دي

والبنت هنا عايزه ايه من حبيبها مش عايزه اكتر من انها تحس انه بيحبها وعايزها ومقدرها

3 حاجات بسيطه قوي

لكن للأسف علشانن تترجمهم تلاقيهم مواقف قويه جدا مواقف مش سهله تنجح فيها كلها

وتقنعها انك نجحت كمان والحبيب موقفه بيبقى اصعب كتير لأن اي كلمه بيقولها بتبقى البنت حساسه ليها قوي تعليقه على هدومها على تصرفاتها على اخلاقها على الفاظها حتى على شخصيتها وشخصية اهلها وبيئتهم كل كلمه بتبقى ليها عندها معنى وكل كلمه بيبقى ليها حساب عندها علشان كده لازم الحبيب يحرص قوي في توصيله رايه او اعتراضه على حاجه

مينفعش تقولها لبسك ده شكله كأنه بتاع عاهرات مهما كانت مكياجها فاقع ولا لبسها ضيق

هي اتعودت على ده وانت عارف انها مش قذره ولا حاجه لكن الحماسه بتاخدك علشان تمنعها وتبينلها انه مش عاجبك لكن النتيجه العكسيه انها مبتقتنعش بكلامك لأنها بتاخد الجمله على بعضها اهانتك ليها ورفضك للشيء ده فهي مش هتقبل الأهانه وبالتالي مش هتقبل اعتراضك وقيس على كده بقى وصل رغباتك بهدوء وبساطه وذووووووووق

طبعا الحبيب اللي فهم ال3 طلبات اللي عايزاهم البنت من الحبيب هيفهم ان من ضمنهم قطعا انه يتجوزها مش هنقضيها حب وبس يعني هنا بننتقل لمرحلة الخطيب ده لو كان الخطيب هو الحبيب فعلا لأن ساعات بيبقى الموضوع صالونات ومعرفه سطحيه وهنا الموقف بيبقى حساس اكتر لأنهم مش عارفين بعض نهائي والبنت مرعوبه من اللي هتديله مفاتيح حياتها وتسلم نفسها ليه وهي مش عارفه هو امان ولا لأ ده مجرد واحد قعد عندهم في الصالون شويه بالتالي البنت عايزه منه هذا الخطيب اللي شرفهم في الصالون انه يطمنها بجد مش بمجرد ضحكتين وابتسامة ثقه في نفسه كده انه كويس جدا وهيريحها لازم يتناقش معاها ويتكلم بصراحه ايه رغباته وايه حدوده ايه هو مصر عليه وميقدرش يفقده وايه مكن يتقبله وهي تلاقي المجال انها تحكي معاه وتطلب منه اللي نفسها فيه يعني ميبقاش الموضوع كلام مجاملات وخلاص لحد ما تتجوزها بوعدين تبتدي تعلن فرماناتك بقى

وهنا بقى ندخل في العلاقه الضخمه جدا الزواج ودي اقوى واصعب مرحله في حياة اي بنت لأنها بتنتقل من خانة بنوته بريئه لأمرأه بكل معنى الكلمه من بواطن الأمور

البنت بقى عايزه ايه من جوزها من الأخر

عايزه كل حاجه في الدنيا البنت بتعتبر جوزها هو اول دنيتها واخرها هو الحب والمشاعر والصدق والدفئ والحمايه والجنس والراحه والسند والحاكم الوحيد

من الأخر هي عايزه منه كل المشاعر اللي ممكن تتخيلها مشاعر الأبوه والأخوه والصداقه والحب والزوجيه

هي بترمي وراها كل علاقتها القديمه وحتى لو مش هتقاطعهم يعني لكن مهيبقاش مشاعرها للناس دي كلها زي الول بعد الجواز البنت بتبقى مستسلمه للزوج كأنه هو الدنيا وما فيها ده لو مكانش في حاله رفض ليه من البدايه او جوازه غصب يعني وده ينبه على الزوج انه لازم وحتما ولابد اوعى تتجوز واحده تكون شاكك ولو للحظه انها مش بتحبك

الزوج برده بيبقى مستني من زوجته مشاعر كتير لكن احنا مش جايين نرغي في الرجاله عايزين ايه دي هتحتاج موضوع تاني ومحدش يتريق ويقولي الرجاله عايزه حاجه واحده لا يا جدعان الرجاله مش هو ده كل تفكيرهم

المهم بقى ايه اللي يحصل لو الزوج بقى سقط في امتحانه ده

لو الزوج قرر يبقى حمار ويرفض يديها اي مشاعر من اللي هي مستنياها ولا بقى سند مادي ولا معنوي ولا اي سند خالص

النتيجه احتمال من اتنين

يا تكون البنت قويه وتقرر انها تستعوض ربنا وتخليها في عيالها او تدينها او حياتها الأجتماعيه او اي شيء يشغل وقتها بعد ما فقدت اللي كانت هتملى بيه حياتها ودنيتها

او تكون ضعيفة وتقع في حفرة اقذر ما تكون

وتتعلق بصديق وهمي ما هو في الواقع الا عشيق ولكن بدرجات

في واحده كل خيانتها هي الكلام والحكايات معاه

واحده ممكن توصل لحاجات تانيه كتير كل واحده حسب تربيتها وتدينها واخلاقها وطبعها

والنتيجه في الحالتين سواء وقعت في الخيانه او كانت قويه وفضلت شريفه غالبا بتوصل للنهايه الحتميه بعد شويه الطلاق

وتتحول علاقتها بيه لعلاقة طلاق

وكلنا طبعا عارفين المشاكل اللي بتحصل والمحاكم والخناقات شيء على ماديات وشيء على اطفال

والنتيجه واحده اسره اتدمرت واطفال ضايعين الا من رحم ربي وانتهت قصته في هدوء وده قليل جدا

والست عايزه ايه من طليقها عايزاه يساعد في مصروف ابنها ويكون موجود لو ابنهم احتاجه

ويكون محترم في حياته علشان سمعة ولاده وميحاولش يشوه صورتها في عيون ابنائها وميفهمهومش انها كانت وش الخراب وهي اللي اصرت على انها تشتتكم كده

لا خليك حيادي وخليهم احسن بره القضيه اللي بينكم ياريت يفضل بينكم

بعد علاقة المرأه بكل دول تيجي اخر واحن علاقه فيهم علاقتها بابنها لما لست تبقى هي اللي بتدي كل المشاعر ومن غير ما تستنى مقابل وحتى لو نفسها في مقابل بيكون مجرد مشاعر ومش شرط بنفس المقدار

لما تتحول البنت بتاعة زمان لجبل يستحمل اي شيء علشان طفله يكبر ويعلى قدامها وتفرح بيه

لما تبقى دمعته نار في قلبها لما تبقى تكشيرته سواد في عيونها

وضحكته هي املها في الدنيا

لما الست تبقى عطاء من غير حد

وعموما في كل علاقات الست اجمل ما فيها بصراحه ان اي علاقه من اللي وصفتهم دول لو اديتها مشاعر صادقه بجد وقدمتلها اللي بتحلم بيه فعلا هتلاقيها بتقدملك اكتر بكتير من اللي ممكن تتخيله

ربنا خلقها سكن ورحمه لينا وانيس في دنيتنا وربنا هو الخالق الأعظم سبحانه في خلقه

اللهم لك الحمد ان انعمت علينا بنعمة النساء

عيد ميلادها

2009-05-06T02:50:00.000-07:00

من كام سنه

قلب اتولد

من كام سنه

حبي اتوجد

انا مش هغني كتير واقول

انا بس عايز اعتذر

لو جرحته بالكلام

او حتى قلة الأهتمام

انا نفسي يقبل اعتذاري وينتظر

اني افوق من لعنة الغيره والغضب

في يوم ميلادك حقك انت الأمنيات

لكني هتجرأ واطلب امنيه

هقولها في سري انا

علشان اكيد انت عارفها

من غير ما اقولها انا

كل سنه وانتي طيبه

بحبــــــــــــــــــــــــــــــــــــــــــــــــــــــــــــــــــــــــــك

لما هنموت مين هيفتكرنا

2009-04-28T21:53:00.000-07:00

رحيل الملحن ونقيب الموسيقيين المصريين حسن أبو السعود

العنوان ده لو دخلتم هتشوفوا خبر وفاة الملحن حسن ابو السعود

جايز انا معرفتهوش شخصيا لكن مش شرط اننا نكون عارفين حد بصوره شخصيه علشان نزعل لما يتوفى او نفكر في حاجات كده تيجي على بالنا لما نقرأ الخبر

اللي عايز اقوله وبأختصار اني لما قريت الخبر وقريت اللي مكتوب في الموضوع عنه
المقال حاول يلم - في عدد محدود من السطور – قصة حياة واحداث عمر بني ادم عاش وسط الناس طول عمره معروف ومشهور شاف ناس كتير وعرف ناس كتير ناس حبته وناس عرفته
الله اعلم باللي في قلوب الناس
لكن الغريب اني فكرت في نفسي هو عمر البني ادم كله ينفع يتحكي في صفحه واحده كده
غريبه جدا
مع ان انا متأكد اننا لو قعدنا معاه وسالناه عن نفسه علشان يحكيلنا حياته وذكرياته اكيد هيحكي الف حكايه عاشها في سنين عمره الله يرحمه
لو قعدنا مع الناس اللي اشتغلوا معاه اكيد هيحكوا عنه كتير وليهم معاه ذكريات كتير
لو قعدنا مع اصحابه القدام اللي كان عازمهم يوم وفاته عنده في البيت اكيد ليهم الف ذكرى حلوه والف ضحكه والف موقف رجوله يحكوا عنه
لو قعدنا مع اولاده هيحكولنا عنه ايه ذكريات طفولتهم وشبابهم وحياتهم كلها معاه
,لو قعدنا مع زوجته هتقول لنا عنه ايه, هتفتكر كام ضحكه بينهم ,هتفتكر كام كلمه قالهالها, كام مشكله عدت عليهم وعدوا بيها سوا كام حكايه عرفوها وشافوها
كل واحد عرفه في حياته اكيد شاف جانب من حياته اكيد عرفه وحبه بطريقته وباسلوبه
اللي اعرفه انه كان شخصيه مرحه وطيب حتى ملامحه كده فيها حنيه وطيبه
اللهم اني لا اذكي على الله احد لكني احسبه على خير
فكرت في كل ده وازاي قدروا يلخصوه في صفحه واحده وازاي الناس فعلا بعد ما بتمشي من وسطنا بتتنسي وتبقى مجرد ذكرى صغيره مهما كانوا ومهما عاشوا ومهما شافوا

امال انا بقى لما اموت هيقولوا عني ايه كل اللي هيتكتب عني هو غالبا شهادة وفاتي في السجل المدني
واحد مات
بس كده هو ده اللي هيفضل مني
سألت السؤال ده لأقرب شخصيه منه علشان اعرف ايه رأيها في النقطه دي
وكانت اجابتها مقنعه قوي بالنسبه لي
قالتلي ان ذكراه مش في المجلات ولا في الجرايد مش في البرامج ولا اي حته من دول ذكراه في المئات اللي حضروا دفنته يودعوه بدون نفاق
ذكراه في اعماله وتصرفاته بين الناس
في حب الناس ليه
في كل خير قدمه لحد
يعني الواحد ممكن يبقى ليه ذكرى كويسه في الدنيا بعد ما يموت بعمله الصالح
وافتكرت الحديث النبوي عن النبي (ص) اذا مات ابن ادم انقطع عمله الا من ثلاث صدقة جاريه او علم ينتفع به او ولد صالح يدعو له . او كما قال رسول الله (ص) يعني فعلا لما هنموت ممكن ذكرانا تضيع لو مكانش عندنا حاجه من التلاته دول
مش كل واحد فينا هيخلف دي حاجه نصيب بتاع ربنا
مش كل واحد فينا عنده علم غزير يقدر يفيد بيه الناس وحتى لو عنده مش شرط هيقدر يوصله للناس
لكن على الأقل كل واحد يحاول يعمل اي خير ينتفع بيه الناس بعد موته جايز هي دي الحاجه اللي تبقى لينا
مش بس علشان اسمنا يفضل مذكور لا علشان اسمنا لما يتذكر الناس تدعيلنا بالرحمه والثواب يفضل يذيد في صحيفة اعمالنا

ربنا يكرمكم ويوفق كل حد بيعمل عمل خير
وافكركم بميعاد بؤجة الخير اللي عاملاها خيخه

البوست ده اهداء لمدونة قصص بالهمزه ( ابنة الراحل حسن ابو السعود)ربنا معاها

نادي على محبينك

2009-04-09T01:43:00.000-07:00

نادي على محبينك

ردي عليهم يا سكر

نادي وجاوبي ولو نظره

ده النظره من عينك قادره

تشفي العليل وتجيب فرحه

ردي ولو حتى ببسمه

البسمه من وشك رحمه

تطمن القلب الحيران

تسعد حزين لو كان تعبان

حني على سهران الليل

حني عليه ده بيقول موواويل

حني عليه واسمعي منه

جايز تردي عليه بكلمه

عمال يقول فيكي الأشعار

حبه ومشاعره بتكتب نار

وحروفه من كتر لهيبها

حرقت ايدين اللي كاتبها

لا لقى لعيونك حل بديل

ولا فيه لحبك سحر يشيل

صورتك من القلب يا قادره

لف البلاد يسال ويشوف

يمكن يلاقي في بلد السند

او حتى يمكن بلد الهند

ترياق يخفف من حبه

ويداوي قلبه المتعور

كل الأطبا اجتمعوا براي

دواك وسحرك ونجاتك

لمسة ايديها بخفه وحب

تلمس جبينك ودراعك

لو تحضنك تكفيك العمر

حني عليه بس بنظره

علشان يقوم ويشوف عمره

بدل ما يدفن عمره معاه

مستني يوم عينك تلقاه

ترميله رمش قديم مكسور

علشان في قلبه هيبني بيه سور

يمنع دخول انسان او جان

ملكتي قلبه وعمره يا بنت

حرام عليكي ليه بس العند

قال جايه دلوقتي بتضحك

وتقول بريئه وعمري ما كنت

جنيه بسحر او بشغل

انا بنت غلبانه بريئه

لا ليا دعوه بهند وسند

ولا فاضيه اديله دقيقه

من عمري اللي انا قدمته

لحبيبي في جزيره بعيده

ملكي ومولايا حبيبي

زهرة النار

2009-03-24T06:39:00.001-07:00

زهرة النار

عارفين يعني ايه زهرة النار

يعني شخصيه زي زهرة النار بالظبط

لون خرافي غريب

لمعة تخطف اي قلب

ضحكه تنزع كل عقل

رقه تخطف كل قلب

بس يا خساره مش امان

نارها تحرق اي حد

لو تقرب منها تخطفك

لو تحب تحطها

في ايديك ثواني

تلسعك او تحرقك

لمعة في عينيك تعجبك

لو تقرب تلتمس نظره بريئه

بس لو قلبك جريء

مد يادك ناحية الزهره العجيبه

تقتلك

بعيون بريئه

صوتها عالي بشكل يخنق

اصله مش عالي زي طبل

صوتها عالي لأنه مرعب

صوتها عالي لأنه حق

بس لو كانت تغير

طبعها وتخف حبه

من الزعيق وكده والخناق

بس لو كانت تبطل تبهر الكل بجمالها

بلون عيونها

وشعرها المنكوش في حالة مش بريئه لكن رقيقه

والخلاصه يا صاحبي هي

انها زهره ناريه

ليها اضرارها ونفعها

لا تفارقها ولا تصاحبها

خلي قلبك يرشدك

لو صحيح حسيته خايف منها

ابعد وسيبها

لو لقيته محتاجلها اقرب وجيبها

ومن شعورها جرها

وسيبك بقى من نخعها

وتهديداتها

لو صحيح حسيت بحب

حبها

اصلها وبرغم نارها

لو تحب هتطفي نارها عشان حبيبها

بحلم لبكره

2009-01-28T01:16:00.000-08:00

صحي من النوم على صوت المنبه
ميعاد الشغل بدري قوي – كلمه قالها لنفسه وهو بيقوم من السرير
التفت ناحيتها بعينه لقاها غرقانه في النوم
قام من السرير راح الحمام واتوضا وصلى الفجر وبدأ يلبس هدومه فجأه حست بيه لما فتح النور
قلقت من النوم وسالته والنوم مالي حروفها وعيونها هي الساعه كام دلوقتي
ضحك وقالها الساعه لسه بدري قوي عليكي نامي بس انتي
قامت من السرير وهي بتضحك وقالتله استنى بس هاعملك حاجه تفطر بيها
دخلت المطبخ وغابت شويه ورجعت في ايدها كيكه من بتاعة امبارح وكوباية لبن
طيب وانتي مش هتاكلي حاجه
لااااااا انا لسه بدري على ما افطر كل انت علشان تروح الشغل
وقعدت على السرير وهوووب كانت في سابع نومه تاني
كمل لبسه وفطر بسرعه ونزل راح شغله

عدى اليوم عادي خالص
وبالليل قعدوا يتفرجوا على الفيلم في التلفزيون هو عنيه نامت خلاص وهي لسه قدامها سهره طويله
قعدت تهزر وتصحيه وهو كان خلاص سلم النمر واداها قالتله تعالى نام جوه علشان متبردش
بصلها بنص عين وقالها لأ هنام هنا احلى ورمى راسه في حضنها ونام
سرحت مع الفيلم وايدها بتملس على شعره
واليوم عدى زي ايام كتير شبه بعض
بس المهم انها كانت ايام حلوه قوي

عدت سنه على خطوبتي تصدقوا!!!ازاي

2008-10-26T05:42:00.000-07:00

زي النهارده من سنه كانت خطوبتي
انا مش مصدق ان عدى سنه كامله على الحلم اللي اتمنيته وتعبت علشانه قوي
الحمد لله
عموما انا اتعلمت من اللي حصل
ان بالصبر تنال كل ما تتمنى
ان ربنا هو اللي عالم بالغيب وهو اللي عالم بالصح لينا ايه
اني مهما حد وقف في طريقي عمره ما هيمنع ارادة ربنا
ان رزقي على ربنا ومهما حسيت بالضيق فبكره اكيد ربنا هيفرجها من عنده

عايز اقولك كل سنه وانتي طيبه
واتمنى اني اكون مجرحتكيش ابدا واني اسعدك زي ما اسعدتيني

ربنا يحفظك ليا
والسنه الجايه نكون بنحتفل بزواجنا
عقبالكم جميعا

انا مش فرعون

2008-10-23T01:29:00.000-07:00

ردا على بوست عند دعاء مواجهات رحت كاتب كومنت على كلامها اللي شدني قوي واسلوبها الفزيييييع

وبعد كده هي اخدت الكومنت ونشرته عندها مشكوره طبعا واحرجتني بزوقها الفزيييع برده

ومن تعليقات الناس بقى فكرت اكتب حاجه تاني ردا على الرد

انا مش فرعون

انا بس ساعات بعيش بجنون

انا شاب وعايش مملكتي

مش طاغي وظالم ولا قاسي

انا بس بحاول اتمنظر

وارسم في خيالكم كام منظر

عن وحش وعايش في خيالي

مش هي دي صورتي ولا حالي

لكن احيانا كده افكر

لو كنت انا ظالم او قادر

كان ايه هيبقى

شكلي وحال

انا يمكن اكون بكدب برده

ويكون في كلامي حقيقه خافيه

جايز يطلع جوايا شيطان

او يمكن جني في ارض الجان

اوقات انا بحلم ابقى شرير

وبجرب المس حد السيف

واقيس كام درع على هدومي

يمكن يعجبني الدور واخده

واتحول فارس بس اسود

انا عارف يمكن هاصدمكم

لكن وبرغم اني انا طيب

لكن جوايا وبصراحه

بركان من نار عايز يخرج

فأستحملوا مني بقى غباوتي

لو يوم كلماتي صدمتكم

====================

تحياتي لكل الناس اللي عرفتهم في التدوين وكل يوم بقرب ليهم اكتر

وتحيه خاصه لأخويا سوووو

وهو عارف ليه

اعشق كفك

2008-08-03T23:38:00.000-07:00

اعشق كفك
اذوب والقي برأسي في حضنك
اذوب والقي بحملي عليكي
واسند راسي اليكي واحلم
ارى في عيونك
كلام يجسد
حياتي وعمري وحلمي واملي
ارى في عيونك كلمة احبك
اراها تلملم جراحي والمي
وفي كفك البريء المنمنم
احس الحياة تنبض في كفي
وحين اراكي كأني اراكي لأول مرة
فاذكر لقائنا
واذكر كلامنا
واذكر اني حسبتك اخرى
حسبتك ملاكا يصوره عقلي
حسبتك طيفا لحلمي المكرر
حسبتك خيالا واملا بعيدا
حسبتك بعيدة عني يا عمري
لكني وجدتك غير ما حسبتك
ملاكا وبشرا في جسدا توحد
خيالي وطيفي تجسد انثى
وحين رايت في عينك كلمة احبك
صرخت لخوفي ان افقدكي
صرخت لأني تعودت افقد
تعودت اني لا اطلب حقي
ولكن لأجلك وقفت بشده
وقفت لأنزع عني حمولي
فقط لدقائق سأنزع قيدي
لأني سأضعك داخل قلبي
ومن ثم ارجع للأبس درعي
وقيدي وحملي
وبكي سوف ارحل
تزيحين عني عنائي وهمي
وتمحين جرحي وفكري الممزق
سأقبل حملي والمي وهمي
لأني حبيبتي بكي اتصبر
وهل تحسبين الجراح في صدري
ستؤلم قلبي وتحني ظهري
لقد شفي قلبي بحبك انتي
وقد شد ظهري بكفك انتي
لقد بت بطلا من الصخر قد
لأني يا عمري
وضعتك في قلبي
فمثلي كجسد وانتي الروح
فأذا ما غادرتي اموت ولا ابقى

يقتلني جنونك سيدتي

2008-04-07T10:37:00.000-07:00

يقتلني جنونك سيدتي
يقتلني الشك في كلماتك
تقتلني دموعك همساتك
يقتلني ما لا اعرفه
من افكار توسس بها الشياطين في عقلك
يقتلني ان لا اقدر ان ادفع عني محاكمتي
من حق الجاني ان يعلن سبب برائته
من حقي ارفع اسبابي
من حقي احضر محكمتي
وانا قادر على مجادلتك
وكيف العدل يا سيدتي
وانتي القاضي والجلاد
وانتي دفاعي وشهودي
اسوار القفص عالية
وتمنعني
فلا قلب ولا صوت يساندني
وكيف انادي من هنا
وهذا القيد يقتلني
تحاكمني
وقد ملكت مرافعتي وبرهاني
تحاكمني
وهي تعلم بأني فقدت كلماتي
مع احساسي بالحب
تحاكمني ولا املك لها ردا
حسبتك انتي شاهدتي
لقد احضرت توكيلا
وفي السجلات قيدته
انا منكي ولكي وحدك
وانتي الأن محاميتي
فلن اصرخ
ولن اشجب
ولن اطالبك بالرحمه
فمحكمتك
هي ارحم محاكمة
فأنتي الأن قاضيتي
وانتي الأن محاميتي

تغارين من امرأه
سقطت على اوراقي ومحبرتي
ولوح كتابتي البارد
وذكرى فاتت من الزمن
وكيف تغار مولاتي
وكيف تشك في صدقي
وانا لا املك من الدنيا
ولا ذكرى
ولا امل
سوى عيناك وحدهم
انا لا اعرف هنا وطن
ولا عشق ولا امل
سوى انتي
تغارين من امرأة
ذكرت جمال منظرها
وانا لازلت اوصفك
في كل يوم بأنك عيدي
وتنهيدي
وشمسي التي اتمنى من الله الا تغيبي
وهل يعقل ان تمحو اي عابرة
في مخيلتي
عيون بها القلب ينادي
ويتنهد
وتتباعد به الدقات
وتتعثر نبضاته
من الشوق لهمستك

انا لن اعاود ندائاتي
ولن اصرخ في قفصي
وانتظر حكمك الحاني
ولن اصرخ اذا امرتي بقطع الراس ووريدي
ولن اصرخ انا وقلبي
يضخ الدم للأرض
على ارضية السجان
فلن يذهب دمي هدرا
سيكتب اسمك الغالي
على جدران مقبرتي

وساعتها ستتساوى كل اشيائي
فجزاء ذكرايي التي احزنتك
سأكون انا ايضا ذكرى
فلا تحزني بعدي
ولا تذرفي الدمع
فهذا اقل عقاب

بحبك

ربنا خلقنا كده ....هو فيه احسن من كده؟؟؟!!!الحمدلله

2008-03-31T09:01:00.000-07:00

هنتكلم المره دي عن سؤال شفته مره في احدى المدونات وكانت بتساله واحده وبصراحه مش فاكر هي مين ولا فاكر انهي مدونه اصلا وياريت لما صاحبة المدونه والسؤال تشوفها مش تقتلني لأني بجد مش فاكر انا شفته فين
واديني بقول اهو من الأول
السؤال كان ببساطه حد بيسال هو ليه انتشرت قوي فكرة اللبس الجديده اللي هي عباره عن بدي كارينا وطرحه صغننه عليها وبنطلون جينز محزق

هل ده حجاب ولا روشنه ولا ايه بالظبط
انا بقى عايز علشان اجاوب احسب الأمور من الأول خالص وبصراحه كده ومن غير تزويق خالص
اولا كلنا عارفين ان ربنا خلقنا رجالا ونساء كل له طبيعه مختلفه بعيدا بقى عن كل المساواه والعدل وازاي تفرقوا بينهم وكلنا بشر زي بعض ومفيش فرق بين راجل وست
انا بقول اهو هاتكلم بصراحه وعلى بلاطه
ربنا خلق الراجل له طباع وخصائص معينه عززها فيه بخصائص جسديه مناسبه ليها
وخلق الست بصفات معينه برده وعززها بصفات جسديه مناسبه ليها
لأن ربنا هو اعلم بما يتناسب مع كل خلقه لأنه في الأول وفي الأخر هو خلق الله

ماشي اتفقنا
ربنا خلق الست اصلا سكن وراحه للرجل وجعل فيها حاجات يحتاجها الرجل
وخلق الرجل امان وحمايه ويمكن كمان راعي للمرأه وجعل فيه حاجات تحتاجها المرأه

الست بطبعها اصلا تميل لأنها تشعر بجمالها وانوثتها بغض النظر عن كل المهاترات بتاعة ازاي تبص للست على انها جسد فقط وكده الجمال مش جسد بس ولا حاجه لكن اول حاجه في جمال اي واحده هو جمالها الشكلي طبعا
فمن غير مماطله كده كل ست بتحب تبقى جميله وتحب تحس بجمالها ده في عيون الأخرين ولأن الأخرين رجال ونساء
النساء كل واحده عايزه تشعر انها الأجمل بالتالي مفيش واحده هتدي التانيه احساس انها معجبه بجمالها يعني
يتفضل الرجل اللي عينه بتصرخ بالكلام لما يشوف واحده حلوه طبعا

لكن بتيجي الدين والأخلاق والتربيه يعملوا فلتر على كل ده

ده عيب وده مش عيب

ده حرام وده مش حرام

ده مناسب وده مش مناسب
وكل واحده وحسب درجة غرس التعاليم دي جواها ومفهومه ليها
لكن في الأخر كلكم سواء

بتحبوا برده تشعروا بجمالكم

وعلى الوجه الأخر الرجل برده
برغم التحضر والتعليم والثقافه والذكاء وكل ده

يبقى اول حاجه تعزز ثقته بنفسه هو احساسه بقوته وسيطرته
وبالذات قوته الجسديه
هي كده اول حاجه بنمتلكها هي اجسادنا علشان كده هي اكتر حاجه بنستمتع بالتباهي بيها
علشان كده هتلاقي كل راجل نفسه يبقى اقوى ويكون سيطرته اعظم
وكل ست نفسها تكون الأجمل وتكون سيطرتها برده اقوى لكن بجمالها و مدى اهتمام ورغبة الناس فيها

بس بقى الفلتر هو اللي بيفرق واحده عن التانيه هو اللي بيفرق واحده مستعده تمشي بالمايوه في ميدان التحرير من غير ما تحس بأي مشكله وواحده لازم تغطي كل شعره فيها حتى لو في البلكونه بتاعتها

مش معنى كده دي جواها شيطان ودي جواها ملاك
لكن كل واحده الفلتر بتاعها بيختلف دي جواها ست وعايزه تحس بأنوثتها ودي برده زيها بدون اي فرق غير في الفلتر
نيجي بقى لحل السؤال اللي انكتب ده كله علشانه

لما تبص لواحده جواها حريقه من جوه عايزه تحس بكل حته جميله في جسمها وعايزه تبقى احلى في ظل موجة العري والفضائيات دي كلها وفي نفس الوقت جواها مخزون اخلاق والتزام ديني واداب اتربت عليها منعوها تتجه للي هي حاسه بيه من كتر مشاهدتها للجو المبهر ده في الأعلام وغيره

يبقى الحل ايه بين البينين
البس حاجه مقفوله لحد كف ايدي وفي نفس الوقت كأني مش لابسه حاجه بدي شبه شفاف مجسم كل نقطه فيها
بنطلون مداري كل رجليها لحد صوابعها المتغطيه بالجزمه مع انه ملزق عليها وكل تضاريسها يمكن قياسها بالمللي
وطرحه على اساس ان الحجاب هو مجرد غطاء لبصيلات الشعر

مش بقول انها مش كويسه بالعكس ده اكبر دليل انها من جواها عايزه متغلطش
عايزه تمشي على الطريق الصح متخرجش منه
لكن جواها بركان بيزيد مع كل لحظه بتمر مع كل فيلم بيزرع قيمه جديده للعري والأنحلال
مع كل اغنيه وممثله ومطربه مشهوره والناس والرجال كلهم هيموتوا عليها علشان لبست فستان عرى رجليها لحد اقصى حد سمحت بيه الرقابه

اعتقد الغلطه غلطة كل راجل زوج واب واخ سمح لنفسه يظهر للبنت دي ان القيمه الوحيده ليها هي في انها تبقى زي الناس دي
واحب اضيف اخيرا اني مش معنى كلامي ان كل عقل الست منحصر في ده لا طبعا انا بتكلم عن جانب اساسي في عقلها لكن مش هو السواد الأعظم داخل عقلها
بالعكس الست دلوقتي بالذات بقت اكتر اهتماما بالدراسه والعلم والعمل وبقت انجح كتير وبقت عندها استعداد للضغوط والتحمل اكتر من الراجل اللي عايز يخلص الشغل يروح ينام او يقعد على القهوه في حين هي عايزه تخلص الشغل ترجع تحضر الأكل وتجهز البيت وتذاكر للولاد وتجهز نفسها لشغل بكره وتديله حقوقه وتعمل خمستلاف حاجه وترجع حد يقولي عقلها صغير ده لو عقلها صغير كنا زمانا ضعنا من زمان

مع خالص حبي وتقديري

المزز..... المزز.... المزز

2008-03-25T04:33:00.000-07:00

عفوا لقد فقدنا الحياء

عارفين حاجه غريبه قوي بتحصل في مجتمعنا المزز

كلمه بقوله كتير وناس كتير بتقولها كتير ليه بقى بنقولها كتير

علشان البلد بقت مليانه مزز
الأول مكانش الوضع كده كان المزز دي حاجه مش كل شويه نلاقيها كده كانت لما تعدي مزه في حتت معينه بس مش موجودين في كل حته زي دلوقتي تلاقي الناس هتتهبل عليها
دلوقتي بقى العدد في الليمون

طيب يعني ايه مزه

يعني بنت حلوه جسم مرسوم رسمه حلوه كده طبعا ازاي نعرف انه مصبوب حلو الا اذا هي اتبرعت وعرضت اجزاء منه مكشوفه خالص والباقي بيتم عرضه بطريقة الشفافيه

يعني اللبس لازم يكون كأنها مش لابسه من الأخر ضيق ومجسم ويخليك عايز تمد ايدك تتأكد انه ده مش مجرد دهان ملون على جلدها وخلاص

الحركات كلها نعومه الضحكه بجحه وعاليه وغالبا وقحه
التعامل بمنتهى العجرفه لأنها عارفه انها عامله زي حتة اللحمه عند الجزار الكل هيموت عليها والناس يا عيني هفتانه وعايزه تتغذى فطبعا بتتأنعر على كيفها

الشغل غالبا بيكون شغلها معتمد على جمالها وجمال جسمها واستعدادها لتقديم التنازلات الممكنه لجذب الزبون
فغالبا تلاقيهم شغالين في حاجات تسويقيه او سكرتاريه او او او الأمثله كتير

طب ليه بقى العدد بقى في الليمون ومبقتش المواضيع محصوره على طبقه معينه او تربيه معينه الموضوع بقى في كل شارع
كله عايز يبقى مزه ويمكن كمان مزه صايعه
اللبس بقى كله لبس مزز طول ما انت ماشي لو راجل غض بصرك هتغض عشر مرات وتبص عشرين مره مش عايزكم تياسوا ربنا هيوفقكم لو نيتكم صادقه في غض البصر بس هي المواضيع عايزه شوية عزيمه

نيجي بقى للأسباب اللي خلت تقريبا 90% من بناتنا الحلوين يبقوا بالمنظر ده وعلى فكره انا بقصد مسلمين ومسيحين محدش يقولي المسلمين بس لأن حتى المسيحين اصلا مش بيلبسوا كده دي هوجه وصابت الجميع المهم

لما تحاول تسال ازاي البنت دي نزلت من بيتها بالمنظر ده وابوها مش بيعترض وامها مش بتخاف لترجعلها مقتوله
تلاقي الأجابه الجاهزه حاجه من دول

· البنت بتحب تلبس حلو وهي دي الموضه اللي موجوده ومفيش لبس غير كده وانا مش بحب افرض عليها حاجه سايبها تختار بحريه وديموقراطيه
نعم ياخويا هي الديموقراطيه انك تسيبها تعمل الغلط اللي هيوديها في داهيه وتقولي انا ربيتها كويس ومش خايف عليها ليه يعني عايشين في يوتوبيا الناس بقت عامله زي الكلاب في الشوارع
معلش يعني هاتلي واحده مبتتعاكسشي في الشارع هتقولي طيب ما المحجبه بتتعاكس يبقى فرقت ايه
فرقت ان اللي مش محجبه هتتعاكس بسفاله اكتر وببجاحه اكتر تصل في معظم الحالات لمد الأيد بمنتهى السفاله ومحدش هيحوش عنها كل الناس هتنفض وتقولك خلي البيه ال....اللي سابها تنزل كده يبقى يجي يلحقها بقى
ده عن الأهل في البيت ولما تسالها هي تقولك اصل هي دي الموضه اشمعنى انا وبعدين هعمل ايه الناس كلها بتلبس كده وعايزه ابقى حلوه
اقولها ايه دي بس يعني انتي معندكيش تفكير شخصي خالص كله على طريقة الأخرين واقلب
مفيش عندك تفكير تقدير للأمور التزام بدين

· حاجه تانيه بقى واجابه تفقع المراره تقولك ايه اصلها عايزه تتجوز ولازم تلبس علشان العرسان تجيها تلبس اه تقلع لأ يا ناس
على اسا ايه يعني اللبس العريان والمنيل ده هيجيب عريس على اساس انها هتمشي زي فتيات الليل في الشارع الرجاله هتريل عليها هوب هيجوا يخطبوها طيب عفوا يعني انت تقبل ان بنتك تتجوز واحد كل همه انها تبقى جسمها حلو وانتي تقبلي تتحولي الي مجرد سلعه بتتعرض كل حته فيها علشان المشتري يجي يتفرج

ونرجع نشتكي من المعاكسات ويقولك ازاي معندوش اخت بنت لا يا اختي عنده وبقت مهزله برده هو وسط اصحابه بيعاكس بنت تانيه والأتفاق الغير معلن احنا نعاكس بنات الناس لكن اخواتنا في شلتنا ميتعاكسوش يعني انا اعاكس كل البنات ما عدا اختك وانت برده كذلك
واللي يعرف يلم معزته يبقى هو الجدع بقى
وده بيحصل لأنه ميقدرش يحجر على حريتها اللبسيه وابوها نفسه الله يهديه معندهوش مانع ان بنته نازله باللبس ده

مبقتش عارف ايه اللي خلى الناس فقدت الحياء كده
واصلا ازاي البنت بيجيلها بجاحه تلبس كأنها مش لابسه كده
انا بقول هي بتيجي بالتدريب يعني وهي خمس سنين ولسه طفله مفيش مشكله بس تلاقي اهلها بيلبسوها كأنها عروسه عندها تلاتين سنه وكل ما تكبر اللبس اللي عامل زي لبس العاهرات يبقى حلو قوي عليها اصلها طفله مفيش مشكله وكل يوم بتكبر ولسه اللبس مبيتغيرش والأهل شايفنها طفله تلاتين سنه وبتلبس على انها طفله

اقولكم انا ماليش دعوه لحسن المزز ده حوار جامد قوي ولسه عايز اقول فيه كتير وانا كده هاروح وراء الشمس

سلااااااااااااااااام

صديق

2008-02-13T04:39:00.000-08:00

صديق

عارفين يعني ايه معنى الصديق
يعني قلب كبير قريب
جوه منه تعيش تغني
جوه قلبه تعيش تموت انت حر
اللي جواك تفتحه قدام عينيه
مش تخاف او تنكسف
هو منك وانت منه
جوه عقله تلاقي حل المشكله
جوه قلبه تلاقي حضن يطمنك
وانت جنبه مش تخاف ابدا من الناس كلها
وانت جنبه ترسم الأحلام معاه
مش مهم ولد وبنت
مش مهم النوع يكون مهما يكون
المهم انه صديق جوه قلبك اتكتب
اسمه بحروف من دهب
وفي ملامحه تشوف ملامحك
وفي حكايته تحس انك كل حاجه يحسها بتحسها
كل ما تحكي معاه يسمع كلامك
واما يوم خسيس يقولك انه مش صاحبك
وان من حقك تسيبه
وانه خاين او اناني
وانت عارفه مش كده
شد من جيبك سيوفك
او سلاحك مهما كان
واغرسه في قلب الجبان
اللي قالك كل ده
اوعى يوم صاحبك تسيبه
اوع يوم تغدر حبيبك
اوعى يوم تنسى الليالي السهراني
اوعى تنسوا لما يحكيلك جراحه
شد ازره واسنده
جوه قلبك احضنه
واما يوم يقسى عليك
او يضايقك يخنقك
متقولش غور زهقتني
اصلك انت هيجي يوم وتخنقه
بحكايه بايخه من حكايات الهوى
والبنت ديه تجرحك تيجي تقوله
ودي كمان تستلوحك تجري تقوله
وهو صابر يسمعك
حقه برده تسمعه
حقه انك لما يزهق او يغلس
تصبر انت كمان شويه
وافتكر كل الكلام الحلو عندك
مش تخلي كلامك الحلو لحبيبتك وحدها
خلي حته للصديق اللي شاف وياك سنين هم وقرف
خلي حبه للي شال عنك همومك قبل ما تجيلك حبيبتك تفرحك

كنت عايز اقول بس ان ساعات ناس بتكون في حياتنا بتدخل كده تنط جوه قلبنا مش بقول على الحب والعشق لا في ناس بتكون اصدقاء
والصديق عمله نادره قوي
صعب تلاقي حد يحس بيك من غير مقابل
لما بنحب ونعشق الحب بيخلينا نضحي علشان حبايبنا وده بالغريزه الصداقه بقى حب وتضحيه بدون غريزه يعني حب خالص صافي بدون مقابل طبعا مش صداقات المصالح
احلى صداقه لما بيكون صديقك تحس طيبته في كل كلمه يقولهالك
يعني تحس انه بيكلمك من غير اي كدب او حوارات وياريت لو كل واحد عند صديق يحمد ربنا قوي انه رزقه بصديق زي ده
انا كتبت البوست ده علشان الحمد لله انا فكرت لقيت عندي اصدقاء جمال قوي وجدعان جدا معايا
اتمى فعلا اكون صديق وفي ليهم واردلهم جزء من حبهم ده
تحياتي

ملهمتي ......اعمل حطاب في الغابه

2008-02-11T04:33:00.000-08:00

ملهمتي
حطًاب لا املك سحر الكلمات
لا اعرف كي اخط حروف تغزل عشق وحكايات
لا املك لغة غير لغات الصمت
لا انطق غير الطرقات على الأغصان الميته
لا املك من الحان الحب
لا ادرك حتى معنى العشق
واذا قابلت في غاباتي رائحة الورد
منها استنكرت

حتى قابلت
من زهر الأرض
رائحة سلبت مني العقل
الوان زرعت في عيني معاني الحب
وذهلت حين عرفت
الزهرة تملك شفتان
ولسان يقطر شهد

والشفة الحمراء دموية اللون
تخرج كلمات من قلب القلب
كلمات تنزف بالألحان
وبطعم الورد

وتحول قلبي الجاف كغابته
وكانه وجد اليوم غايته
اصبحت اقول الشعر
وانا يا سيدتي لا املك شعر
لا احسن رص الكلمات على الأسطر
لا ادرك معنى الأوزان ولا قوانين الشعر

لكني اليوم اقول الشعر
هل يعقل ان يخرج شعر من هذا القلب
حجري اللون
الحق اقول فهذا الشعر
لم يخرج يوما من قلبي يا سيدتي
قد خرج الشعر من عينيك
من صوت الأهات في تنهيدة قلب
قلب ماسي
من دمعة عين ما اجمل هذى العين
ملهمتي انت
فالشعر اليك
اكتبه انا بيدي
من عينيك
الى عينيك

والبحر عميق بين القلبين
يفصلني عنك البحر وبلاد الغرب
وبلاد الشرق

واليوم تسافر ملهمتي
في حضن ملاك يخطفها
وانا لا املك ان اعترض طريقهما
يكفيني الدمعة في العينين
يكفيني ما صاب القلب

مولاتي اكرهك اليوم
فاليوم تسافر مولاتي بعد ان ضعف القلب
ودموعك حولت القلب الصخري
الى قلب عادي
ينبض ويحب
يعشق ويذوب

لكن وعد مني وسيظل
سيعود القلب الحجري
ويموت القلب العادي
مولاتي وداعا

مولاتي لكي استسلمت

خان .......يخون........خيانه.............يبقى خاين

2007-12-26T03:35:00.000-08:00

طبعا انا كنت محتار اكتب عن ايه

بس لقيت اني كنت كاتب لنفسي ملاحظه من زمان قوي اني اكتب عن موضوع الخيانه

ولقيت اني لسه مكتبش كمالة السؤال بتاع هيخونه ولا لأ؟

ولقيت كمان نفسي شايف كام حاجه كده قدامي خلتني افكر في بوست عن الخيانه

بس كنت مكسل لحد ما حصل موقف النهارده خلاني لازم اكتب البوست ده النهارده

يعني ايه خيانه

خيانه اني اعمل حاجه يرفضها الشخص اللي بخونه من غير علمه تأذيه بشكل ما

جايز هو تعريف مش دقيق لكن اهو ده ممكن نعتبره تعريف

المهم اني النهارده كنت بتكلم مع شخص ما من فتره مش قابلته وفي وسط الكلام لقيته معنى كلامه بمنتهى الوضوح كده انه شايف اني شخص خاين مش ليه هو لكن لحد تاني

وبصراحه كده انا اتصدمت من الكلام قوي الحد اللي هو خايف عليه ده يبقى غ حبيبتي

ايوه هو شايف اني خاين الفكره اللي حبيت اقولها هنا مين قال اني ملاك وعمري ما بغلط لأ يا ناس انا بشر واكيد بغلط برده وهي تغير عليا جدا لكن هل تفتكروا اني بعمل حاجه من وراها او بخدعها او بعتبر الخيانه نوع من التسليه

لما لقيت نفسي بكتب في المدونات واعرف بنات كتير هنا وتاء التأنيث كترت عندنا هنا قوي كان لازم اني اعرفها بالمدونه صحيح انا كنت عامل المدونه ليا لوحدي محدش يعرفها من معارفي خالص وكأنها جزيره بتاعتي لكن مكانش ينفع اني مش اقول لها عنها برغم اني كنت متوقع انها تتضايق من اني عارف كل الناس دي لكن عارفين لما صارحتها لقيتها بتعمل ايه

لقيتها بتشجعني وتسألني عن كتاباتي

ولقيتها بتتعامل مع الموضوع بحياديه جميله ومفيش مشكله خالص برغم انها بتشوف الكومنت بتاع الناس وبتشوف ردودي عليهم

طبعا الوضع كده بقى اجمل لأني مفيش في دماغي مشكله وهم انها تكتشف الموضوع من ورايا انا اللي صارحتها لأن الصراحه هي اول سكة السلامه

نرجع بقى لإجابة السؤال يا ترى هيخونها ولا لأ

هو جاوب وسألها: تقصدي ايه بالخيانه؟

هل قصدك اني لما اشوف واحده حلوه في الشارع واقول انها حلوه يبقى كده بخونك

ولا لما اتفرج على فيلم اجنبي والبطله تبقى حلوه يبقى كده بخونك ولا لما اتكلم مع بنت تانيه واهزر يبقى بخونك ولا لما امشي اعاكس البنات في الشارع ولا لما عمل علاقه مع ست تانيه ولا ولا ولا

في مليون معنى للخيانه

لكن يا ترى ايه هو المعنى اللي انتي هتعتبريه خيانه

مش عارف علشان كده انا هاتعامل على المعنى اللي انا موافقق عليه

اني معملش حاجه تجرحك او تهينك من وراكي

اني عمري ما هاخبي عنك حاجه

وبكده ابقى مش بخونك ولو خنتك هتعرفي

وساعتها تقدري تحكمي

واخر حاجه في البوست بقى

هو سؤال ليه الناس بتخون

الخيانه مش صفه ذكوريه فقط الخيانه موجوده عند الناس كلها

مش هاقول على كام مره شفت ستات متجوزه وبتخون بأقذر الطرق وعلاقات سافله وطبعا مش محتاج اتكلم عن خيانات الرجاله

مره لقيت مكسوفه معلقه عند فريده ان الراجل زي الكلب لو لقى لقمه متعاصه خرا هيميل عليها برده

تعبير مقرف بس معاها حق

هي شايفه انها بتشتم الراجل الخاين

لكن انا شايف انها جمله بليغه جدا لأنها برده وصفت الست السافله اللي سمحت لنفسها بأنها تكون لقمه متعاصه خرا ومرميه في الأرض بدون قيمه ولا كرامه ايوه هو غلطان انه ميل عليها لكن برده هي كمان زباله يعني

وفي الأخر مش عايز حد يقول اصل السبب ان الست اهملت جوزها او ضغوط الحياه

اكيد في سبب حقيقي وواقعي

بس احنا مش شايفينه

انا عندي نظريه في الموضوع ده بس هاخليها لنفسي دلوقتي

وهاقولها بعد ما اسمع رأي الناس كلها في الخيانه واسبابها

تحياتي للجميع

وخصوصا للشخصيه اللي اتهمتني النهارده بأني شخص خاين

سلااااااااااااااااااااااااااااااااااااااااااااااام

عقلك حبيبتي هو كنز لا انكره

2007-11-09T05:56:00.000-08:00

لماذا تهتم بشكلي ولا تدرك عقلي

كتير قوي بنلاحظ اليومين دول موضوع وفكره منتشره قوي ناس كتيره بتتناقش فيها

نظرة الرجل للست على انها مجرد انثى جميله بغض النظر تماما عن عقلها وتفكيرها
الموضوع فيه يجي خمسميت ناحيه رأي البنات والستات ورأي الشباب والرجاله وراي الدين
ورأي الغرب ورأي اجدادنا
ورأي عادتنا وتقاليدنا
وفيه اهم حاجه الواقع العملي اللي هو اصبح عباره عن خليط من كل اللي فات ده كله

نبتدي طبعا برأي البنات والستات
ليه الست بقت شايفه ان الراجل مش بيهتم بعقلها خالص وكل هدفه جمالها وانوثتها
ولاغي تفكيرها سواء الرجل ده ابوها او اخوها او حبيبها او زوجها او زميلها في العمل او حتى سواق الميكروباص اللي بتركبه وهي رايحه كليتها او شغلها

ربنا سبحانه وتعالى لما خلق كل كائن خلقه بصفات معينه
مفيش حاجه اسمها اصل ربنا خلقنا زي بعض والا ايه لزمة التفرقه في الأسم
كل واحد ليه صفاته وطباعه وخصائصه
لما ربنا خلق امنا حواء كانت علشان تؤنس وحدت سيدنا آدم يعني تخيل ان ربنا عارف ان هو خلق آدم محتاج لزوجته ومينفعش يكتفي بمتع الجنه من انهار وطعام ومناظر خلابه والله اعلم بما في الجنه لكن لازم له انسانه جنبه

طيب هو احتياجه ليها مجرد احتياج رغبه فقط ولا في احتياجات اخرى

الستات بتقول ان الرجاله لغوا عقولنا وحجروا علينا والراجل ازاي يعاملنا كده
انا معترف ان في اتجاه كبير عند الرجاله بيقول كده "الست عقلها مش متزن قوي وان الست هي انثى فقط مش انسان عاقل زينا"
طيب ليه الناس بتقول كده هو ده اعتقاد الرجاله عملته وصدقته من نفسها كده بس
اعتقد يعني ان فيه كتير من الستات شاركوا بدور هايل في تثبيت المعلومه دي عند الرجاله
تعالي بصي كده على شخصيات معينه في مجتمعاتنا من الستات هتلاقي انها قررت انها مجرد وسيلة اثاره
متعرفش تعمل حاجه تانيه ولأن ده هو اللي ظاهر على الوش فبيدي انطباع ان هو ده الواقع الحقيقي

مش معنى كده اني بحمل الغلط للست لكن بقول انها شاركت في الغلط

تعالى لرأي الرجاله
الراجل شايف انه هو اقوى والمفروض انه اذكى واحسن ازاي الست تكون اذكى ويكون عندها عقل
لأن الراجل بطبعه بيحب السيطره ويحب يحس بتفوقه هتلاقي انه في الغالب بيقنع نفسه تماما ان الست اغبى منه وانها متنفعش في حكاية الفهم والتفكير دي وان هو بس اللي المفروض يفكر ويقرر

طيب رأي الدين ايه
اظن ابلغ رد عن رأي الدين هو مواقف الرسول (ص) من مشاورته لزوجاته وانه اخد برأيهم في مواقف عظيمه
يعني رأي الدين مش محتاج شرح الدين ادى الست حق التفكير والمشوره

طيب رأي المجتمع يعني كلام الناس اللي كل ما نيجي نعمل حاجه نقول لحسن كلام الناس ومعرفش ايه
المجتمع المنيل بتاعنا خلى كل واحد خايف ياخد برأي زوجته لحسن الناس تقول عنه شخشيخه في ايدها
يعني برده المجتمع بيضغط علينا علشان نقرر ان الست ماليهاش اي رأي

طيب رأي الغرب اللي مبيجيبش حاجه تسر القلب برغم كل الدعايه اللي بيعملوها انهم متحررين وبيدوا كل واحد حقه انا شايف انهم اونطجيه لأن الست هناك اصبحت مجرد سلعه فقط لا غير وحتى في بيوتهم الرجاله برده بيحاولوا يثبتوا تفوقهم ويمكن لأن الستات هناك عندها وعي شويه بتطالب بحقها انها يكون ليها راي فبتكون النتيجه الطلاق في معظم الحالات وده مش دليل على الديموقراطيه كتهم نيله

اما عن عادتنا وتقاليدنا فحدث ولا حرج
كأنك عايش في عصر حبيب قلبي سي السيد الشخصيه اللي كرهت الراجل اللي مثلها من كتر كرهي للشخصيه
انا كنت بخاف اتفرج على الفيلم زمان وانا صغير من كتر ما انا مرعوب ليعرف ايه اللي حصل لأمينه وهي بتزور الحسين والمواقف المقرفه اللي في الفيلم ولما كبرت بقيت برده مش بشوفه مش خوف لكن قرف منه

فاضل ايه
ايوه صحيح الواقع اللي احنا عايشينه
ناس بتحارب علشان تاخد حقها وتثبت ان الست كائن عاقل من حقها تناقش وتقترح وتفكر زي اي حد تاني
وناس عايشه زي ما تيجي تلاقي كل همها الموضه واللبس والأفلام والعريس ابن الكلب اللي مش عايز يجي
وناس مقضياها اصحاب ورحلات وفي اللذيذ ودي بقى مالهاش دعوه بالقضيه لأنها واخذه حقها بالدراع
وناس تانيه عارفه تمشي امورها

ازاي؟؟

يعني تلاقي واحده متجوزه واحد بتحبه وبيحبها تلاقيه هو يقولك انا كلمتي هي اللي بتمشي وهي ساكته عادي خالص
لكن الواقع ان هي بتعرف ازاي تتعامل معاه من غير ما يحس انها بتفرض رايها يعني بأسلوب لذيذ كده تناقشه وتفهمه وتاكل عقله وقلبه
ودول احلى ناس صراحه
وناس تانيه عامله فيها سبارتكوس محرر العبيد كل شويه ندوات ومؤتمرات وحاجات كده ماليهاش اي تأثير للأسف لأنها بتخاطب عقول مش عندنا هم اخدوا النظام بتاع بلاد بره المؤتمرات والندوات والذي منه لكن كل ده مبيهمش الناس في بلدنا

الفكره يعني من الموضوع اللي عايز اقولها في الأخر

ان ليه الواحد يكون معاه عقل تاني ممكن يساعده بفكره كويسه او يديله حل يخلصه من مشكله مش عارف يحلها خاصة ان لما الواحد بيقع في مشكله بيكون مش قادر يركز يفكر وبيحتاج عقل تاني معاه علشان يساعده
ايه العيب ان امي او اختي او زوجتي او حتى بنتي تفكر معايا وتقول رأيها يمكن تفيدني بحاجه تايهه عني

ولو دورنا بجد هتلاقي مثلا واحد متعلم مثقف وخريج معرفش جامعه ايه وقاعد مع امه بيحكوا في حاجه كده ويقولها عن مشاكله في الشغل مثلا هي مش فاهمه حاجه عن شغله لكن بتفكر معاه وفعلا كتير ممكن تقوله نصيحه عن الناس ومعاملتهم والمواقف والراجل المفروض يعمل ايه فيالمواقف دي

مع انها يمكن ما اخدتش نص التعليم اللي هو اخده
اما رأيي انا الشخصي
بلاش نضيع من ايدنا عقول جميله ونقتلها علشان بس نشعر اننا اقوى منهم واننا متفوقين عليهم
اصل الوكسه بقت جامده قوي كل ما تدخل في مجال محتاج فكر جامد تلاقي البنات عدت وبقت على القمه والرجاله لسه ماشاء الله قاعدين على القهوه مستنين يتفرجوا على ماتش الأهلي والزمالك
سلاااااااااااااااااااااااااام

Scarlet letter

2007-10-23T14:16:00.000-07:00

Scarlet letter

طبعا هتستغربوا ليه اخترت اسم فيلم اجنبي كعنوان للبوست ارد عليكم بذكاءوفهلوه كده اصبروا وانتم هتعرفوا

النهارده بابا كان اجازه وبالتالي انا روحت من الشغل بالمواصلات لأني في العاده بركب مع بابا في العربيه وده كويس علشان بنام تقريبا طول السكه ومش كويس لأن بتفوتني حاجات مش بعرف اعلق عليها كويس

المهم وانا قاعد وقف الميكروباص في اشاره مرور ولقيت جنب مني عربيه ملاكي موديل حديث سوداء بس شايف جواها ثلاث حسناوات لابسين اخر شياكه يعني من الأخر مزز جامده جدا ومعاهم راجل كده هو اللي سايق كل واحده منهم ماسكه في ايدها سيجاره وهو بيفتح علبه صغيره واعطى كل واحده منهم حاجه صغننه حدفتها على بقها على طول انا طبعا تنحت مش فاهم ايه اللي بيحصل وعيني مركزه معاهم قوي واحده منهم التفت لي ونظرت بقوه على اساس يعني اتكسف وابص بعيد بصيتلها بصه من بتوع يا فاجره يا ذنديقه اتعلمتها من ناس اعرفها المهم انها هي اللي لفت وشها بسرعه بعيد عني المهم العربيه اتحركت طبعا واختفوا بعيد عن عيني فكرت للحظه فيهم وفجأه جت على بالي فكره غريبه قوي
هو انا ظني فيهم ايه بالظبط يعني انا شايف ان دول عباره عن ايه

بصراحه ومن غير مواراه انا على الفور قررت انهم اكيد بنات ليل وده الأغا بتاعهم وبيظبط لهم الجمجمه علشان الليله تحلو المهم
الفكره هي هو انا ليه قررت انهم كده يعني ايه الأساس اللي انا بنيت فكرتي عليه

نحدد العوامل زي الجماعه المثقفين البنت قلوب حائره وحكايات فريده بيجننوني بتنسيقهم

اولا يمكن علشان السجاير اللي بيشربوها
بس يا خساره اساس ضعيف لأن في الوقت الحالي ستات كتير للأسف بتشرب سجاير ومش عارف العاده المهببه دي جتلهم منين بدل ما يتعلموا حاجه عن الأتيكيت بيتعلموا الشيشه والسجاير كتكم نيله ما علينا برده كتير بتعدي جنبي عربيات وتلاقي حاجه كبيره كده ولابسه لبس محترم جدا وست شيك قوي وفي منتهى الزوق وتلاقيها فجأه بترفع ايدها تلاقي السيجاره مولعه وتسحبلها نفسين بسرعه علشان تكمل سواقه يبقى السجاير متنفعش دليل على فسق البنات دول ولا على فسق غيرهم السجاير بقت عاده مهببه منتشره قوي في بلادنا حتى البنت جاد الله يهديها برده بتشرب ما علينا
ثانيا يمكن علشان شعرهم عريان وعاملينه قصات مجنونه خالص
يا دي النيله حجه هبله برده علشان البنات اصلا كلها ماشاء الله اتهبلت بالقصات والتسريحات والصبغه والذي منه ومش معنى ان بنت بشعرها تبقى بنت مش كويسه بس هي التربيه والبيئه حواليها هي اللي بتشجعها على لبس الحجاب وفي كتير بنات اتحجبت بصعوبه لأن اهلها مش موافقين انها تتحجب وشايفينه قرار خطييير

ثالثا يمكن علشان لبسهم محذق وملزق وحاجه كده شفتشي وشكلهم هشكه خالص
برده مش شرط انزل حضرتك في شوارع المحروسه تلاقي بناتنا الله يكرمهم ماشاء الله عاملين عرض استريبتيزي رائع كل واحده ناسيه انها عندها شنطه ومساعدين وعفشه كامله وراها وان المصريين والعرب عامة جسمهم مينفعش في الأسترتشات لأن امكانيتنا صعب قوي الناس بره عملت الأسترتش عشان اهو يبين اي حاجه فاضله انما احنا مش محتاجين ملزق كل حاجه ماشاء الله واضحه وضوح الشمس وافتكرت حاجه برده احب اقولها بالمره في الموضوع المنظم ده
رحت محل تصوير مشهور هنا بتصوير العرائس اسمه كادو في شبرا المهم شفت هناك عرايس وعرسان كتير بس اللي لفت نظري هو كمية الصدور واللحم اللي شفته هناك كل دي ستات لابسه على الموضه الأوربيه خحالص كده ه العربس مش بيغير خالص يعني وهي الناس بتتفرج على مراته كده ولا هو فاشخ ضبه وفرحان قوي بأن الناس بتحسده علشان الحلويات دي كلها بتاعته لوحده طيب ما هي كده مبقتش باعته لوحده ولا حاجه دي بقت ملكيه عامه للشعب الست بطبعها كائن جميل تميل لإظهار جمالها وانوثتها ربنا خلقها كده لكن المفروض الراجل يحافظ عليها مسؤليته كده لكن تلاقي الراجل يقولك لا طبعا هي حره ومين قالك ان هي مبتعملش كده علشان ترضيك وتطمن انها اجمل واحده في عينك وانك مش هتبص على غيرها لو انت حرصت انك متدورشي بره هي اكيد هتهدى وتبطل تحاول تحول نفسها لمجرد وسيلة اغراء تشدك بيها
رغيت كتير في النقطه دي

رابعا يمكن علشان راكبين مع راجل وهم كلهم ستات
يا سلام ده ايه السبب العبيط ده طيب ما لو هو اخوهم او عمهم او جوز اختهم مثلا وبيوصلهم طبيعي المنظر ده مش عار ولا حاجه سبب غير مقنع على الأطلاق

خامسا يمكن علشان البنت بصتلي بتعالي واحتقار قوي فأنا اسقطت غضبي عليها بأني افترضت انها مش كويسه ولعنتها بأسوأ الصفات عقابا ليها
وده طبعا معناهخ اني حكمت عليها بدون دليل كنوع من العقاب يعني دليل لا يعتد بيه يا باشا

سادسا ودي طبعا نقطه مهمه جدا لكن يا خساره نسيتها على ما رجعت البيت وكتبت الموضوع
فكروا انتوا فيها
الخلاصه يعني اني لقيت ان كل سبب من الأسباب اللي اعتمدت عليها يمكن هدمه من جذوره يبقى ايه الحل
الحل ان يكون السبب هو اجتماع كل الشبهات اللي فاتت دي مره واحده يمكن اللي خلاني اشك فيهم هو ان كل الحجج الضعيفه دي اجتمعت فكونت فكره واحده قويه في دماغي

طيب ايه الحل في الموضوع ده انا مبحبش اظلم حد حتى بيني وبين نفسي
الحل العبقري نعمل زي الفيلم بتاع سكارليت ليتر وقصته انهم لما بيحكموا على واحده انها ست مش كويسه بيعلقوا على صدرها حرف كبير وهو اول حرف من كلمة زانيه بس في الفيلم كانت بتحب عشيقها قوي وكانت شايفه انها مظلومه من المجتمع كله فطرزت الحرف وعملته من اللون القرمزي وعلقته كأنه وسام على صدرها الفيلم تحفه على فكره واغنيته روعه

بس تفتكروا لو طبقنا النظام ده في مصر كام واحده هيعلقوا على رقبتها الحرف القرمزي

وياترى ايه اللي خلى اوجه التشابه بين العفيفه والداعره خيط رفيع كده
قارن بين لبس كتير من البنات دلوقتي وبين لبس فتايات الليل هتلاقي مفيش فرق بنات الليل برده بتلبس استرتش محزق وبدي يهبل والمكياج الصارخ وجسمها كله مرسوم بالمسطره قدام الكل من خلال اللبس الضيق اللي لابساه

في الأخر انا مبحكمش على حد بس عايز اسأل هي ليه البنات نسيت اسلوب الشياكه بتاع زمان وبيستسهلوا ويقلدوا اسوأ ما في الغرب وخلاص

وختاما اتمنى الموضوع يكون متنسق كويس لحسن انا اتهريت ملاحظات على التنسيق
سلاااااااااااام

نبا هام هبه اختي هتنشر الكتاب بتاعها بتاع " عمر وساره" يوميات اتنين مخطوبين

2007-09-16T01:01:00.000-07:00

ايوه يا ناس اخيرا هتنشر الكتاب الحمد لله طبعا ممكن ناس منكم متعرفش ان هبه هي صاحبة السلسله دي اصلا وكانت بتنشرها على مجلة بص وطل لكن للأسف في ناس سمحت لنفسها تستغل القصه ونجاحها ويكتبوها بأسمهم وانتشرت جدا على النت لدرجة اني كان بيجيلي من اصحابي اجزاء جديده كل يومين وهي اصلا مش بتبعت الأجزاء اللي عندها للمجله علشان متحرقش باقي السلسله الي في الكتاب والغريب اني لقيت ناس بتكتب اعتراضات في النت عن ان القصه بتغلط في الدين وان فيها بجاحه وحاجات عجيبه المهم ان هبه كانت زهقت من الناس اللي سرقت القصه وكانت قررت متكتبش ولا تنشر باقي الأجزاء لكن الحمد لله هي اتعاقدت مع دار نشر وهتنشر القصه والكجله بتاعة بص وطل نشرت الخبر في العدد الجديد وحاطين صورة هبه وهي بتمضي العقد كمان علشان كده عايزكم كلكم تستنوا الكتاب لما ينزل وتقروا وتقولولي رأيكم ايه وانا ممكن ابقى اوزع نسختين تلاته هديه لأصحابي المدونين
اللي عايز يحجز نسخه يبقى يقولي بسرعه

تحديثالكتاب هيتنشر تبع دار نشر "اٌكتب" معلش هو حصل خطأ في اسم دار النشر يا جماعه
وده الأسم الصحيح للدار اللي هتنشر الكتاب وهينزل انشاء الله في معرض الكتاب واحتمال ينزل قبل كده بكام يوم علشان في معرض تاني عايزين يلحقوه المهم انا هابقى احط اللينك بتاع مجلة بص وطل علشان اللي عايز يقرأ التفاصيل كلهاشكرا لكل اللي علق وهنأني اتمنى ليكم كلكم النجاح رمضان كريم

زوجتي العزيزه كوني عشيقتي

2007-09-10T02:31:00.000-07:00

عزيزتي هل تعرفين الفرق بين ان تكوني عشيقتي وان تكوني زوجتي
الفرق عزيزتي كبير
ده كلام ممكن يقوله واحد متجوز لمراته وهي بتسأله ليه بيخونها مع واحد تانيه ايه اللي خلاه يدور على اللي عندها مع حد تاني هي جميله وتقدر تعمل كل اللي التانيه بتعمله بس هي دي المشكله انها تقدر اه لكن تعمل لأ
نعمه كبيره مبيقدرهاش المتزوجون انهم يقدروا يعملوا كل اللي بيعملوه مع عشيقاتهم لكن مع زوجاتهم كل واحد يقولك اصلها بتديني اللي مراتي مش تقدر تعمله لأ يا اخويا حاول مع مراتك وهي هتديك نقطه كمان ان الراجل في حاجات عايز يعملها مع مراته يجري في الشارع ينزل البحر معاها يتمشوا في حته فخمه لكن هو عارف انه لو عمل كده هيغير عليها من نظرات الناس هيخاف عليها وكرامته متسمحلوش بحاجات كتير يقدر يعملها مع العشيقه بدون اهتمام بأن حد يعاكسها او يبصلها نظرة احتقار هو عارف ان دي مجرد نزوه مش هتمس كرامته وده غباء طبعا بس هو ده اللي بيحصل انا عايز اتكلم عن الموضوع من ناحيتين الزوجه من ناحيه والزوج من ناحيه نبتدي بالسيدات طبعا
هتلاقي الست ايه اللي بيمنعها انها تعامل الزوج كأنه عشيقها وطبعا في ستات مش محتاجه توصيه بتدلع جوزها كأنه عشيقها واخر تمام بس انا عايز الناس التانيه بقى اللي تقولك مثلا يعني ايه يقولي ارقصيلي شويه هو انا جاريه ولا عبده عشان اعمل كده وليه تعتبريها استعباد وليه تبصيلها كده مش احسن من انه يقعد جنبك يبحلق في هايفاء ولا اليسا ويقول في نفسه يا بخت جوزها كتنا نيله في حظنا الهباب ويروح مع اصحابه سهره حلوه بالليل تجيله البنت المضيفه تقوله تحب ارقصلك وترقصله وتعمله كل اللي هو بيتمناه ويطلع لها20 جنيه يا سلام كل ده بعشرين جنيه يا بلاش
مع ان مراته ممكن تكون اجمل الف مره وممكن تكون بترقص حلو قوي في افراح حبايبها لكن قدام جوزها يبقى عيب وازاي يعني ده غير اللي بتعتبر الرقضص كله على بعضه كده نوع من قلة القيمه ما علينا مش بس الرقص حاجات كتير ممكن الراجل يتمنى ان زوجته تعملها معاه بس بيخاف يقولها عشان هي ممكن ترد عليه باستهزاء فيه برده ستات تقولك بس اصل انا اتكسف اعامل زوجي كده يقول عني ايه مش متربيه الله يخرب بيت التربيه عشان تستريحوا لو كنا بنتربى صح كنا عرفنا ان العلاقه بين الزوجين فيها كل حاجه متاحه امال زوجين ازاي تلاقي برده بعض الستات تقولك اصل انا عارفه جوزي مش بيحب الحاجات دي يعني الدلع الذايد والهزار الكتير لا يا ستي بيحب قوي كمان بس انتي جربي وكمان اللبس اللي بتلسه الست كلنا عارفين امشهد الشهير الأم يوم الخميس لابسه وحاجطه مكياج وحاجات كده بتلمع والأطفال مستغربين هي ماما عامله كده ليه طبعا ده يوم في الأسبوع ولأنها مش متعوده على انها تحط في البيت بيكون الشكل غريب حتى على زوجها المهم انها بتحاول لكن مره بعد مره العيال بتكبر ومينفعش يشوفوها كده اكيد هيفهموا طيب والحل نقضيها من غير مكياج ولا لبس لذيذ عشان العيال اله يسامح العيال المهم انها بتفقد حاجات كتير بتقدمها العشيقه اللي دايما لابسه وعلى سنجة عشره طبعا مش بقول سيبي البيت والعيال والدنيا تضرب تقلب واقعدي لابسه قميص نوم يهبل لأنه اكيد هيتخض من منظر الشقه المتبهدل ومش هايشوفك اصلا من المزبله اللي في البيت لازم التوازن مش عارف ازاي لكن اكيد في حل شوية تعاون بين الأتنين والأمور هتمشي
نيجي للراجل اللي هايموت كل ما يشوف واحده في الشغل شيك وبتضحك وبتتكلم بجرأه كده ويقولك دي لذيذه وجدعه قوي لكن تعالى شوف مع مراته لو نطقت بكلمه في قعده عامه كده او عزومه عائليه والكل اتلفت يضحك معاها ويعاكسوها زي ما هو بيعمل مع زميلته تلاقيه عايز يلبسها الحله اللي قدامه وعمال يطلع نار من مناخيره طيب ليه ما هي كمان لذيذه اهي وبتعرف تهزر لكن طبعا عيب دي مراتي يا كلاب هي دي المشكله احنا عايزين الست الجدعه اللذيذه بس ميكونش على حسابنا احنا اي واحده بره اشجعها قوي لكن مراتي بتاعتي لوحدي ساعات بيكون معانا حق لأن المجتمع اصبح سافل جدا واي ست بتكون متفتحه شويه الرجال فورا يبدأوا يفكروا يا ترى يجي منها ولا محترمه والتظبيط والتسبيل يشتغل وده يعمل فيها ابو التحرر والتقدميه وده يناقشها ويبدي اعجابه بذكائها اصل الرجاله خلاص عرفت ان الست زي ما بتحبك تمدح جمالها تحب اللي يمدح ذكائها وخصوصا لو كانت جميله وشبعت من المعاكسات ومجاملات الناس عن جمالها جسديا المهم
الخلاصه من الموضوع ياريت كل زوجين بقدروا ان هم عندهم نعمه جميله قوي انهم يقدروا يستمتعوا ببعض لأقصى درجه وبدون اي تدخل من المجتمع ولا قيود يعني اللي يقولي اصلي مع عشيقتي بنستمتع باللحظات اللي بنهرب فيها من الناس ونخطف لحظة سعاده من عمر الزمن هاقوله اتنيل يعني تخطف لحظة سعاده مسروقه ومن جواك ضميرك بيتألم وبتفكر يا ترى ربنا هيعاقبني ازاي ولا تقضي العمر كله في سعاده محدش يقدر يفتح حنكه بكلمه واللي هايتكلم عن انك ازاي حاطط ايدك على كتف مراتك وحاضنها على الكورنيش او ازاي قاعدين في المطعم وميلت على ايدها بوستها حد ليه عندك حاجه دي مراتي يا ولاد الكلب

اتمنى كل زوجين ستمتعوا بنعمة ربنا عليهم
سلاااااااااااااااام

الفارسه ....والحصان

2007-08-06T07:24:00.000-07:00

عارفين كلكم يعني ايه فارسه ويعني ايه حصان دي حاجه سهله وبسيطه

انما انا المره دي قصدي حاجه تانيه بالأسمين دول انا هاستخدمهم في وصف العلاقه بين اتنين بيحبوا بعض ومحدش يفهمني غلط ويحسبني هاتكلم عن الأوضاع الجنسيه ولا حاجه

انتوا عارفيني مؤدب وبنكسف خالص

انا عايز اتكلم عن العلاقه بين الراجل والست كمشاعر يعني هوصف الست بأنها هي الفارسه والراجل هو الحصان لما تتخيل كده العلافات في مجتمعنا بين اي اتنين هتلاقي ان الراجل بطبعه المفروض ان هو القائد والقوي والشجاع والجامد والحاجات دي كلها ده المفرض طبعا لكن لما تقرب اكتر هتلاقي ان الست ممكن بذكائها وحسن معاملتها ليه يكون مطيع ليها ومحب ليها ويحملها فوق ظهره الى اخر المشوار ويكون سعيد بيها المهم هو ازاي يكون التعامل بينهم وده بيختلف من فتره لأخرى في حياتهم يعني اثناء الخطوبه او الإرتباط غير الرسمي تديله ايه وتقوله ايه تصارحه بمشاعرها ازاي تسمعله ازاي وحاجات كتير بالشكل ده يعني مثلا انا بتخيلها مثلا هي وهو لما بيكونوا لسه في فترة ما قبل الزواج بكل انواعها بيكونوا شبه الافارسه اللي واقفه جنبب الحصان وهو داخل السياج بتاعه ميقدرش يعدي عندها الا لو هي قربت منه ولمسته ممكن كمان هي تفتحله باب الحظيره بتاعته وتخرجه ليها وساعتها تغامر بإن الوحش جواه يا اما هيحبها قوي فمش هايأذيها او يمكن طبعه الغالب كحيوان غير عاقل اما يهاجمها بعنف او ممكن يجري ويسيبها برده البنت لما بتحب حد وتكون العلاقه بينهم في ايدها هي اللي تحكم ايه اللي يقدر ياخده منها وايه اللي مينفعش دلوقتي ويا ترى هتثق فيه لدرجة ايه برده ساعات الفارسه بتحب تقرب هي من حياته اكتر فتلاقيها بتروح معاه اماكن بيحب يرعى فيها وتعيش معاه الجو اللي هو عايشه بس ساعتها الخوف انه ممكن يجرها معاه لأماكن مينفعش هي تخوض فيها وبتكون هي المسؤله عن اللي بيجرى ليها برده لما تعدي المرحله ديه ويبتدوا يدخلوا في مرحلة الزواج وتاخد السرج في ايدها ويكون ملزم انه يشيلها فوق ضهره ويمشي بيها في الدنيا ممكن هي تخليه من غير سرج ولا عصايه يحافظ عليها ويحميها لو قدرت تخليه يحبها فعلا لكن ده مش معناه انها تقولي اصلي بثق فيه وعشان كده مش بش السرج نهائي لأ انا عايزك تسيبي السرج خالص وتقفشي في شعره وخصله اللي على رقبته عايزك تتبتي فيها بإيدك وسنانك لأن زي ما هو محتاج يحس انك مش بتقيديه بسرج جلد لازم يحس انك متمسكه بيه قوي ومفيش حد يقدر يخطفه منك ابدا بس الفرق انك بتحسسيه بده بصوره حميميه اكتر من السرج والكرباج وده اللي محدش يعرف يظبطه غير الست الذكيه اللي تعرف الفرق بين انها تمسكه من السرج وتخنقه وبين انها تتشبث بشعره خصله الناعمه ومتسيبهوش ابدا

برده لما نبص علىيهم وهما ماشيين في دنيتهم لازم تميل دايما عليه تديله السكر اللي بيحبه وتوضبهوله وتخليه شبعان منه دايما عشان ميميلش لفارسه تانيه معندهاش حصان وبتحاول تسرق حصانك وكل واحده وطريقتها وبرده حكاية السكر دي بتختلف في فترة قبل الزواج عن فترة بعد الزواج قبل الزواج ممكن تقرب من السور وتحطهوله على ايدها وممكن تسيبهوله على السور من بعيد زي ما هي عامله حدود للعلاقه لكن بعد الجواز المفروض حضرتك تديله السكر من شفايفك على طول عشان ده جوزك مافيهاش حاجه يعني لأن القبله بتقرب قوي العلاقه بين الزوجين اوعي تفقديها خليكي دايما متعوده تديله قبله على خده من وقت للتاني كده وهو خارج وهو قاعد معاكي قدام التلفزيون حسسيه انه لسه عايش ايام الخطوبه لما كان هيموت على البوسه دي وحسسيه انها دلوقتي ملكه ومن حقه يتمتع بيها

حاجات كتير ممكن اقولها عن الشبه بين علاقة الفارسه بحصانها وعلاقة الست بحبيبها

بس في النهايه عايزك دايما تفتكري انه حتى لو كان حصان وجعلك سيدته لازم تحسسيه انه هو اعظم حصان في الدنيا

تحياتي الى احبائي

سلااااااااااااااااااااااااام

الفرق بين الجراءه........... والوقاحه

2007-06-27T03:47:00.000-07:00

هناك فرق شاسع بين الكلمتين

كثير من الشباب يعتقد ان الفتاه الأن تحب الفتى الجريء وهو امر ليس باغريب فهناك الكثير من الفتيات فعلا تفضل ذلك الفتى المغامر الذي يقتحمها ويسلب قلبها رغما عنها ذلك الذي يشعرها بأنها انثى ناعمه وانه يخطفها الى قلعته ولكن المشكله التي اعرضها انه اولا ليست كل الفتيات تحب هذا النوع من الرجال بعضهم يفضله خجولا وهادئا بعضهم يفضله رزينا عاقلا

هذا جانب من الأمر الجانب الخر هو حتى في حالة ان الفاتاه تحب الرجل الجريئ فللأسف فقد كثير من الشباب حاسة الفهم واستبدلوا فكرة الشاب الجريئ بالشاب الوقح

فبدلا من النظره الجريئه القويه التي كانت تذيب قلب الفتاه وتشعل وجهها بالخجل والحمره الجميله اصبحت نظره مستفزه مقتحمه غاصبه وكانه يريد ان يشاهد منها ما تريد ان تخفيه هناك فرق بين ان تنظر لفتاه فتبتسم في خجل من التقاء عيونكم وان تنظر لفتاه في حملقه غبيه حتى ترتجف المسكينه خوفا او ربما كانت قويه ونظرت لك في احتقار

هذا بالنسبه للنظر هناك ايضا اللأفاظ

يا ناس ارحموني في فرق اني اكون جريئ وافتح حوار مع بنت في حاجه جريئه واخليها تتكلم معايا بدون حرج وتحس اني بحترمها هي دي الجرأه مش اني استعمل الفاظ خارجه امامها واجرح حيائها بلساني اللي عايز قطعه انا لما اهزر مع واحد صاحبي بإيحاء جنسي قدام زميله لينا انا كده هنتها وماحترمتش وجودها حتى لو هي متكلمتش او ماعترضتش لأن هي مش حماره هي اكيد فاهمه قصدك بس حيائها يمنعها ترد تهزاك على قلة ادبك لأن ساعتها الكل هايقول اصلها صايعه وفاهمه كل حاجه

مفيش حد دلوقتي مش فاهم الكل فاهم بس بيستعبط عارفين ليه عشان محدش يتهمه بالفجور

وبعدين الجرأه في الكلام مش معناها اني اتنرفز عليها واجادلها بعصبيه وصوت عالي لازم دايما افتكر انها بنت يعني رقيقه وضعيفه مهما كانت طريقتها لأن حتى اللي تلاقيها صوتها عالي بتكون من جواها رقيقه جدا

غير الجرأه في الكلام والنظرات اكيد في حاجات تانيه كتير

ممكن في المواقف يعني الجرأه تحتم عليك ان لما زميلتك تكون بتمر بظروف صعبه وانت مفيش بينك وبينها كلام او معرفه قويه ممكن تكلمها وتسألها اذا كانت محتاجه مساعده او تحاول فعلا تقف جنبها بجد مش حركات ترسم بيها طبعا

ساعتها هي هتقدر جرأتك وانك كسرت الحاجز عشان تحاول تساعدها لكن في فرق انك تكسر الحواجز عشان مشكله او ظرف طارق وبين ان حضرتك تكسر الحواجز عشان تحشر مناخيرك في حياتها الشخصيه وتعرف اسرارها اللي مش عايزه حد يعرفها

حاجات كتير بنغلط ونحسبها جرأه وهي في الواقع وقاحه

الجرأه شيء لذيذ وحبوب ومطلوبه لكن لازم نعرف نفرق الشعره اللي بينها وبين الوقاحه

انا زمان كنت بحب ابص في عيون البنات قوي عشان انا بعشق جمال العيون وكتير بنات كانت بتفضل تستغرب من نظرتي منهم بتخجل وتدور وشها ومنهم بتتحداني وتفضل تبص ناحيتي ومنهم تتصنع انها مش واخده بالها وتسرق نظرا سريعه

لكن بعد كده سمعت مره كلمه في فيلم اجنبي عجبتني قوي

it's not polit to stare

يعني انه مش من الأدب انك تحملق تبحلق يعني

ساعتها عرفت ان اكيد في بنات كتير قالوا عني اني انسان وقح

وانا اللي كنت بحسبهم دايبين في الشعاع اللي طالع من عيوني

تحياتي ليكم ووحشني الكتابه هنا شكرا يا شاهي على التشجيع

شفايف

2007-06-12T05:55:00.000-07:00

المره دي هاتكلم عن الشفايف

ودي عندي هي تاني احلى حاجه في وجه المرأه او في جسدها كله تقريبا بعد العيون ده غير الحاجات التانيه طبعا

وهايجي وقتها نتكلم عنها بعدين الشفايف هي من اكتر الماكن حساسيه وجمال سواء عند الست او حتى عند الرجل لأنه بتحس بالملمس اكتر حتى من الأيدين والشفايف برده انواع في شفايف ممتلئه ومخضبه بالحمره اللذيذه شبه حبة الفراوله تخليك نفسك تقطفها وتاكلها ودي من اجمل انواع الشفايف بس مش معنى كده انها هي وبس اللي جميله انا رايي ان كل شفاه رقيقه بتبقى جميله بس على طريقتها فيه شفايف بتكون مش ممتلئه لكن كأنها فيها انتفاخ بسيط كده من الوسط والشفه العليا بتكون ليها راس محدب بس طبعا مش ناشف بيكون طري خالص ودي برده بتكون جميله قوي الفكره اللي عايز اقولها ان مش مهم شكل الشفايف ولا حاجه المهم الشخص صاحب الشفايف انا مش عايز اتكلم عن جمالها كجزء من الجسد انا عايز بس تفهموا جمالها كمخرج لتعبيرات النفس مخرج لأفكارنا وابتسامتنا واحلامنا يعني لما تبص على شفايف بنت هتعرف منها ابتسامتها تقصد بيها ايه ساعات مكسوفه وساعات مجامله مش مبلوعه وممكن تعرف منها اذا كانت مأموصه منك وخليك فاكر ان لمسه من ايدك على شفايف حبيبتك بيكون ليها معني جميل واحساس هايل وهي برده لما تمر بإيدها على شفايفك وتتحسسهم برقه هتحس بمتعه بريئه وجميله قوي ومتنخدعش في الماكياج اجمل شكل للشفايف وهي من غير اي رتوش او الوان بتكون رقيقه قوي وحنينه

انا مش هاتكلم كتير المره دي عشان انا لغيت كلام كتير لقيته مالوش لازمه

بس ياريت فعلا نعرف يعني ايه شفايف

عيون ونظرات............. اول الطريق

2007-06-01T09:11:00.000-07:00

هل يكون هذا فعلا اول مواضيع الجامعه التي انشئها انا وميراج ربما

العيون

ترى بماذا ابدأ هل ابدأ بألوانها ام بأشكالها ام بنظراتها ام بتعبيراتها ام بشخصيتها

حسن سنترك التسلسل للظروف ..................................اذن لنبدأ

في الماضي كنت اظن ان اجمل عيون هي تلك التي نراها في الأفلام الأجنبيه العيون الملونة بالزرقة الصافيه كالبحر المذهل نذوب في تلك الألوان الذاهيه وربما الخضراء ايضا تلك العيون التي لا تعرف هل خلقت لترى الأشياء كما نراها ام انها تعطي الأشياء لون اخر لكنني اكتشفت ان كل الوان العيون هي روعة لو اننا تمهلنا ونحن نراقب تلم الحلقات المتداخله فذلك الحر الأبيض التي تسبح فيه السفن بكل الوانها فهناك السفن السوداء كقطع الليل لا تدري كيف لا تغرق وانت تنظر اليها لا تدري كيف لا تزال قدماك تحملانك على الأرض وهو لون قوي ويصعب ان تجده برغم ان الكل يظنه منتشر لكن اللون السود الحققي هو نادر جدا وروعته انه يليق بأي وجه فلو كانت سمراء شعرت بانها قد تكحلت له ولو كانت بيضاء لظهر لونه وذاد حسنها

اللون البني وهو درجات كثيره فهناك اللون العسلي الصافي جدا والذي يكا يسقيك منه طعم العسل الصافي ويا حبذا لو كانت الفتاة بيضاء فأنه يذيدها اشراقة وجمالا

وهناك الزيتوني والوان القطط فبعض الناس تملك عيونا مثل عيون القطه لا تملك تفسيرا للونها الا انها كانت في زمن ما مجرد قطه تلعق اللبن وتموء بجوار صاحبها يدللها وتداعبه

هذا عن الألوان اما الأشكال فالعيون قد تتسع لتعطيك احساسا بانك مجذوب لا تفقه شيء غير ان تقف مأخوذا بها وقد تضيق فتجبرك على ملاحقتها لتبحث عن اللحظة التي تنال فيها نظره كامله من تلك العجيبه الساحره

والنظرات انواع فهناك نظرة بريئه ونظره جريئه ونظره ساذجه ونظره تدعي البراءه ونظره مشاكسه ونظره محرضه ونظره مؤيده ونظره مشجعه فلو اردت مثلا تقبيل فتاتك فأنظر في عينيها ولا تتكلم فإن الكلمات تذهب الخيال والسكره ولكن لغة العين ستخبرك بما عليك ان تفعل وعليك ان تقرأ ما فيهم بحرص فقد تقول العين لا انتظر ليس الآن وقد تصرخ فيك اسرع ماذا تنتظر الآن او ابدا فعليك ان تسرع في القراءه فالكلمه لن تتكرر وربما قابلت فتاة في مكان عملك او دراستك ونظرت اليها تتأملها فوجدتها تنظر اليك لا تنظر اليها في غباء وتظل محملقا في وجهها فقد تسعد باللحظات التي ستقبض عليها وهي تنظر اليك خلسه ولكنك قد تحرجها فلا تحاول ان تنظر ناحيتك مرة اخرى عليك ان تشعرها بإهتمامك ولكن لا تثير حرجها اجعلها تشعر انك تتمنى ان تراك ولكن لا تجعلها تعرف انك قد فضحت نظرتها الخفيه وانظر اليها من زوايا اخرى واجعلها تشعر انك تنظر اليها خلسة ولكن تظاهر بالخجل اذا رأتك وتصنع التلعثم وتوجه الى اي شيء اخر في ارتباك واضح اجعلها تشعر انك مثلها تتمنى ان تكلمها ولكن لا تريد احراجها ولكن لا تبقى على ذلك كثيرا فقد تمل من الإنتظار وتنساك اصلا ابحث عن خطوه ايجابيه اسألها عن اي شيء بسيط اسألها عن شيء لا تفهمه اسألها عن شيء تريد رأيها فيه وناقشها واطل الحوار وباغتها بالأسئلة كأنك لا تهتم بشيء الا برأيها هي ادفعها للهجوم على شيء ما او فكرة ما ادفعها للدفاع عن فكره او اتجاه او حلم شاركها الراي او اختلف معها ايهم افضل ليس بالضرورة اختر ايهم يفتح مجالا اكثر للحديث فلو كان تأييدك سيدفعها لطلب اشتراكك معها في الدفاع عن قضيتها او رأيها فقف معها اما اذا كان معارضتك ستثير تحديها ويدفعها لإقناعك بكل الطرق فتحداها واخرج منها الكلمات رغما عنها

وعليك ان تدرك ان لكل عين شخصيتها فبعض العيون وقحه وهي غالبا تكون اكثر سهولة في التحدي ويكون اقصر الطرق للتعرف اليها هو تحديها ولكن بما لا يدفعها لعداوتك

وهناك عيون صريحه وهي اجمل العيون ولو استطعت ان تكسب ثقتها فأنت احرزت كل ما عليك فعله فمثل تلك العيون لا يملكها الا الرائعين في الحب وهم قليلون ولا تنخدع في العيون الغبيه وتظنها صراحه ولكن تعلم ان تدرك الفرق بين عين غبيه لا تملك لك الا ان تدفعك للجنون

وتعلم دائما ان تحترس فالبنات اكثر المستخدمين للغة العيون لذلك فهم اقدر الناس على فهم كل لمحه من عينيك والفتاة تعرف اين ذهبت عيناك في اللحظة التي غفلت عنها فيا ونظرت الى اخرى

من عادتي انني اذا مررت بجوار اثنان متحابين في الطريق اركز بعيني على اعين الفتاه ومنها غالبا اعرف ما بينهم فالبنت التي تعشق فعلا يفيض الحب من عينيها كلما نظرت اليه ولا ارى في الدنيا ما هو اروع او اشهى من نظرة حب وشوق ولهفة ورغبه مجتمعه في عين فتاة تنظر لحبيبها

وساعات تعرف ان كانت تتسلى معه من نظراتها لما حولها واذا شعرت انها تحدق في عيني وانا اراقبهم لا اشيح عنها وجهي لأرى فإن خجلت عيناها عرفت انها مجرد فضولية اخرى تريد ان تعرف من انا ولما احملق فيها وهي لا تقصد ان تخونه اما تلك التي تظل تلاحقني بعينيها كلما غفل عنها والاحقها بنظراتي فأنت ستدرك من اي نوع هي وماذا تريد بالتحديد

في الحلقة القادمه سأحكي عن الشفايف تلك القاتلة

2007-05-28T08:18:00.000-07:00

مش عارف اقول ايه على موضوع العلاقه بين الراجل والست الناس اتكلمت في الموضوع ده لما خربوه كتابه بس انا شايف انه بما انهم لسه بيكتبوا يبقوا لسه ما وصلوش لحل

تلاقي العمليه كده ملعبكه وملخبطه خالص طول الوقت

واسئله كتير قوي بنسألها لنفسنا انا هاختار سؤالين اتنين المره دي عشان نفكر فيهم انا مش هاطول في الإجابه انا بس هاقول رأيي وعايزكوا تقولوا رأيكوابرده

السؤال الأول :هل ممكن ان الصداقه تتحول الى حب؟

السؤال الثاني:هل يمكن ان يتحول الحب الى صداقه؟

انا شايف ان الصداقه ممكن تتحول الى حب وده شيء اكيد وجميل جدا وبيعمل علاقه هايله لأنه من الأساس التفاهم موجود والعشره والموده موجودين والصديق دايما بيكون ادرى واحد بهموم صاحبه وطباعه وظروفه وبالتالي بيكونوا اكتر حبيبين معندهمش مشكلة "اصله مش فاهم وضعي" او اصلها مش حاسه بظروفي" الأثنين بيكونوا عارفين بعض كويس وحتى في العلاقه الحسيه تلاقي انهم سهل يهزروا مع بعض بكلام خاص شويه وبالتالي بتكون رهبة العلاقه اخف يعني يقدروا يلاقوا لغة حوار لكن مفيش حاجه كامله في الدنيا لأن الصاحب ساعات بيكون عارف حاجات مينفعش حبيبك او حبيبتك يعرفها مثلا جرح قديم عايز تنساه علاقه عابره بتخلصها وحاجات كتير بنتكسف نعرفها لأحبابنا وممكن نصارح بيها اصحابنا وفيه عيب مهم انك بتخسر واحد من الأصحاب اللي بقى صعب قوي نلاقيهم دلوقت

السؤال التاني ان ممكن الحب يتحول صداقه انا شايف ان ده صعب جدا جدا جدا وفي حالات نادره يعني يكون الأتنين اصلا مش بيحبوا بعض لكن كانوا بيجربوا ولأننا عاطفيين بطبعنا فده صعب جدا لأن اي علاقة حب بتنتهي لازم على الأقل يكون فيه قلب انكسر او انجرح ده اذا مكانش الأتنين انجرحوا ده غير ان ازاي الشخص اللي كنت بتحلم يوم تضمه بين ايديك دلوقتي يبقى مجرد صديق عادي مشاعرك ناحيته زي مشاعرك ناحية اخوك ولو يوم فكر يتجوز ازاي تقدر تقف في الفرح وتشوفه في احضان حد تاني مش عارف انتوا رأيكوا ايه

اللي يعرف يقولي وانا هابقى اديله حته من السمك اللي نبض اسكندريه هاتجيبهولي

تحياتي الى كل صديق والى كل عاشق

علمني حبيبي

2007-05-27T00:07:00.000-07:00

ياسمين

علمنى كيف تكون القبلات

علمنى يا حبى الأول

فأنا معشوقة أقلامك

وأنا تلميذة أحلامك

علمنى كيف تكون البسمة سعادة

علمنى كيف يكون الحب عبادة

حدثنى استاذى الأعظم

حدثنى عن الحب لأعلم
أخبر طالبة العشق بمحرابك

أتكون القبلة وليدة نظرات

ام تولد لما نتعانق

أخبرنى بكل الأسرار

حدثنى عن لغة الأعين

الحب نعيم أم نار

أحديد ام أنفس معدن

علمنى وجرب وتفنن

فأنا تلميذة فى العشقِ

ٍِفنانٌ أنت .. ومتمكن

هذه الكلمات الرائعه لم اتمكن من منع نفسي ان انقلها لكم

فقد لمستني جدا من العزيزه ياسمين

ولكنني قد اخترت صوره غير التي اختارتها هي سامحيني

يا ريت الاقي وطن ويا ريت تلاقي بطل

2007-05-26T02:43:00.000-07:00

قالولي كل عاشق لازمه له وطن

وكل بنت حلوه عايزالها بطل

انا قلت في عنيها لقيت اجمل وطن

وهي في ملامحي لقت برده البطل

********************

انا لا اهتم بُأذنيك

2007-05-23T01:12:00.000-07:00

اردت ان اقول بعض الكلمات الى من احب قلبي ولكني اعلم انها ربما لن تقراها ابدا ولكني اردت ان اخرج ما في صدري

انك الأن تتسائلين دائما عن سر تغيري ولماذا لم اعد كالماضي اتكلم بكلام الحب واشعاره طوال الوقت واخبرك عن مدى لوعتي وعن اشواقي وعن مكانتك وكل ما كنت ابرع دائما في ان ارسم البسمه على وجهك واحيانا الخجل ايضا بقوله

لعلك تظنين اني قد قل حبي او ضعفت اشواقي وهدا بركان مشاعري بعد ان فاض بكل ما كان يغلي فيه

لا يا عزيزتي ليس هذا هو السر انا لا اعرف كيف اصيغ لك هذا الأمر ولكني اصبحت احبك اكثر

في البدايه كنت اقول كلاما وكلاما وكلاما عن حبي لك لكني لم اعد اشعر ان هذا الكلام يساوي شيء انا اريد ان اقدم لكي ما هو افضل من الكلمات اريد ان يكون حبي لكي بالأفعال وليس مجرد كلام حلو اريد ان يكون قلبك هو من يسمع كلماتي انا لا اهتم بأذنيك الأن

انا بعد كل هذا الوقت لم يعد بإستطاعتي ان افتعل كلمه او اقتبس من على لسان المطربين او الشعراء كلمات قد لا افهم معناها

انا في الماضي كنت اقول اني لو فقدتك سوف اضيع ولكني لم اكن اعرف معنى الضياع الذي اتحدث عنه فقط كنت اعرف ان خسارتي ستكون كبيره اما الآن فقد عرفت ما معنى ان يضيع رجل انا اللآن اعرف ماذا سيحدث لي لو فقدتك

انا لن احب ابدا بعدك وسأخون كل من ائتمنني وسأغدر بكل من وثق بي وسأدنس كل ما تطول يداي وسأغتصب كل ما ليس من حقي

اذا خسرتك فسأجعل كل من يلمسني يخسر

تتسائلين كثيرا لم الحزن والغضب دائما في عينيك

لأني يا حبيبتي في معركة انا لن اتخلى عن قلعتي وعن حصوني فانت قلعتي وحصوني لن اهزم لن اسقط لن اتراجع سيظل سيفي في يدي ولأني في قلب معركة فليس هناك وقت للضحكات والإبتسامات

ولعل غضبي وكآبة النظرة في عيني ترهب كل من يجرؤ ان يحول بيني وبينك

ولكني اعدك اني يوم انتصر في حربي والقاكي سأغسل قلبي من الحقد والغل في شواطيء عينيك

وساستعيد الأمان في قلبي من قلبك

وسأعود لأهتم بأذنيك

اما الآن فأنا لا اهتم بأذنيك

ليه البنات بتحب المجروحين

2007-05-21T23:06:00.000-07:00

سؤال كان دايما محيرني في البنات انهم دايما بيحب الشخصيه الحزينه او المجروحه يعني يختاروا واحد واخد بومبه جامده وعمال يعيط في الفيلم ويقعدوا يسرحوا فيه ويحبوه ويا سلام لو واحده زميلها مثلا خطيبته سابته واديته على قفاه تقوم هي تقعد متأثره قوي بقصته ويصعب عليها وبعدين هوب تلاقيها بتحبه ودايبه فيه

انا هاحكيلوا حاجه حصلت معايا انا نفسي

كان ليه زميله في الكليه وكانت اصلا ساكنه في نفس منطقتي لكن عمري ما كلمتها في المنطقه الا مره واحده كانت الصبح بدري وكنت رايح الفرن الحق قبل الزحمه وطبعا مش شايف حاجه قدامي وماشي نايم فجأه لقيتها بتكلمني وبتطلب حاجه مفهمتش طبعا في الأول لكن بعد كده فهمت ان الكلب عمال يخوفها ومش عايز يعديها انا اصلا بترعب من الكلاب بس طبعا مينفعش اقولها ماليش دعوه احسن يعضني المهم عملت فيها عنتر وقعدت اعمل زي ما بشوف ابويا يعمل يشخط كده في الكلب ويهوشه بحاجه يقوم الكلب يجري على طول لكن طبعا على حظي الكلب كان غتت شويه المهم في الأخر خليتها تعدي وانا وقفت اهوش الكلب بالطوب شكرتني ومشيت ولم اراها ثانية الا بعد حوالي 3سنين في الكليه وطبعا خفت اكلمها عشان في ناس مش بتحب يكون ليها علاقه بحد من جيرانها في الكليه على اساس ان كل واحد بيحب يكون براحته المهم اتفتح بينا الحوار واكتشفت انها بنت زي العسل ودمها خفيف جدا وان اخوها الصغير صاحب اخويا من زمان وانه بيروح عندهم البيت كمان المهم بقينا اصحاب جدا وبقت بتحكيلي على حاجات كتير في الجامعه في النشاطات اللي بتشترك فيها في المذاكره

وفي يوم لقيتها عايزه تقولي حاجه بس متردده انا طبعا قلقت انا مش مستعد لإرتباطات دلوقتي

طبعا اي حد مكاني لازم يفكر انها اكيد حبته وعايزه تصارحه اتاريها عايزه تصارحني انها بتحب واحد تاني بس عايزه رأيي وهي لسه متردده واصلا مفيش بينهم اي كلام بس هي معجبه بيه وخلاص

سالتها هو مين راحت قالتلي انه واحد جارنا برده في المنطقه

لكن الواد ده حكايته طويله وانا عارفها من احدى جارتنا اللي تحب تحكيلك اخبار الدنيا كلها المهم

اخدتني الحماسه ورحت حاكياها قصته انه كان بيحب بنت تانيه وكانوا يعرفوا بعض من سنين والناس كلها كانوا عارفين قصتهم لكن فجاه البنت قلبت عليه وعملت معاه مشاكل وقالتله مش عايزاه والواد يا عيني حساس قوي تعب جدا وبقى يمشي تايه في الشارع لحد ما ربنا كرمه بعربيه خبطته ورقد في المستشفى شويه طبعا صعب على اهله فعرضوا عليها انهم يعملولها كل اللي هي عايزاه واشتروا قطعة ارض كبيره عشان يبنوهالوا بيت لوحده طبعا هي ولا سألت وهوب اتجوزت واحد تاني بسرعة البرق

المهم الواد اتعقد وبقى في حاله كده

طبعا انا خلصت القصه والبنت الهابله بقت دايبه في سي محمد كأنها بتحبه من سنين

انا طبعا كنت هاولع فيها عشان انا شايف انها بنت لذيذه وتستاهل واحد يكون مش متدهول كده انما ايه هي قررت ان هو ده فتى احلامها وبدأت تحاول تفكر ازاي تتعرف عليه

انا مش هاقول التفاصيل لأنها سر بيني وبينها قعدنا نخطط انا وهي في الموضوع ده كتير لكن الحمد لله دلوقتي هما اتجوزوا عشان بس متسالونيش كتير وتخيلوا ان البيت اتبنى ليها هي (ربنا يسعدها يا رب ) وانا بقى عايز اسال ايه اللي يخلي البنا يحبواالمتدهولين

الحمد لله انا خلاص اتحبيت مع اني متدهولتش قبل كده

بس اديني اتدهولت فيها هي

وسلاااااااااااااااااااااااااام يا شباب ويا بنات

ويا ريت البنات تفكر وترد عليا

تابع ولا غنى عن القبلات

2007-05-20T07:31:00.000-07:00

انا قررت اكتب البوست وخلاص اللي يحصل يحصل هي Doba

اللي شجعتني لما سالت

المهم انا كل اللي عايز اقوله ان انا ليا رأي صغير في موضوع القبلات دي وهي اني بعشق حاجه اسمها قبلات وانا شايف ان اعلى نقطه في العلاقه الجسديه هي القبله وان كانت ليها انواع كتير هاحاول اقول اللي اعرفه منها

طبعا اشهر والذ قبله هي french kiss

ودي اقوى انواع القبلات ويستخدم فيها كل الأسلحه اللي عندك (شفايف لسان سنان ايدك لعابك ) طبعا بتقولوا ايه القرف ده وايه السفاله دي لكن هم الفرنسويين كده دايما منيلين الدنيا ومع ذلك مشهورين بالرومانسيه والحساسيه

وفيه قبله حنينه على الخد لما تكون تعبان قوي وحبيبتك عايزه تخفف عنك تقوم مدياك حاجه على خدك كده وتبقى عامل زي العبيط مش فاهم حاجه بس مبسوط قوي

وفيه قبله خطف ودي نوعين اما انك عايز تخطفها عشان حبيبك مش عايز يديهالك او انه موافق بس مكسوف فيديهالك كده في ثانيه وبرده تبقى عامل زي العبيط ومش فاهم حاجه بس مبسوط

وفي بوسه على الخد وساعات بتبقى جميييييييييييييييييييييييله جدا لدرجة انك تقعد تملس على خدك لما توقع الجلد من عليه

وفي بوسه على الإيد ايوه ملمس الشفايف على اليد بيكون عجيب قوي

حاجه تانيه عايز اقوله ان اصل كل حاجه في الحب عامة هي القبله يعني مثلا الحضن ما هو الا قبله بس من جسد لجسد

ولمسة اليد هي برده شوية صوابع بيبوسوا بعض

وحتى نظرة العين ممكن تكون بوسه بس ميزة العين انها تبوس في اي حته وطبعا النظره لما تيجي في النظره بيبوسوا بعض

يعني من الآخر الموضوع كله بوس في بوس

ادعولي اني اتجوز وابوس بقى

ايوهه عايز كل واحد فيكوا يبعتلي صورة بوسه عجبته قوي وحسها

ولا غنى عن القبلات

2007-05-16T07:51:00.000-07:00

عايز تبقى صاحبي

2007-05-13T02:56:00.000-07:00

Hi this Ehab who will be your host in this lovely place

اهلا يا شباب منورين امنى ان محدشش يكون وراه ميعاد متأخر عنه ولا حاجه انا عايز اقول كام كلمه كده وبعدين هامشيكوا على

طول انا طول عمري بحب اتعرف على الناس بس كانت دايما مشكلتي ان الناس ساعت بعد ما بعرفهم واقرب ليهم باكتشف انهم مش زي ما انا كنت متصور عشان كده انا لقيت ان احسن حاجه الواحد يعملها لما يتعرف على حد انه ميبنيش اي امال او افتراضا ت لكن عليه انه يتقبل الشخص زي ما هو و مايحاولش انه يفكر "بس لو كان مبيكلمش كتير او لو بس يصبر شويه او لو بس يبطل تريقه على الناس " وحاجات كتير من دي بنقولها عن اصحابنا مع ان هم برده بيقولوها عننا في سرهم

عشان كده عايزكوا تعتبروني الصديق اللي انتوا مش لاقينوا وانا هاعتبركم المثل

بس لازم نكون صريحين مع بعض اتكلموا في اي حاجه مشاعركم احلامكم اوجاعكم حتى غرايزنا ممكن نتكلم عنها بس في حدود الأدب

كفايه عليكوا كده

ehabonnet@hotmail.com

مش عايزين قلة ادب من اولها

2007-03-16T05:53:00.000-07:00

يا ولاد مش عايزين قلة ادب من اولها ممكن بعدين افكر انحرف و اجيبلكوا قلة ادب

المهم الأول اننا نتعرف على بعض و نكون شبكة كبيرة ( ومحدش يفهم موضوع شبكة دي غلط انا قصدي خير) المهم انا ايهاب و عايز ادور فيكوا على كل واحد عايز يقول راية في حاجه مجنناه او محتار معاها واللي عنده مشكلة عاطفية انا ممكن افيدة برائي وان كنت مش عارف احل مشاكلي اصل مشاكلي مادية مش عاطفية يعني اتبرع ولو بسندوتش و العاقبة عندكوا في المسرات .

اه قبل ما انسى اللي غاوي يتكلم انجليزي و عايز يحسن مستواه يكلمني عشان نرغي شوية ونحسن لغتنا يمكن نفلح واللي عايزه واد حليوه متسالنيش عشان الإحراج

سلام